YIGIL 14

Yigye balôm ba matode

Lôk Héber 8:1

I SEM KWEP: Hôla baemble i noñ we mu kiki u mba u nkena nkwel woñ wonsôna, u unda ki lelaa hiki nlôm litode a gwé maada ni i yom u nsômbôl nôgha bo, yak ni ño nkwel woñ.

KII U NLAMA BOÑ:

Bana ngim njômbi. Yéñ yi ibale nkwel woñ u gwé njômbi i legel ngim nwin, tole i kwés baemble nkaa, tole i ti bo makénd; ha nyen w’a kena nkwel woñ inoñnaga ni i yom u nsômbôl nôgha bo. Tibil béñge ibale balôm ba matode bobasôna ba nhôla we i yônôs njômbi yoñ.

Badba le: ‘Mambe mambadga tole mambe mahoñol ma téé bé baemble ba mbéna bana inyu nkwel unu? Imbe mbadga ba ga bôk ndugi ba bat, imbe i ga noñ?’ I mbus, boñ le matode moñ ma noñ nlélém oda i nya i yé le baemble ba laa noñ we mu kiki u ntoñol nkwel woñ, ba tibil nok nkwel u, ba neebe ki biniigana u nti bo.
Yigye ño nkwel woñ. Hôñlaha bôt ño nkwel woñ mu ngéda yosôna u mba u nti nkwel, u tiimbaga balôm ba bibuk ba ño nkwel tole u gwéélak bibuk bipe bi bi gwé nlélém ndoñi.
Boñ le balôm ba matode ba nôôga loñge, ba tombok. Pohol ndik balôm ba matode ba ba gwé maada ni ño nkwel woñ, ba bak ki mam u nla niiga loñge mu ngéda i ntina we. U bana bañ ngandak balôm ba matode mu nkwel woñ, tibil tee hiki nlôm litode. Telep ndék ngéda ibale u mélés litode jada; i mbus, boñ loñge nyaañga inyu jubus litode li noñ ha.

U nla yigye balôm ba matode i majubul ma nkwel woñ inyu hôla baemble i nok we loñge ngéda u mba u nti nkwel, tole u nla tiimba yigye balôm ba matode i mamélél ma nkwel woñ inyu hôla baemble i bigda matode ma.