Ba bi tila inyu Yésu

Baa u ntehe bôlôm bana i titii?— Ba yé Matéô, Markô, Lukas, Yôhanes, Pétrô, Yakôbô, Yuda ni Paul. Bôlôm bana bobasôna ba bi niñ i nlélém ngéda ni Yésu, ba tila ki inyu Yésu. Di nigil mam ma mbéñge bo.

Bôt baa, ikété yap, ba bé baôma ba bi añal ñañ nlam lôñni Yésu. Baa u nyi bo baa?— Ba yé Matéô, Yôhanes, ni Pétrô. Matéô bo Yôhanes ba bé yi Yésu loñge loñge. Hiki wada wap a bi tila kaat inyu niñ i Yésu. Ñôma Yôhanes a bi tila ki kaat ba nsébél le Masoola ni maléta maa ba nsébél le Yôhanes bisu, Yôhanes i nyônôs iba, ni Yôhanes i nyônôs aa. Ñôma Pétrô a bi tila maléta ima ma yé ikété Bibel. Ba nsébél mo le Pétrô bisu ni Pétrô i nyônôs iba. Ikété léta yé i nyônôs iba, Pétrô a bi añal lelaa Yéhôva a bi pot kel yada inyu Yésu, kiñ i lôlak i ngii. A kal le: ‘Nunu nyen a yé man wem nu gwéha, me yé maséé ni nye.’

Bana bôlôm bape i titii, yak bo ba niiga bés mam ma mbéñge Yésu ikété bikaat ba bi tila. Wada ikété yap a yé Markô. I nene le a bé ha i ngéda ba bi gwel Yésu, a tehe ki hiki yom i bi pémél nye. Numpe a yé Lukas. A bé dokta. I nene ki le a bi yila kristen mbus nyemb Yésu.

Batila Bibel iba bape ba u ntehe i titii ba bé lôknyañ i mbus i Yésu. Baa u nyi môl map?— Môl map le Yakôbô ni Yuda. I bibôdle, ba bé hémle bé Yésu. Ba bé hoñlak yak le a bi kônt njék. Ndi ba bi sôk ba hémle Yésu, ba yila yak bikristen.

Ntila Bibel nu nsôk u ntehe i titii a yé Paul. Ilole a nyila kristen, jôl jé li bé Saulô. A bé oo bikristen, a boñog ki bo béba ngandak. Baa u nyi kii i bi tinde Paul i yila kristen?— Kel yada, Paul a bé i njel Damaskô, a nok kiñ i nlôl i ngii i mpôdôs nye. Yésu nyen a bé pot! A bat Paul le: ‘Inyuki u ntééñga bôt ba nhémle me?’ Mbus hala, Paul a bi hiel ñem, a yila kristen. Paul a tila 14 bikaat bi Bibel, bôdôl i kaat Rôma ke pam i kaat i Lôk Héber.

Di ñañ Bibel hiki kel, hala nga?— Ngeñ di ñañ Bibel, di nigil ngandak mam inyu Yésu. Baa u gwé ngôñ i kônde yi mam ma mbéñge Yésu?—