A bi jôs woñi ni pééna

1-3. (a)  Mambe mam Pétrô a ba mbôgi kel yada? (b) Lelaa a ntégbaha u?

PÉTRÔ a nleñ pagô ni ngui yé yosôna ikété jiibe. Ndi nyoo likôl, a ntehe ndék mapubi. Baa ma yé yimbne le kel i nkahal ye? A nok njôghe i mbus ni i bituu, inyule a nlôôs ngandak ngéda i leñ pagô. Mbebi i yé hôñ, i nyiñghak tuye kayéle mangudga ma mpôgôs môñgô. To hala kiki a nyoo, Pétrô a nke ni bisu i leñ pagô.

² Pétrô ni bana banigil bape ba nyék Yésu nyetama homa wada nyoo i ngwañ tuye. Yokel, ba ntehe Yésu a njés dikôô di bôt njal i bé i gwé, ni ndék bikoga ni ndék tjobi. I limut li bôt li yé ha li nhel, li nsômbôl téé nye kiñe. Ndi Yésu a gwé bé ngôñ i yoñ ngaba ni mam ma m’bô, a nsômbôl bé to le banigil bé ba bôdôl bana nya mahoñol i. Jon a mbat banigil bé le ba jôp i môñgô, ba yap uu ngwañ tuye. Nye a mbet nyetama i ngii hikôa inyu soohe.​—Markô 6:35-45; añ Yôhanes 6:14-17.

³ Ngéda ba njôp i môñgô, sôñ i yé bebee le libôm. Nano, i yé sôs mbeñee mbeñee i pes hiôñk. Ndi ba nla ndik ke ndék kilôméta. Minhuñbe mi mbebi, mangudga ma tuye lôñni waa, bi nti bé bo pôla i kwel. I nene le mahoñol ma Pétrô ma yé haa.

4. Inyuki Pétrô a yé loñge ndémbél?

⁴ Ngandak mam i nlo Pétrô mahoñol! Hala a nloo ñwii ima le Pétrô a bi boma Yésu nu Nasaret. A nigil ngandak mam ipañ yé, ndi a ngi gwé ki ngandak i nigil. A nsômbôl bé le woñi tole pééna bi nkéñ nye njel i nigil. Inyu hala nyen a yé loñge ndémbél. Di tibil le wan ñañ wé.

“Di ntehe Mésia”!

5, 6. Umbe ntén niñ Pétrô a niñ?

⁵ Kekikel, Pétrô a’ hôya bé hilo a boma Yésu. Manyañ Andréa a nlona nye hélha ñwin: “Di ntehe Mésia.” Bibañga bini bi nhéñha niñ i Pétrô. Y’a ba ha bé nlélém.​—Yôhanes1:41.

⁶ Pétrô a niñ i Kapernaum, tison i i yé i ñombok u lom Galiléa. Bo Andréa ba nsal lôñni bon ba Sébédéô le Yôhanes bo Yakôbô, i nson u baloptjobi. Handugi nwaa, Pétrô a nyén ndap yada lôñni nyôgôl wé, ni manyañ Andréa. Inyu jés lihaa likeñi hala ni bôlô i lop tjobi, i mbéda ngandak bôlô, ngui minsôn ni makeñge. Di nhégda le Pétrô a nsoñgol ha bé mau a ntégbaha i tumbba i nson. Baloptjobi ba nleñ pése ipôla môñgô ima, mbus ba ôt yo. Hala a nyoñ ki bo ntandaa ngéda i tep tjobi ni i nuñul tjo, i kôñôl pése ni i jôwa yo.

7. (a) Kii ba ñañle Pétrô inyu Yésu? (b) Inyuki unu ñwin u yé hélha?

