Baa mut a yé le a boñ loñge jam i kel sabat?

Yésu a nsal ngandak mu nson wé likalô i Galiléa. Ndi, i ngéda a nkal le: “Me nlama ki añle bitison bipe ñañ nlam u Ane Nyambe,” Yésu a nhoñol bahoma bape, he Galiléa nyetama bé. Inyu hala nyen a nke ‘añal mu mandap ma bibégés ma Yudéa.’ (Lukas 4:43, 44) Hala a nôga inyule di mpam nano i sôñ Matumb, ndék ngéda wee ngand i mba i Yérusalem.

Bikaat di mbéna sébél le Miñañ minlam bi mpôdôl ngandak inyu nson Yésu i Galiléa iloo kiki bi mpot inyu nson wé i Yudéa. To hala kiki libim li bôt ikété nkoñ Yudéa li gwé bé ngéda ni likalô jé, hala a ntômbôs bé Yésu, a nke ndik ni bisu i añal ñañ nlam ni boñ ngandak mam malam mu nkoñ u.

Yésu a nke nano i Yérusalem, tison tôbôtôbô i Yudéa, inyu tégbaha ngand Pasa i nwii 31 N.Y. Titimba yada i yé bebee ni Nwemel i mintômba, i ban-ga mabebe ni mbiñ. Ba nsébél i titimba i le Bétésda. Ngandak bakokon, bôt ba ndim, ni bibôk bi bôt, bi nlo mu titimba i. Inyuki? Inyule bôt ba nhémle le ba nla mbôôp ibale ba nogop mu i ngéda malép ma mpuñgla.

I kel Sabat, Yésu a ntehe mut ipañ titimba. I mut nu a nkon hala a yé 38 nwii. Yésu a mbat nye le: “Baa u nsômbôl témbna mbôô woñ?” Nkokon a ntimbhe nye le: “A isañ mbai, me gwé bé mut a njubus me ikété malép ngéda malép ma ntuñgla, ndi ngéda me nyéñ jôp, mut numpe a mbôk me i bisu.”​—Yôhanes 5:6, 7.

Yésu a nkal jam li nlama hélés mut nu, ni ba bobasôna ba yé ha. Yésu a nkal le: “Telep, yoñ nañi yoñ, kenek.” (Yôhanes 5:8) Ni nye a mboñ ndigi hala. Kunda yada, a mbôôp, a bada nañi yé a kahal ke!

Iloole ba kon maséé ni hélha jam i mbôña, Lôk Yuda i nkal nye le: “Kel Sabat ini, i ta bé we kunde i begee nañi.” I mut nu a ntimbhe bo le: “I nlélém mut u mélés kon wem, won u nkal me le: ‘Bada nañi yoñ, kenek.’” (Yôhanes 5:10, 11) I Lôk Yuda ini, i neebe bé le ba mbuubaha mut i kel Sabat.

Ba mbat nye le: “Njee a nkal we le, ‘yoñ nañi yoñ, kenek’?” Inyuki ba mbat nye hala? Inyule ba ntehe ha bé Yésu ikété limut, ni le i mut ba mbuubaha a nyi bé jôl li Yésu. (Yôhanes 5:12, 13) Ndi i mbus ngéda, ikété témpel i mut nu a ntiimba boma Yésu, a yi jôl li mut a bi mbuubaha nye i titimba.

I mut ba mbuubaha a nkoba Lôk Yuda i i bi bat nye mambadga inyu mbôô wé. A nyis bo le Yésu nyen a mbuubaha nye. I ngéda ba nok hala, Lôk Yuda i nke tehe Yésu. Baa ngôñ yap i yé le ba yi lelaa Yésu a mboñ lini jam li nlôôha lilam? Heni. Ba nsômbôl ndik ôm Yésu nsohi inyule a mboñ loñge jam i kel Sabat. Ba mbôdôl yak tééñga nye!