Yésu a mômôs mbebi i tuye

Yésu a yé nwaak, a ntégbaha kel yosôna i bôlô. Kiki kôkôa i nkwo, a nkal banigil le: “Loga, di yap nyoo uu ngwañ tuye,” ii pes i Kapernaum.​—Markô 4:35.

Gérasa a yé i pes likôl i tuye Galiléa. Ba nsébél ki libôga li le Dékapôli. Bitison bi Dékapôli bi yé bitison bi tôbôtôbô bi Lôk Grikia, to hala kiki ngandak bôt i Lôk Yuda i nyééne nyoo.

Bôt ba nyi le Yésu a nyodi i Kapernaum. Yak môñgô mimpe mi yé lela lép ni bo. (Markô 4:36) Liké jap li ta bé ntandaa. Tuye Galiléa a yé soso yimb malép, pôk yé i yé 12 kilôméta, a bak mbôñgô 21 kilôméta.

To hala kiki Yésu a yé peles, nson wé u ntômbôs nye. Jon i mbus le môngô u nyodi, a nyéñ homa i môñgô, a nañal, a bii ño wé i ngii mbôñga, a kahal ke hilo.

Ngandak baôma i Yésu i nyi luk môñgô, ndi lini liké li ta ba bé bo jam li ntomb. Tuye Galiléa a nlék, a gwé ki dikôa mbok yosôna. Ngim mangéda mbebi i nsune i mbomna ni mbebi i nlék, hala a mboñ le mbuk mbebi keñi a nhôñ ngii tuye. I jam li jon li yé tagbe nano. Môñgô u nkahal yon ni malép inyule mangudga ma mbép mu. Ba yé “bebee ni yin.” (Lukas 8:23) To hala, Yésu a yé hilo!

Baluk môñgô ba mboñ biliya, ba ngwélél yi yap inyu kena môñgô. Ndi lini lisañ mam ma yé mahéñha. Mu kiki ba nkon woñi inyu biniñ gwap, ba nke tôdôl Yésu, ba kalak le: “A Nwet, tohol bés, ngo di nlo wo!” (Matéô 8:25) Banigil ba yé kon woñi le ba nyin!

Kiki Yésu a ntôde a nkal baôma le: “Inyuki ni nkon woñi hala, a bé bôt ba hémle titigi?” (Matéô 8:26) I mbus Yésu a nkônd mbebi ni tuye: “Hogbe! Mom nwee!” (Markô 4:39) Kunda yada, mbuk mbebi a mal, yak tuye a mom le nwee. (Markô bo Lukas ba nkal ndugi le Yésu a mômôs mbuk mbebi, i mbus ba mpôdôl inyu ngi hémle i banigil.)

Hégda jam banigil ba nôgda! Ba ntip tehe tuye a nyiñgha ni ngui, i mbus a mom le nwee. Woñi keñi u ngwel bo. Ba nkahal kalna bo ni bo le: “Njee mut yaga nunu? Ngo yak mbebi ni tuye bi nôgôl nye.” Sôk i nsôk, ba mpam ii pes i ngwañ i tuye ngi mbabaa yo ki yo. (Markô 4:41–5:1) Bebek mii môñgô mimpe mi bak i tuye mi mpam ii pes i tuye.

Kinje jam lilam i yi le Man Djob a mbémbe bihégél bi ngiinda! I ngéda a mba a ñénél isi, bôt bobasôna ba mba ikété nsañ, bikuu bikeñi bi ga ba ha bé!