⁷ Bibel i ñañle bés le Andréa a bé ndugi nnigil nu Yôhanes Nsôble. I nene le Pétrô a nsédi ôô inyu emble mam manyañ a ñañle nye inyu Yôhanes Nsôble. Kel yada, Andréa a ntehe Yôhanes Nsôble a nand Yésu nu Nasaret hinoo, a kalak le: “Nuna-ki, Man Ntômba Nyambe!” Kunda yada, Andréa a nyila nnigil Yésu, a mpala ki añle Pétrô ñwin nlam unu: Mésia a nlo! (Yôhanes 1:35-40) Mbus matjañg ma bi bôña i wom Eden, bebee le 4 000 ñwii i bisu bi ngéda; Yéhôva Nyambe a bi bôn le mpohlak mut w’a lona bôt ba binam botñem. (Bibôdle 3:15) Kinje jam! Ntohol nyemede nyen Andréa a mboma, Mésia! Yak Pétrô a ñôt ngwéé inyu tehe Yésu.

8. (a) Jôl Yésu a nti Pétrô li nkobla le kii? (b) Inyuki ngim bôt i mpééna le Pétrô a kôli bé ni jo?

⁸ Pétrô a nsébla le Simôn tole Siméôn. Ndi Yésu a nun nye, a kal nye le: “‘U yé Simôn man Yôhanes; w’a séblana le Kéfa’ (hala yé le Pétrô).” (Yôhanes 1:42) “Kéfa” a nkobla le “ngok” tole “liaa.” I mpôôna le i jôl Yésu a yé ti nye li yé ngim mbañ. A ntehe le Pétrô a ga yila kiki liaa, hala wee hémle yé i mba i umi siñ, i mba nledek, ni le a ga hôla ki ngandak banigil ba Kristô. Baa Pétrô a ntehe nyemede hala? I nene le to. Yak basoñgol bahogi ba Bibel ba ntehe bé Pétrô kiki liaa. Ngim bôt i nkal le Bibel i ñunda le hémle i Pétrô i umi bé siñ, ni le a nhéñha mahoñol hiki ngéda.

9. (a) Kii Yéhôva ni Man wé ba mbéñge yak mut binam? (b)  Inyuki u nhoñol le bon ba gwé litehge lilam?

⁹ Pétrô a gwé bibomb. Yésu a nyi hala. Ndik kiki Isañ le Yéhôva, Yésu a mbéñge ndik bilem bilam bi mut. Yésu a ntehe le Pétrô a nla boñ ngandak mam malam, a nhôla nye i hôlôs bilem gwé bilam. Yak i len ini, Yéhôva bo Yésu ba nyéñ loñge i yé ikété yés. Bésbomede di nla kalba le yom ilam i ta bé ikété yés le ba nla léba. Ndi di nlama yi le bon ba gwé litehge lilam, di nlama ki nwas le ba uñgus bés, ni ma bés ndik kiki Pétrô a bi neebe.​—Añ 1 Yôhanes 3:19, 20.

“U kon bañ woñi”

10. (a) Bebeg le Pétrô a bi ba mbôgi i mambe mam? (b) Ndi kii a mboñ?

¹⁰ I nene le Pétrô a nyéga Yésu i likalô. Jon, bebeg le a ntehe hélha jam i bisu ngéda Yésu a nhielel malép wai, i ngand libii i Kana. Jam li yé nseñ li yé le a ñemble loñge ñwin u botñem: ñañ nlam u Ane Djob. Ndi to hala, Pétrô a ntémb i bôlô yé i nloptjobi. Ndi mbus ndék sôñ, Pétrô bo Yésu ba ntémb ba bomna. Yésu a nkal Pétrô le a nwas bôlô, a noñ nye ngélé yada inyu yosôna.

11, 12. (a) Lelaa Pétrô a ntégbaha ngim u i bôlô? (b) Ngéda Pétrô a ñemble Yésu a niiga limut, mambe mahoñol ma nla lo nye ño?

