Lelaa di nla hôla i bôñgôl Ndap yés Ane?

Hiki Ndap Ane i Mbôgi Yéhôva i mbegel jôl lipubi li Djob. Jon, i ngéda di nyoñ ngaba i pubus maoñ ma, i lémés mo, ni i tibil mo, di ntehe hala kiki bisai bikeñi, ni bañga njel i ti Djob bibégés. Hiki wada wés a nla ha woo mu nson u.

Bana njômbi ñem inyu hôla i pubus Ndap Ane i mbus likoda. I mbus hiki likoda, bilôk bikéé, bôlôm kiki bôda, bi nkon maséé i yoñ ndék ngéda inyu sas ni timbis Ndap Ane mapubi. Ngélé yada hiki sonde, bilia bi nkôndba inyu boñ le i lôôha ba mapubi. Mañ wada, tole nhôla nson, won u ñéga nson u. A mbéna noñ ñañga u bôlô i nlama séla. Bet ba ngwés nit nson u, ba nsas tole ba njôa hisi hi Ndap Ane. Inoñnaga ni kiki ngôñ i nene, bape ba nsas libu, ba ntibil biyééne, ba njôa biluk, biléman, ni biwinda. Bape ki ba nlep binan, ba mpubus mbédgé, ni eñg mbônji. Ngélé yada hiki ñwii, likoda li mpohol kel yada inyu mapubi ma tôbôtôbô. Ngéda di mboñ le yak bon bés ba nit minson mi, di niiga bo i diihe ndap yés bibégés.​—Ñañal 5:1.

Nit bôlô i ngéda ba ntibil Ndap Ane. Hiki ñwii, di nwan Ndap Ane, bañga liwanak, ikété ni i mbédgé, inyu yéñ bahoma ba ñôbi. Ni i njel i, di nla tibil ni bôñgôl Ndap Ane bisu bi ngéda. Di mbem bé le mam ma ôbi i nya y’a boñ le di pémés ngandak moni. (2 Miñañ 24:13; 34:10) Ngéda Ndap Ane i mpôb, ba bôñglak ki yo loñge, i yé homa a kôli inyu bégés Djob jés. Ngéda di nit nson u, di ñunda yaga le di ngwés Yéhôva, ni le di ndiihe homa di kodba inyu bégés nye. (Tjémbi 122:1) Hala a nti yak mbôgi lam i libôga jés.​—2 Korintô 6:3.

• Inyuki di nlama bé nwas Ndap yés Ane mahindi?

• Bimbe bitelbene bi nyôña inyu pubus Ndap Ane?