Mapénd ma Yérusalem

Di témb ndék nwii i mbus. Néhémia, ngwélél wada nu Kiñe Artaserses, a bé man Lôk Israel; a bé yééne i tison Susan, mu nkoñ Persia. Manyañ Néhémia nu munlôm a lôl i nkoñ Yuda lôñni béba nwin, nye: ‘Bôt ba bi témb i Yérusalem, ba yé ikété ndutu. Di yé ngi tiimba oñ mapénd ni manwemel bôt ba Babilôn ba bi bôk.’ Néhémia a nok bañ nwin u, hala a tééñga nye. A bana ngôñ i ke Yérusalem inyu ti mahôla, jon a bi soohe le kiñe i ti nye kunde i ke.

I mbus, kiñe i yimbe le Néhémia a modop. A kal le: ‘Me mah bé tehe we lana, kii i nke bé?’ Néhémia a timbhe le: ‘Lelaa su wem w’a ba bé hala, ngéda tison Yérusalem i yé ntjék?’ Kiñe i bat nye le: ‘Kii u ngwés le me bôñôl we?’ I nlélém ngéda, Néhémia a soohe ikété ñem wé. Ha nyen a kal kiñe le: ‘Soho nwas me me témb i Yérusalem inyu tiimba oñ mapénd mé.’ Kiñe Artaserses a kal Néhémia le a gwé kunde i ke, a yoñ ki bitelbene le liké jé li tagbe loñge. A téé ki Néhémia ngomin i nkoñ u Yuda, a ti yak nye bikék inyu oñ manwemel ma tison.

I ngéda Néhémia a bi pam i Yérusalem, a béñge manwemel ma tison. A kot biprisi ni baane, a kal bo le: ‘Kinje hélha jam ini. Di nlama jôp i bôlô.’ Bôt ba neebe, ba bôdôl maoñ.

Ndi baoo ba bon ba Israel ba kahal nol bo hiol, ba kalak le: ‘To ndon i yé le i kwés lipénd ni yé oñ.’ Basal ba bi timbhe bé bo, ndi ba bi ke ni bisu ni maoñ. Lipénd jo li bé bet ndik, bet ni bet.

Baoo ba bi nôgla le ba ga lôl bahoma bobasôna inyu puhe Yérusalem ni gwét. Kiki Lôk Yuda i bi yi nsoñgi wap, i kon woñi. Ndi Néhémia a kal bo le: ‘Ni kon bañ woñi. Yéhôva a yé lôñni bés.’ A téé ngim bôt inyu tat basal bôlô, kayéle baoo bap ba bi la ha bé leñ bo gwét.

I mbus 52 ma dilo, bôlô i mapénd ni i manwemel i bi mal. Néhémia a lona Lôk Lévi yosôna i Yérusalem inyu ngand sai i lipénd. A kap ntôñ batôp tjémbi môga ima. Ba bet makala ma nkena i ngii lipénd, i homa ba bé sébél le Nwemel Lingen, ba kômna mbus, hiki ntôñ u ke yé pes inyu kiiña nkoñ. Ba bé bégés Yéhôva, ba tublak nye tjémbi ni sép, bibende bi mamuna, ni diluñ. Ésra a bé ni ntôñ wada, Néhémia ni uu ntôñ umpe, nwoma mi bomna i témpel. Bôt bobasôna; bôlôm, bôda ni boñge; ba ti Yéhôva bisesema, ba séék, kayéle makiñ map ma bé nôga haa.