¹¹ Pétrô a ntip tégbaha ngim u i bôlô. Ndi bôlô yé i mba ndumbba yañga. Baloptjobi ba nleñ pése yap i lom ngandak ngélé, ndi ba ngwel bé hiobi to hiada. Bebeg Pétrô a ngwélél yi yé i nloptjobi ni ngandak makeñge inyu gwel tjobi, bebeg yak le ba nleñ pése yap ngandak bahoma. Ndi to hala, ba ngwel bé to yom. Ibale a lak to tehe homa tjobi di sôlne isi lép, tole ibale a lak tinde tjobi le di gwéla ikété pése yé, ki a mboñ hala. Hala a ntééñga Pétrô ngandak. A nlop bé tjobi inyu lôôs ngéda, mu nyen a nkuhul koga kel. Sôk i nsôk, a ntémb i ngwañ lép moo nso. Ndi a nlama ki héya mahindi mu pése yé. Yésu a nkoba nye a yé boñ i bôlô i, ngéda a ntiige nye bebee.

¹² Limut li nkéña Yésu inyu emble biniigana gwé. Kii bôt ba yé ngandak, Yésu a mbet ngii môñgô u Pétrô. A mbat Pétrô le a nyuge môñgô ndék i lom. Kiki a yii i ngii môñgô ndi a podok, lom a mboñ le kiñ yé i nôga haa inyu niiga limut. Pétrô a ntibil sédi ôô inyu emble Yésu, nlélém kiki bôt bobasôna ba yé ha. A nwaa bé emble Yésu a ntoñol ño nkwel u likalô jé, u u yé Ane Djob. Bebeg le Pétrô a nkalba le: “Kinje bisai me nla bana i hôla Kristô i tjam unu ñwin u botñem ikété loñ yosôna! Ndi lelaa m’a tééda lihaa jem.” Bebeg le Pétrô a ntémb a hoñol le a nsal ngim u yañga, a ngwel bé hiobi to hiada, ibale a noñ Yésu i likalô jé, a ga la ha bé tumbba hala inyu lihaa jé.​—Lukas 5:1-3.

13, 14. (a) Imbe hélha jam Yésu a mboñ inyu Pétrô? (b) Kii Pétrô a mboñ?

¹³ Ngéda Yésu a mal niiga limut, a nkal Pétrô le: “Tiigana nyoo lép, leña pése nan, ni gwel tjobi.” Pétrô a ntehe bé nseñ i boñ hala. A nkal Yésu le: “A Soñ, di ntumbba ngim u, di ngwel bé yom; ndi inyu likalak joñ nyen me nléñél pése.” Pétrô a ntip héya mahindi mu pése yé. I pot maliga a gwé bé ki ngôñ i leñ pése yé i lom, téntén nano nu tjobi di nlet i gwel inyule di nhiôm ha bé inyu yéñ bijek. Ndi a nôgôl, a mbat yak i bôt ba nsal ni nye le ba noñ nye.​—Lukas 5:4, 5, MN.

¹⁴ Ngéda Pétrô a mbôdôl ôt pése, a nôgda le i ñét. Ngéda a nkônde ki ôt, a nléba le pése i nhôgôô tjobi. Ni maséé momasôna, a mpeg woo inyu sébél i bôt ba yé i môñgô umpe inyu hôla bo. Ngéda bobasôna ba mbôdôl ôt pése, ba nsôk tehe le môñgô wada u nla bé beege tjobi tjodisôna. Tjobi di yé ngandak kayéle ngéda ba nyônôs môñgô nwo ima, môñgô mi mba bebee ni yin. Jam li, li nyumus Pétrô. A ma tehe Yésu a mboñ bihélha bi mam, ndi lini lisañ, nyen Yésu a bôñôl manyaka. I mut nunu a nla yak ti tjobi oda le di gwéla i pése. Nyuu i nkôp Pétrô disuguu. Pétrô a ñôm maboñ i bisu bi Yésu, a kal le: “A Nwet, nyodi pes me yé, inyule me yé mboñbéba.” Pétrô a ntehe le a kôli bé ba lôñ ni mut nu a gwé kunde i gwélél ngui Djob i nya ini.​—Añ Lukas 5:6-9.

