Bégés Yéhôva ni ndap yoñ lihaa

Kiki u nigil munu man kaat nunu, Bibel i gwé ngandak matiñ inyu hôla we ni lihaa joñ. Yéhôva a nsômbôl le u niñ ikété maséé. A mbôn le ibale bibégés inyu yé bi yé jam li bisu i niñ yoñ, “gwom bini gwobisôna gw’a kôndnana” we. (Matéô 6:33) Yéhôva a nsômbôl le u ba toi nye liwanda. Jon, gwélél manjel momasôna inyu lédés maada moñ ni Djob. Bisai bipe bi nloo bi, bi ta bé.​—Matéô 22:37, 38.

1 LÉDÉS MAADA MOÑ MALAM NI YÉHÔVA

JAM BIBEL I NKAL: Yéhôva “a nkal ki le, m’a ba bé isoñ, bé ki n’a ba me bon ba bôlôm ni ba bôda.” (2 Korintô 6:18) Djob a ngwés le u ba nye banga liwanda. Masoohe ma yé njel yada i boñ hala. Jon, Yéhôva a nkal we le, u “nwas bañ i soohe.” (1 Tésalônika 5:17) A yé bebee i emble we ngéda u ntoñol mam ma yé toi we ñem ni ma ma ntééñga we mahoñol. (Filipi 4:6) Ngéda u nsoohe ni lihaa joñ, ba ga tehe le Djob a yé toi kiki Isañ woñ.

U pôdôs ndigi bañ Djob, ndi yak we emble nye ngéda a mpôdôs we. U nla boñ hala ni njel yigil i Bañga i Djob ni i bikaat bi ntoñol Bibel. (Tjémbi 1:1, 2) Yoñ ngéda i tibil nok yom u nigil. (Tjémbi 77:12, 13) Ke ki i makoda ma bikristen hiki ngéda inyule hala a yé njel ipe inyu emble Djob.​—Tjémbi 122:1-4.

Jam lipe li li nlôôha ba nseñ inyu lédés maada moñ ni Yéhôva li yé le, u añle bape njee a yé. Kii u ga tibil boñ hala, hala ki nyen u ga nôgda le u nkônde kôôge Yéhôva bebee.​—Matéô 28:19, 20.

JAM U NLA BOÑ:

• Téé ngéda hiki kel inyu nigil Bibel ni soohe

• Hôla lihaa joñ i bii mam ma mbuu i bisu bi mangéda ma mintuk, ni ma minjôha

2 NI KON MASÉÉ I NGÉDA BIBÉGÉS BI NDAP LIHAA

JAM BIBEL I NKAL: “Kôôgana bebee ni Nyambe, ndi yak nye a kôôge bé bebee.” (Yakôbô 4:8) Téé hilo ni ngeñ lihaa jolisôna li nkodba inyu bégés Yéhôva. Hiki ngéda, ni noñ ngeñ ni ntéé. (Bibôdle 18:19) Ndi hala a kôli bé. Djob a nlama ba ikété niñ nan hiki kel. Inyu lédés maada ma lihaa joñ ni Djob, pôdôs bo inyu yé “ngéda u yii i ndap yoñ, ni ngéda u yé nlôm njel, ni ngéda u nañal, ni ngéda u ntelep.” (Ndiimba Mbén 6:6, 7) Yoñ makidik kiki Yôsua, nu a bi kal le: “Ndi i pes yem ni ndap yem, bés d’a gwélél Yéhôva.”​—Yôsua 24:15.

JAM U NLA BOÑ:

• Ni téé hilo inyu kwélél mam ma tôbôtôbô ma ntihba hiki wada ikété ndap lihaa