PES 4

Malômbla ma Djob bo Abraham

Abraham a hémle Djob, a nôgôl ki nye. Ni Yéhôva a bôn nye le a ga sayap nye ni bulus mbôda yé

BEBE ni 350 ma ñwii i bi tagbe mbus Ntida Malép ma dilo di Nôa. Nsôgôsôgô Abraham a bé a nyén i Ur, soso tison ba nsébél len le Irak. Abraham a bééna hémle i bé tôbôtôbô. Ndi ngéda i bi kola le a kôhna manoodana.

Yéhôva a bi kal Abraham le a nyodi loñ a bi gwééne, a ke i loñ ipe i a nyi bé. I bi sôk nene le i loñ i i yé Kanaan. Ni Abraham a pala boñ yom ba bi kal nye. A nyodi ni ndap yé yosô, ni Sara nwaa wé, ni Lôt man manyañ. Mbus ntandaa liké, ba kahal niñil ikété bilap i loñ Kanaan. Ikété malômbla Yéhôva a boñ ni Abraham, a bôn nye le a ga yilha nye loñ keñi. A kal ki nye le ni njel yé nyen biloñ bi hisi gwobisô bi ga saibana. A bôn ki nye le mbôda yé y’ a yoñ hisi hi Kanaan.

Abraham ni Lôt ba bé ngwañ ngandak, ba banga bibémba bi mintômba ni mauñ ma nyaga. Abraham a nwas le Lôt a pohol homa nu a ngwés yééne. Ni Lôt a pohol hisi hi nhés bijek, tegep mbok yosôna i pañ Lom Yordan bebe ni tison Sôdôm. Ndi bôt ba Sôdôm ba bé bôt ba ndéñg, baboñbéba bakeñi i mis ma Yéhôva.

JMbus hala, Yéhôva Djob a bôn Abraham le mbôda yé i ga bôl kiki tjôdôt di ngii. Ni Abraham a hémle mbônga u. Ndi nwaa wé Sara a bé kom mudaa. Ngéda Abraham a bi pam bimañ bi 99 ma ñwii, yak Sara a pam bebe ni 90 ma ñwii, ha nyen Djob a kal Abraham le nye ni Sara ba ga bana man munlôm. Hala nyen Sara a gwal Isak kiki Djob a bôn bo. To hala kii Abraham a bééna bon bape, Ntohol nu Djob a bôn i wom Éden a bé lama lôl ni njel Isak.

I dilo di nyen Lôt ni lihaa jé ba ba niñik bebe ni Sôdôm. Ndi Lôt a yila bé mboñbéba kiki bôt ba Sôdôm inyule a bé mut telepsép. Yéhôva a kit bañ le a nkogse bôt ba Sôdôm, ni nye a bôg ep biañgel i béhe Lôt le tjiba i yé njel. Biañgel bi kal Lôt ni lihaa jé le ba pala pam mu Sôdôm ni le ba béñge bañ mbus. Ha nyen Djob a bi nôs solfa ni hié i ngii Sôdôm ni Gômôra, a tjé bayén mu. Lôt ni bon bé ba bôdaa iba ba bi pei. Ndi nwaa wé a bi béñge mbus, bebeg inyule a bé gwés lingwañ a bi yék ikété tison. Kiki a mboñ hala, ni nye a wo inyule a bi ndogbene Djob.

—Biniigana bini bi nyôñna i kaat Bibôdle 11:10–19:38.