Ba nol Yésu Kristô

KIKI a bi mal tégbaha ñwii maa ni pes i niiga ni añal miñañ minlam, Yésu a bé yi le dilo tjé hana isi di nkahal mal. Baéga ba bibase ba Lôk Yuda ba jôp i jimp i nol nye, ndi ba bé kon woñi le bôt ba loñ ba tiga lona lisanda inyule ba bé hémle le Yésu a yé mpôdôl. Nlélém ngéda nyen Satan a tinde ñôma wada le a liibana Yésu. Jôl jé le Yuda Iskariôt. Baéga ba bibase ba bi bôn le ba nti Yuda 30 ma bipes bi silba ibale a nliibana Yésu.

U wé u nsôk hana isi, Yésu a kodba ni baôma bé le ba je Pasa. Kiki a pémés Yuda, ni nye a téé ngim litéak li mondo ba nsébél le Bilôp bi Nwet. A yoñ koga, a ti mayéga, a bek yo, a ti yo 11 baôma ba ba yégle. A kal bo le: “Nyu yem ini, i ntina; boña hala ni hoñlege me mu.” A boñ nlélém ni libôndô li wai, a kal le: “Libôndô lini li yé malômbla ma yondo i matjel mem.”​—Lukas 22:19, 20.

Yésu a bééna ngandak mam i kal baôma bé i u u. A ti bo mbén mondo le ba nlama gwéhna bo ni bo. A kal le: “Hala nyen bôt bobasôna b’a yi le ni yé banigil bem, ibale ni ngwéhna.” (Yôhanes 13:34, 35) Ni nye a kal ki bo le ba kon bañ ndutu i miñem ñwap inyu njiiha i i bé lama lo. Yésu a soohe ngandak inyu yap. Ba tôp tjémbi lôñ ni bo ba pam juu, ba ke i wom u Gétsémané.

I wom u Gétsémané, Yésu a ôm maboñ isi, a soohe Djob ngandak. Hala a nom bé, ntôñ u bisônda, biprisi ni bôt bape ba lo ni bijôl bi gwét i gwel nye. I hôla bo yimbe Yésu, Yuda a kôôge nye bebe, a sambla nye. Kiki banigil ba ntehe le bisônda bi ha Yésu moo, ni bo ba ôt ngwéé.

Yésu a kal le nyen a yé Man Djob i bisu bi bakéés bakeñi ba Lôk Yuda. Jon bakéés ba bagal le a ñôbôs jôl li Djob ni le a kôli ni nyemb. Ni bo ba kena Yésu i bisu bi Ngomén keñi i Rôma le Pôntiô Pilatô. Ndi to hala kii Pilatô a léba le Yésu a mboñ bé béba jam yo kii yo, a timbis nye i môo ma limut li li bé lont le ba nol nye.

Bisônda bi Rôma bi kena Yésu i Gôlgôta, ba tômôl ki nye i ngii kék. Ha nyen hélha jam i bôña le jiibe li kép i ñem njamuha. I masôhôk ma mbus kosi, Yésu a wo, ni hisi hi nyeñg. Ba tééda mim u Yésu ikété soñ ba bi bok i ngok. Kel i bé noñ ha, biprisi bi yip soñ, bi téé ki bôt i manjubul i tat yo. Baa lisuk li Yésu li mbane mu soñ i? Heni. Hélha jam i nloo bihélha gwobisôna i bé lama bôña.

​—Biniigana bini bi nyôñna i bikaat bi Matéô bipes 26 ni 27; Markô bipes 14 ni 15; Lukas bipes 22 ni 23; Yôhanes bipes 12 i pam 19.