15. Lelaa Yésu a niiga Pétrô i mélés pééna ni woñi?

¹⁵ Yésu a nkal Pétrô ni loñgeñem le: “U kon bañ woñi; ibôdôl hanano w’a ba u nyéñ bôt.” (Lukas 5:10, 11) Ngéda pééna ha bé ini, to ngéda i kon woñi. Pétrô a nlama bok mahoñol mé i bôlô i likalô i i nlôôha nseñ, iloole a kahal tôñ lelaa a ga tééda lihaa jé, tole a kahal hoñol le a gwé bé ngap i gwel nson u likalô. Yésu a gwé nson nkeñi i boñ. Nson u, u ga héñha niñ i bôt. Yésu a ngwélél Nyambe nu “a nwéhél, a yaaba.” (Yésaya 55:7) Yéhôva a ga tééda lihaa li Pétrô, a ti ki nye ngap i téé likalô.​—Matéô 6:33.

16. (a) Lelaa Pétrô, Yakôbô ni Yôhanes ba nleege nsébla u Yésu? (b) Inyuki makidik map ma yé malam kiyaga?

¹⁶ Kiki Yôhanes bo Yakôbô, Pétrô a mpala nôgôl Yésu. Bibel i nkal le: “Ba pamna bañ môñgô nwap i ngwañ, ba yék gwom gwobisôna, ba noñ nye.” (Lukas 5:11) Pétrô a ñunda le a nhémle Yésu lôñni Nwet a ñep Yésu. Hala a yé makidik malam ngandak le a bi yoñ. I len ini, bikristen bi nyémbél woñi ni pééna inyu gwélél Djob. Hala a ñunda le yak bo ba gwé hémle. Yéhôva a ntééda bôt ba mbôdôl nye ñem.​—Tjémbi 22:5, 6.

“U mpéndna kii?”

17. Mambe mahoñol ma nlama lo Pétrô i ño, ñwii ima i mbus le a mboma Yésu?

¹⁷ Bebee le ñwii ima mbus ngéda a mboma Yésu, Pétrô nunu a yé nluk môñgô wé i lom Galiléa, u u ma nsude kiki di ntoñol i bibôdle bi pes ini. Di nyi bé mahoñol ma nhiôm nye ikété ño. Ndi di nyi le a bi ba mbôgi i ngandak mam. Yésu a bi mélés kon u nyôgôl Pétrô. A ti nkwel wé i ngii hikôa, a unda ki ni njel biniigana gwé ni bihélha bi mam le nyen a yé Mésia, mpohlak u Yéhôva. Kiki sôñ i ntagbe, Pétrô a nigil i yémbél woñi wé ni i pééna i mbéna lo nye ñem. Yésu a mpohol yak Pétrô i ba ikété jôm li baôma ni iba. Ndi mam ma nlo i bisu, ma nhôla Pétrô i nok le woñi ni pééna bi ngi yii nye ikété ñem.

18, 19. (a) Kii Pétrô a ntehe i lom Galiléa? (b) Kii Yésu a mbat Pétrô le a boñ?

¹⁸ Ndi ngéda maye ma kel, hala wee ipôla ngeñ 3 ni ngeñ 6; jam li mboñ Pétrô le a waa leñ pagô, a tibil yén. A yé tehe ngim yom ipôla mangudga ma lom. Baa mapubi ma nsôñ mon ma mbai hala i ngii lom? To, mapubi bé ma. I téé bitétéé wengoñle mut. Ñ, mut nu. A yé ke i ngii malép. I mpôôna le a yé kôôge bo bebee. Ñem u mbôô bo matjél, ba nhoñol le ba yé tehe yiinda. I mut nu a nkal bo le: “Bana miñem; ngo me nunu; ni kon bañ woñi.” Ngéda ba ntehe le Yésu nu, miñem mi nsôs bo​—Matéô 14:25-28.

