Yésu a ñom 70 banigil i téé likalô

Di yé nano lisuk li nwii 32 N.Y., nwii maa i mbus sôble i Yésu. Nye ni banigil bé ba ntip tégbaha ngand Bilap i Yérusalem. Bebek ba nginda yii bebee ni tison. (Lukas 10:38; Yôhanes 11:1) Yésu a ntégbaha sôñ isamal i nsôk i téé likalô i Yudéa tole i Péréa ii pes i Lom Yordan. Yak mu mabôga ma, bôt ba gwé ngôñ ni likalô.

Ndék ngéda bisu, i mbus Pasa 30 N.Y., Yésu a bi tégbaha ngandak sôñ i téé likalô i Yudéa ilole a ntagbe i Samaria. I Yérusalem, Lôk Yuda i bé sômbôl nol nye i Pasa 31 N.Y. Jam kiki bo nwii wada ni pes, Yésu a bi niiga téntén i ñombok u Galiléa, ngandak i bi yila banigil bé. Yésu a bi niiga baôma bé, a om ki bo ni bini biniigana le: “Ni téé likalô, ni kalak le: ‘Ane i ngii i nkôôge bebee.’” (Matéô 10:5-7) Nano a ntjek hônd likalô i Yudéa.

Inyu bôdôl hônd likalô i, Yésu a mpohol 70 banigil, a om bo iba iba, inyu ke libôga, i het “libumbul li yé likeñi ndi basal bôlô ba yé ndék.” (Lukas 10:2) Ba nke ndugi bitison het Yésu a nlama tiimba ke. I 70 ma batéé likalô ba, ba mélés makon, ba tjamak nlélém ñañ Yésu a bé añal.

Banigil ba Yésu ba niiga bé i mandap ma bibégés. Yésu a nkal bo le ba kee mandap, a mbéhe ki bo le: “Hiki ndap ni njôp, kala ndugi le: ‘Nsañ u ba ni ndap ini.’ Ibale liwanda li nsañ li yé mu, nsañ nan w’a ba i ngii yé.” Nwin wap u yé le kii? Yésu a nkal le: “Ni kalak bo le: ‘Ane Nyambe i ntiige bebee ni bé’”​—Lukas 10:5-9.

Biniigana Yésu a nti 70 banigil bi yé minlélém ni bi a bôk a ti baôma 12 hala a yé nwii wada i ngéda a bi om bo likalô. A mbéhe bo le bôt bobasôna b’a leege bé bo loñge. Ndi likalô jap li ga kôôba njel kayéle ngéda Yésu a’ loo, ngandak i ba bebee i leege Malét ni i kôhna biniigana gwé.

l mbus ndék ngéda, 70 batéé likalô ma ntémb yak Yésu ni maséé, ma nkal nye le : “A Nwet, yak mimbuu mimbe mi nsuhus nwomede isi yés ngéda di ngwélél jôl joñ.” Nwin u u bi lémél Yésu ngandak, a ntimbhe le: “Me ntehe Satan a mal kwo kiki nwegnwek, a lôlak i ngii. Nuna-ki! Me mal ti bé kunde i telbe nyoo lôñni dihéé di nyoo ni makôô.”​—Lukas 10:17-19.

Yésu a nlédés banigil bé, a nkal bo le ba ga la yémbél yak mam mabe ndik wengoñle ba nol nyoo ni dihéé di nyoo. Jam lipe, ba nla ki ba nkwoog nkaa le i dilo di nlo, Satan a ga ba ha bé ngii. Yésu a nhôla ki 70 banigil i tehe jam li yé nseñ inyu dilo di nlo. A nkal le: “Ni kon bañ maséé inyule mimbuu mimbe mi nsuhus nwomede isi nan, ndi kona maséé inyule môl manan ma yé ntilga i ngii”​—Lukas 10:20.

Yésu a yé maséé, a mbégés Isañ i mbamba inyule a ngwélél bôt ba suhulnyuu inyu boñ mam ma hélha. A mbéñge banigil bé, a kal bo le: “Maséé ni bôt ba gwé mis ma ntehe i mam ni yé i tehe. Inyule me nkal bé le, ngandak bapôdôl ni bikiñe ba bi bana ngôñ i tehe mam ni yé tehe, ndi ba bi tehe bé mo; yak emble mam ni yé emble, ndi ba bi emble bé mo.”​—Lukas 10:23, 24.