PES 6
Man ba bi bôn
BA NKWEE YÉSU; I MBUS BA NKENA NYE I TÉMPEL
Yôsep bo Maria ba nyégle i Bétléhém, ba ntémb bé i Nasaret. Ngéda Yésu a mpam dilo juem, ba nkwee nye inoñnaga ni Mbén Djob a ti Lôk Israel. (Lôk Lévi 12:2, 3) I kel i nyen ba bééna lem i ti bon bôlôm môl. Yôsep bo Maria ba ño man wap jôl le Yésu, kiki Gabriel a bi kal bo.
Ngim sôñ i ntagbe, Yésu a mbolna 40 ma dilo. Hee bagwal bé ba nkena nye? I témpel i Yérusalem, i i yé i ndék kilôméta ni i homa ba nyééne. Mbén i bé nkal le 40 ma dilo i mbus ligwéé li man munlôm, nyañ a nlama ke i témpel i ti sesema inyu pubus nyemede.—Lôk Lévi 12:4-8.
Maria a mboñ hala. Kiki sesema, a nlona diuuna diba. Hala a ñunda bés likala li niñ Yôsep bo Maria ba bééna. Mbén i bé kal le ba nla ti man ntômba tole hinuni hiada i sesema. Ndi ibale nyañ a nla bé ti gwo, diuuna diba di nla kola. Hala nyen Maria a mboñ, inoñnaga ni bigwel moo gwé.
I témpel, mañ mut u nkôôge Yôsep bo Maria bebee. Jôl jé le Siméôn. Djob a bi yeelene nye le ilole a nwo, a’ tehe Kristô tole Mésia Yéhôva a bi bôn. I len ini, mbuu mpubi u ñéga Siméôn i témpel, het a nkoba Yôsep bo Maria ni nkéñéé wap man munlôm. Siméôn a nyoñ man i moo méé.
Mu kiki a bééga man, Siméôn a nti Djob mayéga, a nkal le: “Nano, a Nwet Bayemlikok, nwahak le nkol woñ u ke ni nsañ inoñnaga ni lipôdôl joñ, inyule mis mem ma mal tehe nu a yé njel tohi, nyen u bi kôôba inyu boñ le matén momasôna ma tehe nye, nyen a yé mapubi inyu héya jiibe i mis ma biloñ, a yé ki lipém li litén joñ Israel.”—Lukas 2:29-32.
Yôsep bo Maria ba yé nhelek i nok hala. Siméôn a nsayap bo, a kal Maria le lok yé i ‘ntééba inyu boñ le ngandak bôt i Israel i kwo, i telep ki’ ni le ndutu y’a kan nye ñem kiki pansoñ.—Lukas 2:34.
Mut numpe a yé i témpel yokela. Ana nu, mpôdôl muda nu a gwé 84 nwii. Ndi, kel to yada a tôl bé i témpel. Nano, a nkôôge bebee ni Yôsep bo Maria ni Yésu, a tinak Djob mayéga, a bogok ki Yésu mbôgi ipañ bôt bobasôna ba yé ha.
Ni nla hoñol lelaa Yôsep bo Maria ba nkon maséé ni mam ma ntagbe i témpel. I pot maliga, mam ma mômasona ma nkwés bo nkaa le man wap a yé toi i Nwet Djob a mbôn.