Kii me nlama boñ ibale ba nyumbla me i suklu?

KII U GA BOÑ?

Hégda le jam lini: Tômas a ngwés bé ke i suklu len, to yani, to noma; a ngwés ha bé ki ke nyoo. Munu sôñ aa ini i ntip tagbe, mawanda mé ma suklu ma bi bôdôl ôbôs nye jôl. I mbus, ba kahal sébél nye ni môl a ngwés bé. Ngim mangéda, wada wap a mboñ le bikaat bi Tômas bi kwo. I mbus, a boñ wengoñle a nkôôba bé. Tole numpe a nke Tômas i mbus, a nyuge nye. Ngéda Tômas a nhielba inyu béñge, a nla ha bé ki yi njee a mboñ nye hala. Ndi yani, a bi kôhna jam lipe li li yé béba kiyaga, ba bi éple nye mabéhna ma ngui ni njel internet . . .

Ibale u bé Tômas, kii u bé le u boñ?

YOÑ NDÉK NGÉDA I HEK PÉK!

U hoñol bañ le u gwé bé ngui yo kiki yo. Maliga ma yé le u nla kolba bet ba noode we ibabé le u jo sañ. Lelaa u nla boñ hala?

• YÉN NWEE. Bibel i nkal le: “Jôñ mut i mpémés hiun hié hiosôna, ndi mut pék a nkéñ hio, a mômôs ki hio.” (Bingéngén 29:11) Ibale u ñunda le u yé nwee​—to i bitéé bi mis ndigi​—bet ba nyumbla we ba ga tehe ha bé nseñ i tééñga we.

• U TIMBHE BAÑ. Bibel i nkal le: “Ni timbhe bañ mut nye ki nye béba inyu béba.” (Rôma 12:17) Ibale u nyéñ le u timbhe bo, yak bo ba ga bana makénd i ke ni bisu i nyumbla we.

• KEÑGLE MINDAÑ. Bibel i nkal le: “Mut yihe a ntehe jam libe, a nsolop.” (Bingéngén 22:3) Boñ biliya gwoñ gwobisôna inyu keñgle bôt ba nlona we mindañ. Keñgle yak bahoma ni mam ba nla gwélél inyu nyumbla we.

• NOODE HÉLÉS BO. Bibel i nkal le: “Ndimbhe nwee i mômôs kundul (tole hiun).” (Bingéngén 15:1) U nla yak yilha jo jam li minjôha. Kii héga, ibale inyu tééñga we, ba nkal le u yé nkeñi ngandak, u nla paa bituu ndi u kal le: “Ngo maliga ma, yak memede me ntehe yaga le me nje ngandak!”

• NYODI HA HOMA NU. Hingonda hiada le Nôra, nu a gwé 19 ñwii, a nkal le: “Ibale u yén nwee, u ñunda le u yé toi nhôôlak mut, ni le u gwé ngui iloo mut nu a nyumbla we. U ñunda ki le u gwé hôtnyu​—lem lam nye a gwé bé.”​—2 Timôtéô 2:24.

• BOÑ BILIYA I KANDAL NYUU. I bôt ba nyumbla bape ba mbéna pala yimbe bet ba nkon woñi, tole ba ba nla bé sôñ bomede. Ndi, bôt ba nyumbla ba ga pala bé bana lem i tééñga we ibale ba ntehe le u nkon bé woñi.

• YIBLE MUT ÑEM WOÑ. Mut wada nu a bé malét a nkal le: “Me nsoohe nu ni nu ba ntééñga, le a yelel jam li. U gwé kunde i yelel jo, hala a ga kéñ ki bôt ba nyumba njel i tééñga mut numpe.”