Nseñ u nwéhél

Pétrô a nok Yésu a ntoñol le inyu sañgal mindañ ni manyuñ, u nlama ndugi ke u kwel ni nye bé boba. Ndi i nene le Pétrô a nsômbôl yi ngélé yañen a nlama boñ biliya bi.

Pétrô a mbat le: “A Nwet, ngélé yañen me nlama nwéhél mankéé ngéda a mboñ me béba? Baa letee ni ngélé isaambok?” Baéga base bahogi ba niiga le ba nlama nwéhél letee ni ngélé aa. Jon Pétrô a nhoñol le a mba loñge ngandak ibale a nwéhél maasañ “ngélé isaambok.”​—Matéô 18:21.

Biniigana bi Yésu bi ñunda bé le mut a nlama añ dihôha manyañ a mboñ nye. Jon inyu kodol Pétrô, Yésu a nkal nye le: “Me nkal we le, ha letee ni ngélé isaambok bé, ndi letee ni môm masaambok ma ngélé ni isaambok.” (Matéô 18:22) Hala a nkobla ki le mba ni mba. Ngéda Pétrô a nwéhél lôk tata yé, a nlama bé bana ngim nwaa.

Yésu a nti Pétrô ni baôma bape hihéga hi hi ñéba inyuki ba yé nyégsaga i nwéhél. Hi mbéñge nkol u u ntjél kôna nwet wé bôlô. Kiñe yada i nsômbôl yoñ ñañga u bagwelnson bé. Ba nlona nye nkol u u mbédél nye 60 000 000 ma dinariô. Nkol u nla bé saa i sôso pil u, jon kiñe i nkal le ba nuñul nye, nwaa ni bon inyu saa pil. Ha ngéda i, nkol u nkwo makôô ma kiñe u kahal soohe le: “Hônba me, m’a saa pil wem wonsôna.”​—Matéô 18:26.

Konangoo i ntinde kiñe i nwéhél nye sôsô pil wé. Kiki kiñe i nwéhél nye, a nke koba so nkol wé wada u u mbédél nye 100 dinariô. A ngwel so nkol wé, a ha nye moo i joo, a kal nye le: “Saa pil wonsô me mbat we.” Ndi so nkol wé u nkwo isi u soohe nye le: “Hônba me, m’a saa pil wem.” (Matéô 18:28, 29) Ndi nkol kiñe i bi nwéhél u ntjél kôna nwet wé bôlô. A nha so nkol wé i mok, ndi ki i yé le i moni kiñe i nwéhél nye mi nloo mi a mbat so nkol wé.

Yésu a nkal le mii minkol mimpe mi tehe bañ i ngitelepsép i, ba nke ba kal nwet bôlô. Ni hiun, nwet bôlô a nsébél nkol u u ñunda bé konangoo, a nkal wo le: “A béba nkol unu, me bi nwéhél we pil woñ wonsôna ngéda u bi soohe me. Baa yak we u bak bé le u kon so nkol woñ ngoo kiki me bi kon we ngoo?” Ni nwet a ñunup a nti nye batééñga bôt letee a saa pil wonsôna. Yésu a nsok kal le: “Hala yaga nyen Tata wem nu ngii a’ boñ hiki wada nan nu a nwéhél bé maasañ ni ñem wé wonsôna.”​—Matéô 18:32-35.

Kinje biniigana bilam inyu nwéhél! Djob a nwéhél mahôha més i nya i nloo héga. Ibale di nhégha jam mankéé i pes mbuu a nla boñ bés, d’a léba le li yé péda iloo dihôha di nhuhul Djob. Yéhôva a nwéhél ndik bé bés ngélé yada, ndi dikôô di ngélé. Baa yak bés di nla bé nwéhél mankéé wés ngandak ngélé, to ibale di gwé njom i ntinde bés i unbene nye? Kiki Yésu a bi niiga i Nkwel wé i ngii hikôa, Djob a ga “nwéhél . . . bés mapil més, kiki yak bés di nwéhél bôt di mbédél mapil.”​—Matéô 6:12.