PES 16
Malo ma Mésia
Yéhôva a ñéba le Yésu nu Nasarét nyen a yé Mésia a bi bôn behee
BAA Yéhôva a ga hôla bôt i yimbe Mésia? Ñ. Béñge ki yom Djob a bi boñ. Bebe ni mbôngôl ñwii ina ki ba ma mal tila Bitilna ni hop u Lôk Héber, hingonda le Maria a kôhna hélha jam i ñombok u Galiléa, i tison le Nasarét. To hala kii Maria a bé ngi yi munlôm, añgel yada le Gabriél i pémél nye, i kal nye le Djob a ga gwélél ngui yé, tole mbuu mpubi wé i némbaha nye le a gwal man munlôm. Nu man munlôm nyen Djob a bôn behee le a ga téé Kiñe i ane i i ga nom boga ni boga! Djob a ga héa niñ yé i ngii, a ha yo ikété libum li Maria, le nu Man Djob a ba wé wé.
Maria a neebe mbegee ini ni suhul nyu. Kapinda yada le Yôsef, yega yé libii, a sôk bii nye ki añgel Djob a om i ma kal nye le a kon bañ woñi inyule Djob nyen a mboñ le Maria a ba jém. Ndi lelaa ni bipôdôl bi bapôdôl bi bé kal le Mésia a ga gwééne i Bétléhém bi bé le bi yoñ? (Mika 5:1) Hoñol ki le nunu man tison le Bétléhém a bé liké li bebe ni 140 kilométa i pam Nasarét!
Kiñe Rôma yada i ti oda le ba yoñ ñanga u bôt ba loñ yosôna. Hiki mut a bé lama ke i tison i homa wé ligwééne le a tilba kaat ñanga. Inyu hala nyen Yôsef bo Maria ba bé lama témb i Bétléhém inyule nyo nyen ba bi gwééne. (Lukas 2:3) Maria a bi gwélél i ndap bilém, a niñne man i ngi jéhne bilém. Ni Djob a ep limut li añgel le li ke i pañ hikôa hada, li legel batééda mintômba le nu man a ntip gwéé nyen a yé Mésia nu likak, tole Kristô.
Mbus ngéda, ngandak bôt ipe i yighe le Yésu nyen a yé Mésia nu a bé lama lo. Mpôdôl Yésaya a bôg pot le mut wada a ga kôôbana Mésia njel. (Yésaya 40:3) Mut nu a yé Yôhanes Nsôble. Ngéda a tehe Yésu, a lont a pot le: “Nuna-ki, Man Ntômba Nyambe nu a nhéa béba i nkoñ isi!” Kunda yada banigil ba Yôhanes Nsôble bahôgi ba noñ Yésu. Wada wap a kal le: “Di ntehe Mésia.”—Yôhanes 1:29, 36, 41.
Mbôgi ipe i bi bôga. Ngéda Yôhanes a sôble Yésu, Yéhôva nyemede a pôdôl i ngii, a kal le: “Man wem nu gwéha nunu, a nlémél me.” (Matéô 3:16, 17) Mésia ba bôn behee, nye nunu!
Mam mana ma bôñna mbe ngéda? I ñwii 29 N.Y., i mamélél ma 483 ma ñwii Daniel a bôg pôdôl. Hodo, mam mana ma yé soso ndémbél ikété ndémbél ipe le Yésu a yé toi Mésia, tole Kristô. Ndi kinje ñwin Yésu a bé legel hana isi?
—Biniingana bini bi nyôñna i bikaat bi Matéô pes 1 i pam 3; Markô pes 1; Lukas pes 2; Yôhanes pes 1.