Lap inyu bégés Djob

Ngéda Môsé a bé ngii Hikôa Sinai, Yéhôva a bi bat nye le a oñ ndap libadô i tôbôtôbô, ba nsébél le Lap, het bon ba Israel ba bé lama bégés Nye. Ba bé lama ki begee Lap i, ngéda ba bé ke bahoma bape.

Yéhôva a bi kal le: ‘Kal bôt ba litén le ba ti i yom ba nla inyu oñ Lap.’ Bon ba Israel ba ti gôl, silba, mamuna, tik ngok, ni bieñg bi nyañga. Ba ti yak mahuu ma mintômba, longe mboñ, bikoo bi binuga, ni ngandak gwom ipe. Ba bi ti gwom kayéle Môsé a kal bo le: ‘Gwom ni nti bi kôli! Nwaha hala.’

Ngandak bôt i makeñge, bôlôm ni bôda, ba bi hôla i oñ Lap. Yéhôva a bi ti bo pék inyu gwel nson. Bahogi ba bé bañ bôñgô, bape ba bé bak yo inyu boñ mabadô, tole ba bé mage mabadô. Bape ki ba bé kôñg ngok, ba salak gôl, ba tjok bikék.

Litén li bi oñ Lap ndik kiki Yéhôva a bi kal bo. Ba boñ loñge libadô, i i bé kap Lap bituñ biba: Homa Mpubhaga ni Homa a Nlôôha Mpubhaga. Nkuu malômbla u u bé mbañak ni kék i akasia ni gôl, u bé ikété Homa a Nlôôha Mpubhaga. Homa Mpubhaga a bééna lambe gôl, téblé, ni juu inyu ligis binjinjiñ. Pan i mamuna ni juu likeñi li bisesema bi bé ikété kotoo i Lap. Nkuu malômbla u bé hôñlaha bon ba Israel mbônga wap i nôgôl Yéhôva. U nyi kii ba nsébél le malômbla? Malômbla ma yé mbônga u tôbôtôbô.

Yéhôva a bi pohol Arôn ni bon bé bôlôm inyu sal i Lap kiki biprisi. Ba bé lama bôñgôl yo, ni sem bisesema mu inyu Yéhôva. Ndik Arôn, prisi keñi, nyen a bééna kunde i jôp ikété Homa a Nlôôha Mpubhaga. A bé lama jôp ngélé yada hiki nwii inyu ti sesema inyu bibéba gwé, bi lihaa jé, ni bi litén li Israel jolisôna.

Bon ba Israel ba bi mal maoñ ma Lap nwii wada i mbus manyodi map i Égiptô. Nano, ba bééna homa inyu bégés Yéhôva.

Yéhôva a bi yônôs Lap ni lipém jé, a boñ ki le ond i nene i ngii Lap. Ngéda ond i bé i ngii Lap, bon ba Israel ba bé ba yégle ha, i homa nu. Ndi, ngéda ond i bé i nyodi i ngii Lap, ba bé yi le ngéda i nkola le ba nyodi. Ba bé ba noñgol Lap, ba begee bipes gwé, ba kahal noñ ond.