Yésu a nti baôma bé maéba mape

Yésu a ntip unda libak banigil bé ba nlama bana. Ba nlama tehe bomede kiki boñge batitigi, bôt ba suhulnyuu, ba ba nyéñ bé mam makeñi. Ibale banigil ba ‘nleege boñge batitigi bana i jôl li Yésu, wee ba nleege yak Yésu.’​—Matéô 18:5.

Baôma ba bi bôk ba bana pééna inyu yi njee ipôla yap a yé nunkeñi, bebek jon ba nla yoñ bibañga bi Yésu kiki bikodlene. Nano, ñôma Yôhanes a nkal Yésu ngim jam i ntip ntagbe: “Di bi tehe mut wada a ngwélél jôl joñ inyu pémés mimbuu mimbe, ndi di bi noode sôñga nye inyule a noñ bé bés.”​—Lukas 9:49.

Baa Yôhanes a nhoñol le baôma botama bon ba gwé kunde i mbuubaha bôt ni i pémés mimbuu mimbe? Ibale hala, kii i mboñ le i man Lôk Yuda nunu a pam i pémés mimbuu mimbe? I nene le Yôhanes a nhégda le i mut nu a kôli bé i boñ bihélha bi mam inyule a nkiha bé lôñ yada ni Yésu ni baôma bé.

Yôhanes a nhel i ngéda Yésu a nkal le: “Ni noode bañ sôña nye, inyule mut nye ki nye a nla bé boñ hélha jam i jôl jem, i mbus, a pala pot jam libe ikolba me. Inyule nu ni nu a nkolba bé bés a yé i pes yés. Yak nu ni nu a nti bé libôndô li malép ma nyo inyule ni yé banigil ba Kristô, me nkal bé maliga le: A yé mbén i nimis bibom gwé.”​—Markô 9:39-41.

Ha ngéda i, i bé bé nseñ le mut nu a kiha ni Yésu inyu ba i pes yé. Ntôñ u bikristen u bé ngi gwéé, jon ibale mut nu a nkiha bé ni Yésu, hala a nsômbôl bé kal le a nkolba nye tole a nit nkoda base. I mut nu a nhémle toi Yésu, inyu hala nyen bibañga bi Yésu bi ñunda le a ga nimis bé bom yé.

Jam lipe yé le, ibale mut nu a mbaage inyu maboñok ni bipôdôl bi baôma, hala a mba ndutu. Yésu a ñunda le: “Nu ni nu a mboñ le mut wada a baage ipôla bôt batitigi bana ba nhémle, i yé nseñ inyu yé le ba yoñ ngok kôgôl jakas li nkiiñaha, ba kañ nye yo i joo, ba leñ nye ikété tuye.” (Markô 9:42) Yésu a nke ni bisu i kal le banigil ba nlama héya yom yosôna i yé bo nseñ kiki woo, kôô tole jis ibale bi mboñ bo le ba baage. I yé nseñ le u bana bé gwom bi, ndi u jôp i Ane Djob, iloole u bana gwo ndi u tjiba i Géhéna (nsôsôgô u Hinom). Baôma ba bi tehe nsôsôgô u bebee ni Yérusalem i het ba bé ligis binan, jon ba nla tibil nok le hala a nkobla tjiba i boga.

Yésu a mbéhe ki le: “Yoña yihe le ni yan bañ to mut wada ikété bôt batitigi bana, inyule me nkal bé le biañgel gwap nyoo i ngii bi ntehe su u Tata wem . . . hiki ngéda.” Letee ni limbe likala “bôt batitigi bana” ba yé tik i mis ma Isañ wé? Yésu a añal ñañ u mut a bééna 100 mintômba, ndi a nimis wada mu. Yésu a nkal le mut nu a nyék ini 99 mintômba inyu ke yéñ ntômba u bi nimil. Ngéda a nléba wo, a nkon maséé ni wo iloo ni ini 99. Yésu a nkônde le: “Tata wem nu a yé i ngii a ngwés bé le mut to wada ikété bana bôt batitigi a tjiba.”​—Matéô 18:10, 14.

Bebek kiki a nhoñol nkwel u baôma bé inyu yi njee a nlama ba nunkeñi, Yésu a nkal le: “Ni bana bas ikété nan, ni téédaga ki nsañ ipôla nan.” (Markô 9:50) Bas i  nlémés bijek. Nlélém, i ngéda bibañga bi yé nnéhak ni bas, ba mpala neebe gwo, bi nla hôla le nsañ u ba, i jam jomol li mboñ bé.​—Kôlôsé 4:6.

I nla pam le mindañ mi kwoo, Yésu a ñunda lelaa ba nla sañgal nwo. A nkal le: “Ibale manyuñ a mboñ we béba, ke yelene nye béba yé bé bo iba ndigi. Ibale a ñemble we, wee u ntémbna nye i loñge njel.” Ndi ibale a ñemble ni bé we? Yésu a mbéhe le: “Yoñ mut wada tole bôt iba ni we inyu boñ le ni njel mbôgi i bôt iba tole baa, pééna yo ki yo i ba bañ.”Ndi ibale nkaa u mbaglana bé, “kal likoda.” Hala wee mimañ mi mi nla bagal jam li. Ndi ibale to hala, mboñbéba a ñemble bé? “Wee yoñ nye kiki mut matén ni kiki nkottas,” nya bôt Lôk Yuda i nléñél bé.​—Matéô 18:15-17.

Mimañ mi likoda mi nlama nôgôl Bañga i Djob. Ibale ba nôgda le mboñbéba a gwé ngôñ ni mahôla, i jam b’a téñ jon ‘l’a tiña ngii.’ Ndi ibale ba ntehe le a mboñ bé jam, hala a ga ‘hohlana ngii.’ Maéba mana ma ga ba nseñ i ngéda likoda li bikristen li ga tééba. Inyu hala, Yésu a nkal le: “I homa bôt iba tole baa ba nkodba i jôl jem, me yé ipôla yap.”​—Matéô 18:18-20.