Kii yé bitééne bi Djob inyu bôt ba binam?

1. Kii yé bitééne bi Djob inyu bôt ba binam?

BITÉÉNE bi Djob inyu bôt ba binam bi yé hélha jam. A bi heg Adam bo Éva, munlôm nu bisu ni muda nu bisu, le ba niñ ikété liyééne lilam le wom Éden. Bitééne gwé bi bé le ba bana bon, ba boñ le hisi hi yila paradis, ni le ba tééda binuga gwobisôna.​—Bibôdle 1:28; 2:8, 9, 15; béñge Ndoñi 6, i mamélél ma kaat.

2. (a) Kii nyis bés le Yéhôva a ga yônôs bitééne gwé? (b) Kii Bibel i niiga inyu niñ boga?

² Baa u nhoñol le di ga niñil kel yada ikété paradis? Yéhôva a nkal bés le: “Me mal téé ngôôba yem, m’a yônôs ki yo.” (Yésaya 46:9-11; 55:11) Ñ, Yéhôva a ga boñ yom a bi pot, yom to yada y’a kéñ be nye njel. Yéhôva a nkal le a bi heg hisi inyu ngim njom. A bi heg bé hio yañga. (Yésaya 45:18) Yéhôva a nsômbôl le di niñ hana isi. Baa mimbe mintén mi bôt Djob a nsômbôl le ba niñ hana isi? Ni inyu dilo tjañen? Bibel i nkal le: “Bôt ba téé sép [tole, bôt ba manôgla] b’a kôdôl hisi, ba yén ki mu mba ni mba.”​—Tjémbi 37:29; Masoola 21:3, 4.

3. Kiki di ngi tehge makon ni nyemb, mambe mambadga di nla bat?

³ I len ini, bôt ba binam ba nkwo kon, ba wok ki. Ikété ngandak bahoma, bôt ba njo gwét, ba nolnaga. Hiki mut a ntehe le bitééne bi Djob bi yé ngi yon. Jon di mbadba le: Kii bi tagbe? Inyuki hisi hi ta bé paradis i len ini? Bibel yotama yon i nla timbhe mambadga mana.

BIBÔDLE BI ÑOO DJOB

4, 5. (a) Njee a bi gwélél nyoo inyu pôdôs Éva i wom Éden? (b) Lelaa loñge mut i nla yila mut wip?

⁴ Bibel i nkal bés le Djob a gwé ñoo wada ba nsébél le “Nsohop ni Satan.” Satan a bi gwélél nyoo inyu pôdôs Éva ikété wom Éden. (Masoola 12:9; Bibôdle 3:1) A bi boñ wengoñle nyoo yon i bé pot.​—Béñge Ndoñi 7, i mamélél ma kaat.

⁵ Baa Djob nyen a bi heg Satan Nsohop? To! Añgel yada i i bé i ngii ngéda Djob a bé kôôba hisi inyu Adam bo Éva, yon i bi ntonbana Djob, i yila Nsohop. (Hiôb 38:4, 7) Ndi, lelaa hala a nla bôña? Baa loñge mut i nla yila mut wip? Mut to wada a ngwéé bé mut wip. Ndi, mut a yé le a nwas le ngôñ ibe i nañ ikété ñem wé tole a sômbôl bana yom i ta bé nye kunde. Ibale a ntééda ngôñ ibe i, i nañ, i ha ki mahoñ. Ha ngéda i, ibale a nkôhna pôla, a’ nip. Hala nyen a nyilha nyemede mut wip.​—Añ Yakôbô 1:13-15; béñge Ndoñi 8, i mamélél ma kaat.

6. Lelaa añgel yada i bi yila ñoo Djob?

⁶ Hala nyen mam ma bi tagbe inyu añgel yada. Ngéda Yéhôva a bi heg Adam bo Éva, a bi kal bo le ba gwal, ba “yônôs hisi” ni bon bap. (Bibôdle 1:27, 28) Bebeg le i añgel i, i bi yén, i hoñol le: “Bôt bana bobasôna ba nla pon bégés me iloole ba bégés Djob!” Kiki a bé tééda ngôñ ibe i mu ñem wé, hala nyen a bé kônde sômbôl kôhna bibégés bi kôli ndik ni Yéhôva. Sôk i nsôk, a añle Éva bitembee, a tinde nye i ndogbene Yéhôva. (Añ Bibôdle 3:1-5.) Hala nyen a bi yila Satan Nsohop, ñoo Djob nu bisu.

