Jôm li bakon lô li nkôhna mbôô​—Wada a nti mayéga

Inyu keñgle bôt ba Ntôñ bakéés bakeñi ba ba nsômbôl nol nye, Yésu a nke i Éfraim, tison yada i ñombok u Yérusalem. Nye ni banigil bé ba nyén haa ni baoo bap. (Yôhanes 11:54) Pasa i nwii 33 N.Y. i yé bebee, ndi Yésu a nhoo ki témb. A ntagbe Samaria i ñombok, a bedek i Galiléa, hala a mba nleñ wé u nsôk mu i pes mbok i ilole a nwo.

Mu bibôdle bi liké jé, mu kiki a yé ke mambai ni mambai, Yésu a mboma jôm li bakon lô. Ntén lô u, u nkoñ ngim bahoma ba nyuu ndék ni ndék kiki bo dinoo di makôô ni di moo, tole maôô. (Ñanga Bôt 12:10-12) Inoñnaga ni Mbén Djob, mut lô a nlama lond le: “Nyega, nyega!” a yénék ki nyetama.​—Lôk Lévi 13:45, 46.

Jon jôm li bakon lô lini, li ntelep haa ni Yésu ndi li kahal lond le: “A Lét Yésu, kon bés ngoo!” Ngéda a ntehe bo, Yésu a nkal bo le: “Kena, ni undba yak biprisi.” (Lukas 17:13, 14) Yésu a ñunda le a nôgôl Mbén Djob i i nti biprisi kunde i legel le bakon lô ba mpubhana. Ba nla ni tiimba niñ ipôla bet ba yé mbôô.​—Lôk Lévi 13:9-17.

Jôm li bakon lô li gwé hémle le Yésu a nla gwélél ngui yé inyu mélés bo. Ba nke tehe biprisi nwaa le ba kôhna mbôô. Kiki ba yé njel, hémle yap i nsaibana. Ba mbôdôl tehe, ba nôgda ki le lô yap i mal!

Mukété jôm li bakon lô, bôô ba nkena liké jap ni bisu, ndi wada a mboñ bé hala. A yé man Samaria, a ntémb i tehe Yésu. Inyuki? Inyule i yom i mbôña i nlôôha tihba nye, jon a nsômbôl ti Yésu mayéga. Kiki a nyi le Djob nyen a nti nye mbôô, i mut a bé kon lô a mbôdôl ti “Nyambe lipém ni kiñ keñi.” (Lukas 17:15) I ngéda a ntehe Yésu, a nkwo makôô mé a ti ki nye mayéga.

Yésu a mbat i bet ba nkéña nye le: “Bo jôm ba mbôôp, hala bé? Hee bana bôt bôô bape ba yé? Baa mut numpe a ntémb bé ni mbus inyu ti Nyambe bibégés handugi nunu mut loñ ipe?” I mbus, Yésu a nkal nye le: “Telep, kenek hémle yoñ i mélés kon woñ.”​—Lukas 17:17-19.

Mu kiki a mélés jôm li bakon lô, Yésu a ñunda le Yéhôva a nit nye. Wada ikété jôm a nkôs ndik bé mbôô, ndi a yé yak i njel niñ. Di niñil ha bé i ngéda Djob a bé gwélél Yésu inyu mélés i nya makon i. Ndi, ibale di nhémle Yésu, di nla ba i njel i nkena i niñ​—niñ i boga. Baa yak bés di ñunda le di nyi ti mayéga kiki man Samaria nunu?