A mbôôp inyule a ntihba mbot Yésu

Lôk Yuda i i yiine bebee ni hiông i ngwañ tuye Galiléa i nok le Yésu a nlôl i Dékapôli. Hala ki nyen ngandak i nok le Yésu a bi mômôs mbebi ni malép, ngandak i nok ki le a bi pémés bôt mimbuu mimbe. Jon “limut likeñi” li nkodba ngwañ tuye, i tison i Kapernaum inyu leege Yésu. (Markô 5:21) Ba yé i bem nye ni makénd mu kiki a yé sôs i môñgô.

Wada ipôla i bet ba nyamnda ni ngôñ i tehe Yésu a yé Yairô, nkena base wada, bebek i Kapernaum. A nkwo makôô ma Yésu, a soohe nye ngandak ngélé, a kalak le: “Hingongonda hiem hi nkon ngandak. Soho, lo kéhi moo i ngii yé inyu boñ le a mbôôp le ndi a niñ.” (Markô 5:23) Yairô a gwé ngôñ le Yésu a hôla pom yé ngond i i gwé ndik 12 nwii, lelaa Yésu a ntimbhe nye?​—Lukas 8:42.

Mu njel kiki ba yé ke yak Yairô, Yésu a mboma jam li li ntihba nye ngandak. Ngandak bôt i i yé ni Yésu i mbadba too ba ga tehe nye a mboñ ki hélha jam ipe. Ndi ikété limut, muda wada a gwé ngwa kon u u ntééñga nye.

Hala a yé 12 nwii le i muda Lôk Yuda nunu a mpam matjél. A nyéñ mahôla ipañ ngandak bidokta, a sem gwom gwobisôna a bak a gwé, ndi to ndék hogbe a bi kôhna bé. Maselna ni hala, kon u bé “nai ndik nnayak.”​—Markô 5:26.

Di nla nok le kon wé u nwéés ndik bé nye, ndi u nwéha ki nye nyuu. Ba mbéna bé pôdôl wo i ti bôt. Jam lipe li yé le inoñnaga ni Mbén Môsi, muda nyensôna nu a mpam matjél a yé nyega. Nu ni nu a ntihba nye tole mbot yé a nlama nogop, a yé ki nyega i pam kôkôa.​—Lôk Lévi 15:25-27.

I muda nu, “a bi nok miñañ inyu Yésu” a bôdôl yéñ nye. Inyu libak jé li nyega, a ntoñ njel ipôla bôt ibabé le ba yimbe nye, a kalak mu ñem wé le: “Ibale me ntihba to mambot mé, m’a mbôôp.” Ngéda a bi tihba linjek li bot Yésu, kunda yada a nôgda le matjél ma nkidi nye! A nôgda “le béba yé kon i mal.”​—Markô 5:27-29.

Yésu a mbat le: “Njee a ntihba me?” U nhoñol le kii muda a nôgda ngéda a nok ini mbadga? Pétrô a nkal Yésu le: “Limut li nkéña we homa nyensôna, li nhige ki we.” Ndi inyuki Yésu a mbat le: “Njee a ntihba me?” Yésu a ntoñol le: “Mut a ntihba me, inyule me nyi le ngui i nyodi ikété yem.” (Lukas 8:45, 46) Ntiik, i ngui i mpémél yak Yésu yon i mbuubaha muda nu.

A tehe bañ le i jam a mboñ li nyiba, ni woñi a nkwél Yésu makôô a sehlaga. Bisu bi bôt bobasôna a mpot maliga inyu kon wé ni le a ntip mbôôp. Ni loñgeñem, Yésu a nhôgbaha nye, a kal nye le: “A ngond yem, hémle yoñ i mélés kon woñ. Kenek ni nsañ, i béba kon ini i tééñga ha bañ ki we.”​—Markô 5:34.

I pot maliga, i Nwet Djob a mpohol inyu éga isi a yé mut liyômba ni ngôô nu a ntôñ ndik bé bôt, ndi a gwé ki ngui i hôla bo.