PES 2
Ba kôli ha bé niñ ikété paradis
Mbuu mbe wada u bi tinde munlôm ni mudaa nu bisu i tjél énél i Djob. Inyu hala nyen bôt ba bi bôdôl boñ béba, ba kahal ki wo
NTANDAA ngéda ilole a nheg bôt ba binam, Djob a bi bôg heg bihégél bipe i ngii ba nsébél le biañgel. Mbuu mbe wada ba nsébél le Satan Nsohop, u bi pôs Éva i wom Éden, u tinde nye i je litam li e Djob a bi béhe bo le ba je bañ.
Satan a bi boñ wee nyoo i mpot. Ni nye a lôk Adam bo Éva le Djob a nim bo mam malam. A kal mudaa bo nlôm wé le to ba nje litam Djob a bi sôña bo, ba ga wo bé. Hala nyen Satan a bi soman Djob le a ntembene bon bé. A unda ki bo le ibale ba ndogbene Djob, ba ga ba kunde, ba kôhna ki bañga yi. Tembee bisu i. Ndi kahab i Djob tole tel yé nungingii yon satan a bé kolba. A lona ki mana mambadga bo le: Baa Djob a kôli ane? Baa a nyi énél? Baa a ñane inyu biyéñe bi bôt ba binam?
Éva a bi hémle tembee i Satan. A bôdôl memle bilama bi e. Ni nye a pat litam, a je. A ti ki nlôô wé, yak nye a je. Bôdôl ha nyen ba nimis libak li peles. Yom ba bi boñ i nene man jam, ndi i éba le ba bé bôt ba lipama. Adam bo Éva ba bi kôôba pohol ndogbene mambén ma Djob. Hala nyen ba bi tjél énél i nu a heg bo peles, a ti ki bo gwom gwobisô.
Mbôô y’a “nyagat ño woñ, we w’a nyagat nye tindi.”—Bibôdle 3:15
Djob a bi pémhene bandogbene nye bobasôna mbagi tjiba. A pot ki le Mbôô tole Ntohol a ga lo i tjé Satan. Satan nyen Djob a bé pôdôl ngéda a bé baglene nyoo mbagi. Djob a nwas bo le ba kônde niñ ndég ngéñ i unda konangoo yé i ngii bon Adam ni Éva ba bé ngi gwal, le ba bana botñem le nwet Djob a ga om, a ga mélés mandutu ngimanôgla i gwal i wom Éden. Lelaa Djob a ga yônôs sômbôl yé i tohol bés? Njee Djob a ga om i kobol bés? Mana mambadga ma bi kôhna ndimbhe ndég ni ndég i nlélem ngéda Bibel i ba ntilbaga.
Djob a bi luhul Adam ni Éva le ba nyodi paradis. Kiki ba bi habi wom Éden, ba bé nyégsaga i homb biibe le ba kôhna koga kel ni njel nson isi. Mbus ngéda, Éva a nembee, a gwal man nu bisu le Kain. Ba bi gwal ki bon bape, bôlôm ni bôdaa, kiki Abel ni Set nu a bé nsôgôsôgô Nôa.
—Biniigana bini bi nyôñna i bikaat bi Bibôdle pes 3 i pam pes 5; Masoola 12:9.