Yésu a bé manôgla hiki ngéda

Baa hala a ntomb hiki ngéda i nôgôl bagwal boñ?— Masañ mape hala a nlet. Baa u nyi bonje Yésu a bé a nôgôl?— A bé manôgla i pañ Yéhôva ni i pañ bagwal bé. Ndémbél yé i nla hôla we i nôgôl bagwal boñ to ibale hala a ntomb bé. Di pôdôl inyu jam li.

Ilole Yésu a niñ hana isi, a bé ni Isañ, Yéhôva, i ngii. Ndi Yésu a bi bana yak bagwal hana isi. Ba bé sébél bo le Yôsef bo Maria. Baa u nyi lelaa ba bi yila bagwal bé?—

Yéhôva a bi yoñ niñ Yésu i ngii, a ha yo ikété libum li Maria. Hala a bi boñ le Yésu a bé le a gwéé, a niñ hana isi. Hala a bé hélha jam! Yésu a bi nañ i libum li Maria kiki boñge bobasôna ba nañ mabum ma banyañ bap. Mbus yom kiki bo sôñ bôô, Yésu a bi gwéé. Hala nyen Maria bo nlô wé, Yôsef, ba bi yila bagwal ba Yésu hana isi.

Ngéda Yésu a bééna 12 ñwii, a bi boñ ngim jam li ñunda le a bé a ngwés Isañ Yéhôva, ngandak. Jam li li bi tagbe ngéda Yésu ni bôt bé ba lihaa ba bi ke haa letee ni Yérusalem inyu ngant Pasa. Ngéda ba bé ba nhuu, Yôsef bo Maria ba bi léba le Yésu a ta bé ni bo. Baa u nyi hee a bé?—

Yôsef bo Maria ba hoo témb i Yérusalem, ba yéñ Yésu homa nyensôna. Ba bé bé nwee lakii ba bé la bé tehe nye. Ndi mbus dilo diaa, ba léba le a yé i témpel! Baa u nyi inyuki Yésu a bé i témpel?— Inyule nyoo nyen a bé le a nigil mam ma mbéñge Isañ, Yéhôva. A bé a ngwés Yéhôva, a bééna ki ngôñ i nigil lelaa a kônha nye maséé. To ngéda a bi nañ, le a bé ha bé ki mañge, Yésu a bé a nôgôl Yéhôva hiki ngéda. Yésu a bé manôgla yak ngéda hala a bé bé a ntomb inyu yé. A bé manôgla to ibale a bé lama nok ndutu. Baa Yésu a bi nôgôl yak Yôsef bo Maria?— Ñ, Bibel i nkal le a bi nôgôl bo.

Ndémbél i Yésu i niiga we kii?— U nlama nôgôl bagwal boñ, yak ngéda hala a nlet. Baa u ga boñ hala?—