Yigil 14
Lelaa Mbôgi i Yéhôva i yé ntjegek
Ñañ u Mbôgi i Yéhôva i len u bi bôdle ngéda mbe? (1)
Lelaa makoda ma Mbôgi i Yéhôva ma ntagbe? (2)
Lelaa moni nwap mi ngwélana? (3)
Bo nje ba yé batelep ba bisu ikété hikii ntôñ? (4)
Mambe makoda ma keñi ma mbôña hikii nwii? (5)
Kinje nson u nséla i dikuu tjab di keñi ni di titigi? (6)
1. Mbôgi i Yéhôva i len i bi bôdle i nwii 1870. I bibôdle, ba ba sébla le Banigil Bibel. Ndi i nwii 1931, ba yoñ jôl li nlôl i Bitiina le Mbôgi i Yéhôva. (Yésaya 43:10) Ba bi bôdôl ni ndég bôt, ndi i len ini, ntôñ wap u nhol u yila didun di didun di baté likalô ikété biloñ bi nloo 230.
2. Libim li mintôñ mi Mbôgi i Yéhôva li nkodba ngélé aa hiki sondi. Di naña we le u loo to li mbe likoda u ngwés. (Lôk Héber 10:24, 25) Biniigana bi nlôl i Bibel. Makoda ma mbôdôl, ma malag ni masoohe. “Tjémbi di mbuu” ti di ntihba ñem di ntuba ki bebe le i makoda momasô. (Efésô 5:18, 19) Majôb ma yé yañga, njañgi i ta bé.—Matéô 10:8.
3. Libim li mintôñ li mbôñôl makoda map i Ndap Ane. Ma mbéna bé ba mimpémba mi mandap. Ma ñôña ni Mbôgi Yéhôva i i neebe sal ngi nsaa. W’a tehe bé biôñgba, to mbasa, to gwom bi mpôôna bi, mu Ndap Ane. Moni ba mbôñôl mi nlôl makébla ma njômbi lam. Dikukuu di yé inyu i bet ba ngwés ti nya makébla i.—2 Korintô 9:7.
4. Hiki ntôñ u gwé mimañ tole batééda ntôñ. Bon ba yé ño inyu niiga ntôñ. (1 Timôtéô 3:1-7; 5:17) Babôñôl ba nson ba nit mimañ. (1 Timôtéô 3:8-10, 12, 13) Bôt bana ba ñane bé ntôñ. (2 Korintô 1:24) Ba gwé bé bitel bi tôbô. (Matéô 23:8-10) Ba nhaba bé mahéñha ni Mbôgi ipe. Ba gwé bé to nsaa inyu nson ba nsal. Mimañ mi nkon masé inyu yônôs njômbi mbuu i ntôñ. Ba nla hôgbaha miñem ni ti maéba ngéda ndutu.—Yakôbô 5:14-16; 1 Pétrô 5:2, 3.
5. Mbôgi i Yéhôva i nlôôs ki makoda ma keñi hikii nwii. Nya mangéda i nyen ngandag mintôñ mi mbomna inyu kôs biniigana bi tôbô bi nlôl i Bibel. Ba mbéna sôble bôt ba ntip yila banigil mu makoda ma keñi ma.—Matéô 3:13-17; 28:19, 20.
6. Hikuu hi keñi hi Mbôgi i Yéhôva hi yéne i New York i Amérika. Nyoo nyen ño ntôñ u yéne. Won u gwé mimañ mi pék, mi mi ntééda ntôñ u nkoñ isi wonsô. Dikuu dipe di di nloo mbôgôl di yé ni nkoñ isi wonsô. Mu bahoma ba nyen Mbôgi i Yéhôva i i neebe sal yañga i mpémés bikaat bi bi niiga Bibel ni om gwo ni hisi hiosô. Nyoo ki nyen biniigana bi nlôl i tjek nson u ñañ nlam. Inyuki u nla bé ke i béñge hikuu hi hi yé we bebe?