7. (a) Inyuki Adam bo Éva ba bi wo? (b) Inyuki yak bés di ñun, di wok ki?

⁷ Adam bo Éva ba bi ndogbene Djob, ba je litam. (Bibôdle 2:17; 3:6) Ba bi boñ béba i mis ma Yéhôva. Mbus ngéda, ba wo kiki Yéhôva a bi kal. (Bibôdle 3:17-19) Bon ba Adam bo Éva ba bi gwééna béba i, jon yak bo, ba bi sôk ba wo. (Añ Rôma 5:12.) Inyu hôla bés i nok inyuki bon ba Adam bo Éva ba bi yila kwéha, di yoñ ndémbél ini: Hoñol ki muda nu a nlamb koga. A ngwélél nlélém kwem inyu pémés bikoga gwé. Ndi, i kwem a mbôñôl i gwé litut. Baa u nhoñol le koga i nla pémél mu kwem i, i bana bé litut? Hala a nla bé bôña. Nlélém jam ni Adam; ngéda a bi ndogbene Djob, a bi yila kwéha mut. Kiki di yé bon ba Adam, bés bobasôna di yé baboñbéba, hala wee di gwé nlélém “litut” kiki nye. Di ngwééna béba, jon bés bobasôna di ñun, di wok ki.​—Rôma 3:23; béñge Ndoñi 9, i mamélél ma kaat.

8, 9. (a) Kii Satan a bé sômbôl le Adam bo Éva ba hémle? (b) Inyuki Yéhôva a bi nol bé mintonba mi kunda yada?

⁸ Satan a bi bôdôl kolbaha Yéhôva ngéda a bi tinde Adam bo Éva i ndogbene Djob. A bé sômbôl ki le Adam bo Éva ba hémle le Djob a yé mut bitembee, béba kiñe i i ngwés bé loñge yap. Satan a bi pot le Djob a kôli bé kal bôt ba binam kii ba nlama boñ. A bi pot ki le Adam bo Éva ba nla pohol ni bomede yom i yé béba ni loñge. Baa kii Yéhôva a bé le a boñ? A bé le a nol bo inyu mélés ngolba ba bi kolbaha nye. Ndi ibale a boñ hala, baa ki a bi unda le Satan nyen a yé mut bitembee? To!

⁹ Yéhôva a bi nol bé mintonba mi kunda yada. Ndi a bi ti bôt ba binam ngéda le ba ane bomede inyu boñ le i nene i mis ma bôt bobasôna le Satan nyen a yé mut bitembee, ni le nye Yéhôva nyen a nyi yom i yé loñge inyu yés. Pes 11 munu kaat ini i ga kônde toñle bés jam li loñge. Ndi u nhoñol le Adam bo Éva ba bi yoñ makidik malam? Baa hala a bé loñge le ba hémle Satan, ni le ba ndogbene Djob? Yéhôva nyen a bi ti bo mam momasôna. A bi heg bo peles, a ti bo liyééne lilam ni bôlô i bé lémél bo. Ndi Satan a bi yénak bé, a boñ yom to yada inyu yap. Ibale u bé ha, ki u bi nôgôl njee: Satan tole Yéhôva?

10. Mambe makidik hiki wada wés a gwé le a yoñ i len ini?

¹⁰ I len ini, hiki wada wés a gwé le a pohol njee a ga nôgôl, a yik le niñ yé i tiñne mu makidik a nyoñ. Di nla pohol i nôgôl Yéhôva kiki Ñane wés inyu unda le Satan nyen a yé mut bitembee. Tole di nla pohol Satan kiki ñane wés. (Tjémbi 73:28; añ Bingéngén 27:11.) Ndék bôt ikété nkoñ isi yon i mpohol i boñ sômbôl i Djob. Hala a ñunda le Djob bé nyen a yé ñane nkoñ isi. Ndi, njee ni a yé ñane nkoñ isi?

NJEE A ÑANE NKOÑ ISI?

11, 12. (a) Kii manoodana Satan a noode Yésu ma niiga bés? (b) Bimbe bipes bi Bibel bi niiga le Satan nyen a yé ñane nkoñ isi?

