Jimb li di yé maséé i yi

Baa mut a ma kal we ngim jam a nsôô bôt bape?—a Ibale hala, i nya jam i ba nsébél yo le jimb inyule bôt bape ba nyi bé jo. Bibel i mpôdôl “jimb” li tôbôtôbô li nlôl yak Djob. Ba nsébél jo jimb inyule bôt bape ba nyi bé jo. Yak biañgel bi bééna ngôñ i yi i jimb li. Baa yak we u gwé ngôñ i yi jimb li?—

Behee behee, Djob a bi heg munlôm nu bisu ni muda nu bisu. Môl map ma bé le Adam bo Éva. Djob a bi ti bo loñge liyééne ba bé sébél le wom Éden. Ibale Adam bo Éva ba nôgôl Djob, bo ni bon bap ba bé le ba yilha hisi hiosôna paradis kiki wom Éden. Ni ki le ba bé le ba niñ i boga ni boga ikété Paradis. Ndi baa u nhoñol kii Adam bo Éva ba bi boñ?—

Adam ni Éva ba bi ndogbene Djob. Inyu hala nyen di niñ bé ikété paradis i len ini. Ndi Djob a bi kal le a ga boñ le hisi hiosôna hi ba lam, ni le bôt bobasôna ba ga niñ boga ni boga ikété maséé. Lelaa a ga boñ jam li? Inyu ntandaa ngéda, bôt ba bi yi bé. I bé ngim jimb.

Ngéda Yésu a bi lo hana isi, a bi toñle bôt i jimb li. A bi kal le jimb li li mbéñge Ane Djob. Yésu a bi niiga bôt le ba soohe le Ane i, i loo. I Ane i ga yilha hisi hiosôna paradis lam.

Baa u yé maséé i yi i jimb li?— Hoñol le ndik i bet ba nôgôl Yéhôva bon ba ga niñ ikété Paradis. Bibel i ñañle bés miñañ mi bôlôm ni bôda ba ba bi nôgôl Yéhôva. Baa u gwé ngôñ i yi kii ba bi boñ?— Di mbéñge ndég bôt ikété yap, ni lelaa di nla ba kiki bo.