¹⁹ Pétrô a nkal Yésu le: “A Nwet, ibale we nu, sébél me, me lo weeni i ngii malép.” I hélha jam ini i mbôk ndugi i ti Pétrô makénd, a gwé ngôñ i yoñ ngaba mu hélha jam i inyu lédés hémle yé. Ni loñgeñem, Yésu a nkal Pétrô le a loo. Pétrô a mpind munu i ngii môñgô, a téé makôô mé i ngii malép. Hala a yé hélha jam inyu Pétrô inyule malép ma maba isi makôô mé, ma let wengoñle a yé kil i nkoñngii. Maséé ma nyon nye ñem ngéda a ntehe le a yé kil i ngii malép. Ndi hala a nom bé, makénd mé ma nyila jam lipe.​—Añ Matéô 14:29.

20. (a) Kii i nyoña Pétrô, i mbus ha, kii i mpémél nye? (b) Kii Yésu a nkal Pétrô?

²⁰ Pétrô a nlama bok Yésu mis. Yésu nyen a yé i gwélél ngui i Yéhôva inyu boñ le Pétrô a kil ngii malép. Yésu a yé boñ hala inyule Pétrô a nhémle nye. Ndi woñi u nyoña Pétrô. Bibel i nkal le: “Ndi a tehe bañ mbuk mbebi, a kon woñi.” Ngéda Pétrô a mbôdôl nun lelaa mangudga ma mpôgôs môñgô, ma nwehek lihus ni malép i mbebi, woñi u nje nye ñem. I nene le a mbôdôl hoñol lelaa a nla yin munu lom, a wo. Kiki woñi wé u mbet, hala nyen hémle yé i yin. I mut ba bi o jôl le liaa inyule a umi siñ i pes mbuu, nye nunu a nkahal yin wengoñle hibañ le ba nleñ i lép, inyule a nkon woñi. Pétrô a nyi nhoga, ndi a mbôdôl bé ngap yé i hok ñem. A nlôndôl Yésu le: “A Nwet, tohol me.” Yésu a nleñ woo, a gwel nye, a témb a ôt nye i ngii malép. Bo Yésu ba ngi yii i ngii malép ngéda a nkal nye le: “A we nu hémle titigi, u mpéndna kii?”​—Matéô 14:30, 31.

21. (a) Inyuki pééna i yé béba jam kiyaga? (b) Lelaa di nla yémbél pééna?

²¹ “Pééna!” Kinje béba jam! Pééna i nla nôlha mut. Ibale di nwas yo le i hol ikété ñem wés, i nla tômbôs bés i pes mbuu, i boñ ki le di nimis hémle yés ndék ni ndék. Di nlama jo sañ i ngui inyu kolba pééna. Lelaa di nla boñ hala? Ibale di mbok mis més i ngii mam malam, di nla mélés pééna. Ibale di mbok mahoñol més i ngii mam ma nkônha woñi, mam ma ntômbôs bés tole mam ma nla kena bés haa ni Yéhôva bo Yésu, pééna i ga nañ ikété miñem wés. Ndi ibale di mbok mahoñol i ngii Yéhôva bo Yésu, tole i ngii mam ba bi boñ, mam ba yé i boñ, ni mam ba nke i boñ inyu bôt ba ngwés bo, di ga yémbél to imbe pééna i nla tômbôs hémle yés.

22. Inyuki di nla kôna hémle i Pétrô?

²² Ngéda Pétrô bo Yésu ba njôp ikété môñgô, kunda yada mbuk mbebi i, i mal. Lom Galiléa nyensôna a mom nwee. Pétrô ni bana banigil bape ba nkal Yésu le: “We u yé toi Man Nyambe.” (Matéô 14:33) Ngéda kel i nye, Pétrô a bana ngôñ i ti mayéga. A nigil le a nlama bé nwas le woñi ni pééna bi sôña nye i hémle Yéhôva bo Yésu. I yé maliga le a nlama ki héñha ngandak mam ilole a nyila kiki Yésu a bi pot, le a mba kiki liaa i pes i mbuu. Ndi Pétrô a nyoñ makidik ma ngui i kena sañ yé ni mahol mé ni bisu. Baa yak we u nyoñ minlélém mi makidik? W’a tehe le di kôli kôna hémle i Pétrô.