¹¹ Yésu a bé yi njee a ñane toi nkoñ isi. Kel yada, Satan a “éba nye biane bi nkoñ isi ni lipém jap.” Ha nyen Satan a bôn Yésu le: “Me nti we mam mana momasôna ibale u ñôm maboñ isi, u ôôp i bisu gwem.” (Matéô 4:8, 9; Lukas 4:5, 6) Badba le, ‘Ibale biane bi nkoñ isi bi bak bé isi énél i Satan, baa ki a bi bôn gwo Yésu?’ Heni! Hala a ñunda le Satan nyen a gwé biane gwobisôna.

¹² Bebeg u mbadba le: ‘Ibale Yéhôva nyen a bi heg ngii ni isi, lelaa ni Satan a yé ñane nkoñ isi?’ (Masoola 4:11) I yé maliga le Yéhôva nyen a bi heg ngii ni isi, ndi Yésu a bi sébél Satan le “ñane nkoñ isi.” (Yôhanes 12:31; 14:30; 16:11) Ñôma Paul nye a bi sébél Satan Nsohop le “nyambe nu hiai hini.” (2 Korintô 4:3, 4) Yak ñôma Yôhanes a bi tila le: “Nkoñ isi wonsôna u niñi isi ane mut mbe.”​—1 Yôhanes 5:19.

LELAA NKOÑ ISI U SATAN U GA TJIBA?

13. Inyuki di gwé ngôñ ni paradis?

¹³ Nkoñ isi di niñil u nlôôha ba béba. Homa nyensôna, di ntehe gwét, makala pati, bôt ba bihéñba ni ba njôô. To ibale ba mboñ biliya lelaa, bôt ba binam ba nla bé mélés mandutu di gwé. Ndi ndék ngéda, Djob a ga tjé bibéba bi bôt bi nkoñ isi i gwét ba nsébél le Armagédôn. Mbus, a ga yilha hisi hini paradis het telepsép i mba.​—Masoola 16:14-16; béñge Ndoñi 10, i mamélél ma kaat.

14. Njee Djob a bi tep kiki Kiñe i Ane yé? Kii Bibel i bi bôk pot inyu Yésu?

¹⁴ Yéhôva a bi téé Yésu Kristô kii Kiñe i Ane i ngii. Hala a yé dikôô di ñwii i len ini, le Bibel i bi bôk pot le Yésu a ga yila “Ñane nsañ,” ni ki le Ane yé i mba i boga ni boga. (Yésaya 9:5, 6) Yésu a bi niiga banigil bé lelaa ba nlama soohe inyu Ane ngéda a kal le: “Ane yoñ i loo. Sômbôl yoñ i bôña ’isi kiki ngii.” (Matéô 6:10) I Pes 8, di ga nigil lelaa Ane Djob i ga tjé biane bi nkoñ isi. (Añ Daniel 2:44.) Mbus, Ane Djob i ga yilha hisi loñge paradis.​—Béñge Ndoñi 11, i mamélél ma kaat.

HISI YONDO HI YÉ BEBEE!

15. Kii Bibel i nsébél le “hisi hi yondo”?

¹⁵ Bibel i mbôn le: “Bés di mbem ngii yondo ni hisi hi yondo, mu nyen telepsép i nyééne.” (2 Pétrô 3:13; Yésaya 65:17) Ngim mangéda, Bibel i nsébél bôt ba niñ i nkoñ isi le “hisi.” (Bibôdle 11:1) Jon, bôt bobasôna ba ga kôs bisai hana isi inyule ba nôgôl Djob, bon Bibel i nsébél le “hisi hi yondo” hi telepsép.

16. (a) Limbe likébla likeñi Djob a ga ti bet ba ga niñ i mbok yondo? (b) Kii di nlama ni boñ inyu kôhna likébla li niñ boga?

¹⁶ Yésu a bi bôn le bet ba ga niñ i mbok yondo i Djob, ba ga kôhna likébla li “niñ boga.” (Markô 10:30) Kii di nlama ni boñ inyu kôhna likébla li? Soho, añ kaat Yôhanes 3:16 ni 17:3 inyu léba ndimbhe. Nano, di béñge yom Bibel i nkal inyu niñ i boga ikété Paradis.

