PES 51
Ba nol mut i kel ngand ligwéé
MATÉÔ 14:1-12 MARKÔ 6:14-29 LUKAS 9:7-9
HÉRÔDÉ A MBAT LE BA KIT YÔHANES NSÔBLE ÑO
Baôma ba Yésu ba yé téé likalô i Galiléa, ndi i mut a bi kôôbana Yésu njel a gwé bé pôla i. Hala a yé nwii ima le Yôhanes Nsôble a yé mok.
Yôhanes a bi yelel béba i Kiñe Hérôdé Antipas a bi boñ kiki a bi yoñ Hérôdia nwaa manyañ le Filipô. Hérôdé a bi bos nwaa wé nu bisu inyu bii Hérôdia. Inoñnaga ni mbén Môsi i Hérôdé a nkal le a noñ, libii lini li yé maada ma ndéñg, li mbôk mbén. Inyu timbhe Yôhanes, Hérôdé a nleñ nye i mok, bebek inyule Hérôdia a nkal nye le a boñ hala.
Hérôdé a nyi bé kii a boñ Yôhanes inyule litén li ‘ntehe nye kiki mpôdôl.’ (Matéô 14:5) Ndi Hérôdia a nyi jam a nsômbôl. A ‘ntéédana [Yôhanes] hiun.’ I pot maliga, hala a yé ndék ngéda le a nyéñ nol nye. (Markô 6:19) Sôk i nsôk pôla i nene.
Ndék ngéda bisu bi Pasa i nwii 32 N.Y., Hérôdé a naña ngand i ligwéé jé. Bôt ba ngomin ni baénél bobasôna ni bisônda bi Hérôdé, yak bôt ba tôbôtôbô ba Galiléa ba nkodba inyu lôôs ngand. Mu kiki ngand i yé i tagbe, ba naña Salômé, ngond Hérôdia a bi bana ni Filipô i sak inyu bakén. Bôt ba yé maséé ni masak mé.
Kiki ngond yé i nkônha nye maséé, Hérôdé a nkal nye le: “Bat me to kii u ngwés, m’a ti we yo.” A kumul nye soñ: “To kii u mbat me, m’a ti we yo, letee ni pes i ane yem.” Nwaa le a ntimbhe, Salômé a nke a bat nyañ le: “Kii me bat?”—Markô 6:22-24.
I ngéda ini yon Hérôdia a bemek! A mpala timbhe le: “Ño u Yôhanes Nsôble.” I bitéé bilôñi, Salômé a ntémbna Hérôdé ndimbhe: “Me nsômbôl le nano nano, u ti me ño u Yôhanes Nsôble i nleha pan.”—Markô 6:24, 25.
Hala a ntééñga Hérôdé ngandak, ndi bakén bé ba nok mbônga a mboñ Salômé. A nôgda le a yé nyégsaga i yônôs wo, to ibale hala a nkobla le a nlama nol mut nu a yé ngi nsohi. Jon, Hérôdé a ñep ntat wé i mok inyu nol Yôhanes. Ndék ngéda i mbus, ntat a nlona ño ikété pan. A nti wo Salômé nu a nkena wo yak nyañ.
Ngéda banigil ba Yôhanes ba nok i jam li ntagbe, ba nlo ba yoñ mim inyu jô wo. I mbus, ba ñom Yésu nwin.
I mbus ngéda, kiki Hérôdé a nok le Yésu a mbuubaha bôt, a pémhak mimbuu mimbe, a nkon woñi. A mbôdôl badba ibale i mut a mboñ mam ma, a ta bé Yôhanes Nsôble nu “a ntuge” ikété bawoga. (Lukas 9:7) Jon Hérôdé Antipas a gwé ngôñ i tehe Yésu inyu yi too i jam a nhoñol li yé maliga tole to.