Yérémia a bi waa bé pot i jôl li Yéhôva

Mangéda mape bôt ba ndegle bés tole ba unbene bés ngéda di mpôdôs bo inyu Yéhôva. Hala a nla boñ bés le di bana ha bañ ngôñ i pôdôs bôt inyu mam ma mbéñge Djob. Baa yak we u ma nimis ngôñ i?— Bibel i mpôdôl bés inyu mañge wanda wada nu a bé gwés Yéhôva. Ndi i bi yégle ndég, ki a bi pot ha bé to i jôl li Yéhôva. Jôl jé li bé Yérémia. Di pôdôl ndég mam ma mbéñge nye.

Ngéda Yérémia a bé mañge wanda, Yéhôva a bi kal nye le a béhe bôt le ba boñ ha bañ ki bibéba bi mam. Hala a bé lédél Yérémia ngandak; a kon yak woñi. A kal Yéhôva le: ‘Me nyi bé me hop.Me yé mañge.’ Ndi Yéhôva a kal nye le: ‘U kon bañ woñi. M’a hôla we.’

Jon Yérémia a bi bôdôl béhe bôt le ibale ba nhéñha bé bilem, ki Yéhôva a nkogse bo. Baa u nhoñol le bôt ba bi héñha bilem gwap kiki Yérémia a bi kal bo?— To. Ba bi ndegle nye, ba unbene ki nye. Bape ba bi yéñ le ba nol nye! U nhoñol le Yérémia a bé nôgda lelaa?— A bi kon woñi, a kal le: ‘M’a pot ha bé ki i jôl li Yéhôva.’ Baa a bi mom nwee ni toi?— To, a bi mom bé nwee. A bé gwés Yéhôva kayéle a bé bé le a waa pot i jôl jé. Mu kiki Yérémia a bi mom bé nwee, Yéhôva a bi tééda nye i niñ.

Kiki héga, kel yada, bibéba bi bôt bi bi leñ Yérémia ikété bee ndobo. A bééna bé malép to bijek. I bôt ba, ba bééna ngôñ i nwas Yérémia le a wo mukété. Ndi ni mahôla ma Yéhôva, a bi pamba!

Ndémbél i Yérémia i niiga we kii?— To hala kii a bé kon woñi mangéda mape, a bi waa bé pot i jôl li Yéhôva. Ngéda u mpot inyu jôl li Yéhôva, bôt ba nla ndegle we, tole ba nla unbene we. U nla wo nyu tole u nla kon woñi. Ndi kekikel, u waa bañ pot inyu jôl li Yéhôva. A ga hôla we hiki ngéda, ndik kiki a bi hôla Yérémia.