Makénd ma Yéhôyada

Atalia a bé ngond Yézabel, a bak béba kiyaga, kiki nyañ. Atalia a bé nwaa kiñe Yuda. Mbus nyemb nlô wé, man wé nu munlôm a yila kiñe. Ndi man a wo bañ, Atalia a téé nyemede kiñe Yuda. A bi noode nol bon ba kiñe bobasôna, a nolok ki nu ni nu a nsômbôl yila kiñe, yak balal bé bomede. Hiki mut a bé kon nye woñi.

Prisi keñi le Yéhôyada bo nwaa wé Yéhôséba ba bé yi le i yom Atalia a mboñ i yé béba ngandak. Ba bé bebee i nimis biniñ gwap inyu sôô nlal Atalia wada le Yéhôas, nu a bé a yii nkéñé man. Ba néñés nye i témpel.

I ngéda Yéhôas a bi pamna nwii minsaambok, Yéhôyada a kot dikoo di mbok ni Lôk Lévi, a kal bo le: ‘Ni tat makôga ma témpel, mut nye ki nye a jôp bañ.’ Ha nyen Yéhôyada a téé Yéhôas kiñe Yuda, a ha nye ntut ngii ño. Bôt ba Yuda ba lond le: ‘Niñ nom inyu kiñe!’

Kiñe muda le Atalia a nok bañ liyôgbe, a ke ngwéé i témpel. Ngéda a bi tehe kiñe mondo, a lond le: “Yima! Yima!” Dikoo di mbok di gwel béba kiñe muda, di kena nye haa, di nol nye. Ndi kii di nla kal inyu ndémbél ibe a bi yék ikété loñ?

Yéhôyada a bi hôla bôt ba loñ i boñ malômbla lôñni Yéhôva, ma ma bé le ba ga bégés ndik Nyetama. Yéhôyada a bi bôk témpel i Baal, a bôk ki bisat ngéñ ngéñ. A téé biprisi ni bon ba Lévi i sal i témpel inyu boñ le ba témb ba bôdôl bégés Yéhôva. A téé batat makôga ma témpel inyu boñ le mut nyega a jôp bañ. Yéhôyada ni dikoo di mbok ba kena Yéhôas i ndap kiñe, ba yis nye i ngii yééne kiñe. Bôt ba Yuda ba bi kon maséé. Nano ba bé le ba bégés Yéhôva ikété nsañ ibabé le béba kiñe muda le Atalia ni base Baal bi kéñ bo. Baa u ntehe lelaa makénd ma Yéhôyada ma bi hôla ngandak bôt?