Yésu a nyila Mésia

Yôhanes a bé téé likalô, a kalak le: ‘Ngim mut i nlo me mbus, i i gwé ngui iloo me.’ Ngéda Yésu a bééna bebee le 30 ma nwii, a bi nyodi i Galiléa, a ke i Lom Yordan, i homa Yôhanes a bé sôblene bôt. A gwés le Yôhanes a sôble nye, ndi Yôhanes a kal nye le: ‘Me kôli bé me i sôble we. Ndi wen u kôli le u sôble me.’ Ndi Yésu a timbhe Yôhanes le: ‘Yéhôva nyen a ngwés le u sôble me.’ Ha nyen boba ba bi jôp i Lom Yordan, ni Yôhanes a jubus Yésu nyensôna ikété malép.

Yésu a pam bañ malép, a soohe. I nlélém ngéda, ngii i yibla, mbuu Djob u sôs i ngii yé, u pôn-ga hibeñ. Ni kiñ Yéhôva i lôl i ngii, i kal le: “U yé Man wem nu gwéha, u nlémél me.”

Ngéda mbuu u bi suhul Yésu, ha nyen a bi yila Kristô, tole Mésia. Nano a bé le a bôdôl nson Yéhôva a bi ep nye i boñ hana isi.

Mbus sôble yé, Yésu a ke i ñoñ, a tégbaha 40 ma dilo nyoo. Ngéda a bi témb, a ke tehe Yôhanes. Yésu a bé lo bañ nye bebee, Yôhanes a kal le: ‘Nuna-ki, Man Ntômba Nyambe, nu a nhéya béba i nkoñ isi.’ Bini bibuk bi Yôhanes bi bé unda bôt bape le Yésu nyen a yé Mésia. Baa u nyi kii i bi pémél Yésu ngéda a bé i ñoñ? Di béñge le jam li.