MBADGA 4

Lelaa me nlama kodol mahôha mem?

INYUKI HALA A YÉ NSEÑ

I neebe mahôha moñ i nla hôla we i ba nhôôlak mut, tole mut ba nla bôdôl ñem.

KII U GA BOÑ?

Hégda le jam lini: Tim a yé tuk ni mawanda mé, ndi kiki a nleñ bol, i ke i bol léman i litôa li mut numpe.

Ibale wen u bak Tim, ki u mboñ ni lelaa?

YOÑ NDÉK NGÉDA I HEK PÉK!

U GWÉ MAM MAA U NLA POHOL I BOÑ:

Ke ngwéé.
Ôm mut numpe nsohi.
Kal mut nu yom i ntagbe, u neebe ki i saa inyu jam u ñôbôs.

U nla pala pohol jam li bisu. Ndi manjom malam ma yé ngandak, ma ma nlama tinde we i neebe mahôha moñ—to ibale ma yé le u mbol léman i litôa tole u mboñ jam lipe.

MANJOM MAA MA MA NLAMA TINDE WE I NEEBE MAHÔHA MOÑ

Hala yé loñge jam u nlama boñ.

Bibel i nkal le: “Di nsômbôl hiôm loñge ikété manjel momasôna.”—Lôk Héber 13:18.
Bôt ba yé bebee i pala nwéhél mahôha ma ba ba neebe mahôha map.

Bibel i nkal le: “Nu a nhô (tole a nsôô) béba yé a’ ke bé haa, ndi nu a mpahal yo, a nwas ki yo, nyen a’ kôs konangoo.”—Bingéngén 28:13, MN.
Jam li nlôôha mahee li yé le hala a nlémél Djob.

Bibel i nkal le: “Yéhôva a ñoo mut nu a mboñ mam ma yé nkoda, ndi a yé liwanda li bôt ba ba téé sép.”—Bingéngén 3:32, MN.

Mañge muda wada le Karina, a gwé 20 ma ñwii, a nyééne i loñ Amérika. A bi noode sôô isañ le ba bi ti nye lipep li ñunda le a bé bep luk litôa, a kenga jo ni ngandak ngwéé. Ndi a bé bé le a sôô jo niñ yé yosôna. Karina a nkal le: “I mbus bebee le ngim ñwii, pua yem a bi tehe jôl jem mu lipep li. Hala a bi lona me ngandak mindañ!”

Bimbe biniigana a bi kôs? Karina a nkal le: “I sôô mahôha moñ i nkônde ndik bébés mam. Kel yada, bikuu bi ga sôk ndigi bi kwél we!”

LELAA U NLA ÔT BINIIGANA MU MAHÔHA MOÑ

Bibel i nkal le: “Inyule bés bobasôna di mbaage ngandak.” (Yakôbô 3:2) Kiki di mbôk di tehe, u ñunda le u gwé suhulnyu, ni le u yé nhôôlak ibale u neebe mahôha moñ—bihôô bihôô.

Jam lipe u nlama boñ li yé le u ôt biniigana mu mahôha moñ. Hingonda hiada le Véra hi nkal le: “Me noode tehe hiki hihôha me mboñ, kiki njel yada inyu kônde nigil. Me ñôt ngim biniigana mu, bi bi ga hôla me inyu kônde yila loñge mut, ni i tibil boñ mam lisañ lipe.” Di tehe lelaa yak we u nla boñ minlélém mi biliya.

U mpoo tutus nu isoñ, u ôbôs nye. Kii u ga boñ?

U yén nwee, u soohege le a yi bañ jam li.
U nkal isoñ jam li ntagbe toi.
U nkal isoñ jam li bi tagbe, ndi u ôm mut numpe nsohi.

U nkwo makégse inyule u nigil bé. Kii u ga boñ?

U ñunup le ba nti makégse.
U neebe le wen u yé njom inyule u nsal bé loñge.
U noode unda le malét a gwéne we jam.

Mañge muda a yé luk litôa a gwéélak léman inyu béñge mbus — Mut nu a nyén i hoñol mahôha mé hiki ngéda, a yé kiki mut nu a yé luk litôa ndi a hélél (tole a kida) a nun léman inyu béñge mbus

Nano témb wan dihéga di ntip ti, u hégda ki le wen u yé (1) isoñ, tole (2) malét woñ. Lelaa isoñ tole malét woñ a ga tehe we ibale u neebe mahôha moñ? Lelaa ba ga tehe we ibale u nhô, tole u nsôô dihôha tjoñ?

Nano hoñol ngim hihôha u mboñ munu ñwii unu u ntip ntagbe, i mbus u timbhe mana mambadga ma noñ.

Himbe hihôha u bi boñ? Kii u bi boñ i mbus ha?

Me bi hô hihôha hi.
Me bi ôm mut numpe nsohi.
Me bi pala neebe hihôha hi.

Ibale u bi neebe bé hihôha hioñ, lelaa u bi nôgda i mbus ngéda?

Me bé maséé ngandak—Inyule me bi semba (tole keñgle) jam li!
Kiññem yem i bé kéés me—Ibale me yik, ki me bi pot maliga.

Limbe jam lilam u bé lama boñ?

Bimbe biniigana u bi ôt mu hihôha hioñ?

WE U NHOÑOL LELAA?

Inyuki ngim bôt i ngwés bé neebe mahôha map?

Lelaa bôt ba ga tehe we ibale u noode hô mahôha moñ hiki ngéda? Ndi lelaa ba ga tehe we ibale u neebe mahôha moñ?—Lukas 16:10.