17, 18. Kii nyis bés le nsañ ni ñem nwee u mba ni nkoñ isi wonsôna?

¹⁷ Béba, gwét, liyanmbén, ni bisañ bi mba ha bé. Béba mut to yada i mba ha bé munu nkoñ isi. (Tjémbi 37:10, 11) Djob “a nsugus [tole a mélés] gwét letee ni lisuk li ’isi.” (Tjémbi 46:10; Yésaya 2:4) Hisi hi ga yon ni bôt ba ngwés Djob ni ba ba nôgôl nye. Yak ngandak nsañ yʼa ba i boga ni boga.​—Tjémbi 72:7.

¹⁸ Litén li Yéhôva li ga niñ ikété nsañ ni ñem nwee. Ngéda Lôk Israél i bé nôgôl Djob, ba bééna nsañ inyule Yéhôva a bé tat bo. (Lôk Lévi 25:18, 19) Ikété Paradis, yom to yada, to mut nye ki nye a ga kônha bé bés woñi. Di mba di niñ ndigi ikété nsañ ni nsañ!​—Añ Yésaya 32:18; Mika 4:4.

19. Kii nkwés bés nkaa le bijek bi ga ba iloo héga i hisi yondo hi Djob?

¹⁹ Bijek bi ga ba iloo héga. Bibel i nkal le bijek bi mba “ngandak hana isi ngii mababat ma dikôa.” (Tjémbi 72:16) Yéhôva, “Nyambe wés yaga, a’ sayap bés.” A ga boñ ki le hisi hi “ha bijek gwé.”​—Tjémbi 67:7.

20. Lelaa di nyi le hisi hi ga yila paradis?

²⁰ Hisi hiosôna hi ga yila paradis. Bôt ba mbana mandap malam ni bahoma ba mbônji ni bie bilam. (Añ Yésaya 65:21-24; Masoola 11:18.) Hisi hiosôna hi ga lama kiki wom Éden. Yéhôva a ga ti bés hiki yom di nsômbôl. Jon Bibel i nkal inyu yé le: “U nahal woo woñ, u nuus ki ngôñ i hi yom i gwé niñ.”​—Tjémbi 145:16.

21. Kii nyis bés le nsañ u mba ipôla binuga ni bôt ba binam?

²¹ Nsañ u mba ipôla binuga ni bôt ba binam. Binuga bi ga boñ ha bé ki mut binam béba. Boñge batitigi ba ga ba maséé i tuk i pañ binuga bi bikai di nkon woñi i len ini.​—Añ Yésaya 11:6-9; 65:25.

22. Kii Yésu a ga boñ inyu bakokon?

²² Bakokon ba mba ha bé. Ngéda Yésu a bé hana isi, a bi tibil ngandak bôt. (Matéô 9:35; Markô 1:40-42; Yôhanes 5:5-9) Kiki Kiñe i Ane Djob, Yésu a ga mélés bakokon bobasôna. Mut to wada a ga kal ha bé le: “Me nkon.”​—Yésaya 33:24; 35:5, 6.

23. Kii Djob a ga boñ inyu bawoga?

²³ Bawoga ba ga tuge. Djob a bi bôn le a ga tugul didun di bawoga. Bibel i nkal le: “Bitugne gw’a ba inyu ba ba téé sép ni ba ba téé bé sép.”​—Añ Yôhanes 5:28, 29; Minson mi baôma 24:15.

24. Mambe mahoñol ma nlo we ñem ngéda u nhoñol lelaa niñ y’a ba ikété Paradis?

²⁴ Hiki wada wés a nlama pohol. Di nla pohol i yi njee a yé Yéhôva ni i boñ mam ma nlémél nye, tole di nla pohol le di mboñ ndik mam ma nlémél bés. Ndi ibale di mpohol i gwélél Yéhôva, dilo dilam ni bisai bikeñi bi mbem bés. Ngéda mut wada a bi bat Yésu le a hoñol nye mbus nyemb yé, Yésu a bi bôn nye le: “W’a ba ni me i Paradis.” (Lukas 23:43, MN) Nano, di kônde ni wan biniigana inyu yi njee a yé Yésu ni lelaa a ga yônôs mimbônga mi Djob.