Mpôdôl a bak i minkôm, a nkôhna dinyo malép di mam m’a lo

DANIEL a ba mange wanda nu a téñép i telepsép. Ba bi kena nye i minkôm i loñ Babilôn ki Yérusalem a yé ngi tjiba. Bôt ba Babilôn ba bi ti Daniel ni Lôk Yuda ipe i i bé minkol ndég kunde. Mu ntandaa ngéda Daniel a tégbaha i Babilôn, Djob a sayap nye ngandak. A sôñ nye ikété bee mbondo njéé. A boñ ki le a tehe mam ma bé lama lo ngandak ñwii i mbus ngéda. Ikété bindéé Daniel a pot, i i bé mahee iloo bii bipe i mpôdôl inyu Mésia ni ane yé.

Daniel a yi ngéda Mésia a bé lama lo. Ba bi kal Daniel ngéda litén li Djob li bé lama bem malo ma Mésia. Daniel a bi toñol le 69 ma sondi i ñwii ma ga tagbe bôdôl kel lipôdôl li ga pam le ba témb ba oñ lipént li Yérusalem, i pam kel Mésia a ga lo. Nyen a “yé mbombok”. Sondi yada i gwé dilo disaambok; sondi i ñwii i gwé ñwii mi saambok. Lini lipôdôl li bi pam i ñwii 455 B.N.Y. ki Daniel a ma wo behee. Ibôdôl ha nyen 69 ma “sondi” ma bi bôdôl songlana. I bi nom 483 ma ñwii, i mélél i ñwii 29 N.Y. Ikété man kaat nunu, u nke tehe kii i bi bôña i ñwii u. Daniel a bi tehe i bisu bi ngéda le Mésia a ga “tjiba,” hala we ba ga nol nye i ti bikwak inyu béba.​—Daniel 9:24-26.

Mésia a ga yila Kiñe i ngii. Daniel a kôhna yiinda i i ba tôbôtôbô. A tehe Mésia i ngii, nu ba sébél le “wada a pôn-ga man mut”. Mésia a kôôge bebe ni yééne ane i Yéhôva nyemede. Ni Yéhôva a ti nye ngui i pot mbok, “yak ni lipém ni ngim ane.” Ane yé i ga ba boga ni boga. Ni Daniel a nok ki soso jam ipe i mbéñge Ane Mésia, yo ini le: Kiñe i ga ane ni bôt bape. Ntôñ wap bôt u nsébla le “bapubhaga ba Nungingi.”​—Daniel 7:13, 14, 27.

Ane i ga tjé biane bi nkoñ isi. Djob a ti ki Daniel yi i kobol eem i bé yumus Nébukadnézar, Kiñe Babilôn. Kiñe i bi emel soso ôngba i bééna ño u gôl. Tôl yé, bitjep ni moo ba bak silba. Libum ni mabel bi bé mamuna, makôô ma bé éña. Ndi mabal mon ma bé jôga jada éña, jôga lipe biték. Ndi kiñe i tehe ki ngok yada i mogla i ngii hikôa, i ôm ini ôngba i mabal, i nyugut yo miluñ miluñ. Ni Daniel a kobol le bijô bi ôngba bi yé yimbne i ñaba ntôñ u biane bi ga énél nkoñ isi yada mbus ini, bôdôl ni Babilôn nu a yé ño gôl. Daniel a tehe i bindéé le Ane Djob i ga telep i mamélél ma énél i béba nkoñ isi ini,i tjé biane gwobisôna. Mbus hala, yomede i nom boga ni boga.​—Daniel, pes 2.

Daniel a bi niñ ngandak ñwii letee a tehe tjiba Babilôn i biunul gwé. Kiñe Kirus a bi tét tison kiki bapôdôl ba bi bôg pot. Hala a nom bé, Lôk Yuda i koblana minkôm ngéda ma pam tjetjes kiki bapôdôl ba bi bôg kal le loñ yap i ga yén hôlô 70 ma ñwii. Bangomén, biprisi ni bapôdôl ba ba bi tiñip i telepsép, ba bi éga Lôk Yuda le ba témb ba oñ Yérusalem, ba tibil ki témpel i Yéhôva. Ndi kii ga bôña i mamélél ma i 483 ñwii?

​—Biniigana bini bi nyôñna i kaat Daniel.