Lelaa niñ i bi bôdôl?

“Lingen li niñ li yéne [yak Nyambe].” (Tjémbi 36:9) Baa u nhémle hala? Bôt bape ba nhoñol le niñ i bi héga bé. Ibale hala a yé maliga, wee mut a bi hek bé bés. Ndi ibale Yéhôva Djob nyen a bi hek niñ, wee i nlama bana ngim njômbi. We u ntehe lelaa?a Béñge ñañ u Bibel u u mpôdôl bidôdle bi niñ, ni inyuki di nla hémle ñañ u.

1. Lelaa ngiinda i bi bôdôl?

Bibel i nkal le: “I bibôdle Nyambe a bi hek ngii ni ’isi.” (Bibôdle 1:1) Ngandak bôt ba njoñ yi (scientifiques) i nkal le ngiinda i gwé bé bibôdle. Lelaa Djob a bi hek yo? A bi gwélél “ngui yé,” hala wee mbuu wé mpubi inyu hek mam momasôna ikété ngiinda, kiki bo tjôdôt, mauñ ma tjôdôt, ni biplanet.​—Bibôdle 1:2.

2. Inyuki Djob a bi hek hisi?

Yéhôva ‘a bi hek bé hisi yañga ndi a bi uñgus hio le bôt ba yééne mu.’ (Yésaya 45:18) A bi hek hisi le hi ba homa nu a nlôôha nlam, nu a gwé gwom gwobisôna inyu niñ loñge i boga ni boga. (Añ Yésaya 40:28; 42:5.) Bôt ba njoñ yi ba nkal le hisi hi yé tôbôtôbô ikété biplanet gwobisôna. Ndik i hisi nyen bôt ba binam ba nla niñ.

3. Inyuki bôt ba binam ba yé maselna ni binuga?

I ngéda Yéhôva a bi mal hek hisi, a bi ha bihégél bi bi niñ mukété. A bi bôk a hek ndugi bibebela ni binuga. I mbus, a ‘hek mut binam i pôna yé.’ (Añ Bibôdle 1:​27.) Kii i mboñ le mut binam a ba tôbôtôbô? Kiki di bi héga i pôna Djob, di gwé ngap i kôna bilem gwé kiki bo gwéha ni telepsép. A bi hek ki bés ni ngap i nigil dilémb, i memle gwom bilam, ni i emble nsik. Maselna ni binuga, di nla bégés Nhek wés.

KÔNDE TÉM

Béñge mam ma ma nkwés bés nkaa le niñ i bi héga ni le ñañ u Bibel u u mpôdôl bibôdle bi niñ u yé maliga. Nigil i yom bilem bilam bi bôt ba binam bi niiga bés inyu Djob.

4. Niñ i bi héga

Ba mbégés bôt ba binam inyule ba bi bañ ngim gwom i i mpôôna bihégél. Ndi njee a nlama ni kôhna lipém inyu bihégél gwomede? Tuk VIDÉÔ, i mbus ni kwélél mbadga ini.

VIDÉÔ: Baa Djob a yé? (2:43)

• Kii bôt ba binam ba bi bañ i i mpôôna gwom Djob a bi hek?

Ngim mut yon i ñoñ ndap, ndi njee a bi hek i gwom gwobisôna di ntehe ipañ yés? Añ Lôk Héber 3:4, i mbus ni kwélél mambadga mana:

• Imbe hégél i nlôôha hélés we?

• Baa u nla toi hémle le ngiinda ni gwom gwobisôna bi yé mukété bi bi héga? Inyuki?

Baa u yik laa?

U nla léba minkwel ni bividéô bipe i jw.org i bahoma bana le: “Baa li bi héga?” ni “Kii ngim bôt i nhoñol inyu bibôndle bi niñ.”

“Ni maliga, hiki ndap i ñôña ni ngim mut, ndi Nyambe nyen a bi hek mam momasôna”

5. Ñañ u Bibel inyu bibôdle u yé maliga

VIDÉÔ: Baa ngiinda i bi héga?​—Dinyo malép (3:51)

• Baa Bibel i niiga le Djob a bi gwélél dilo disamal inyu hek gwom gwobisôna?

• Baa u nhoñol le ñañ u Bibel unu u yé maliga? Inyuki?

Añ Bibôdle 1:1, i mbus ni kwélél mbadga ini:

• Bôt ba njoñ yi ba bi kal le ngiinda i gwé bibôdle. I ngéda u nhégha bibañga gwap ni yom u ñañ ikété Bibel, we u nhoñol lelaa?

Ngim bôt i mbadba ibale Djob a bi hek ndugi man yom ba nsébél le cellule, i mbus i kahal nañ yomede. Añ Bibôdle 1:21, 25, 27, i mbus ni kwélél mambadga mana:

• Baa Bibel i niiga le Djob a bi bôk ndugi a hek man yom ba nsébél le cellule i mbus a nwas yo i nañ, i yila tjobi, binuga, i mbus i yila bôt ba binam? Tole a bi hek bihégél “nya ndi nya”?b

6. Nyambe a bi hek bôt ba binam i nya i yé tôbôtôbô

Djob nyen a bi hek bés, ndi di ta bé kiki binuga. Añ Bibôdle 1:26, i mbus ni kwélél mbadga ini:

• Kiki di yé nhegek i pôna i Djob, di ban-ga ngap i unda gwéha ni konangoo, kii hala a niiga bés inyu Djob?

I SEM KWEP

Yéhôva a bi hek ngiinda ni gwom gwobisôna bi niñ.

Mambadga ma mbigda

• Bibel i niiga bés le niñ i bi bôdôl lelaa?

• Inyu hek, baa Djob a bi bôk a hek man yom ba nsébél le cellule, i bôl i mbus a gwélél yo inyu hek bini bihégél bipe?

• Inyuki bôt ba binam ba yé tôbôtôbô?

KÔNDE YÉÑ

Béñge titii i gwom Djob a bi hek.

“Qu’enseigne la nature?” (Réveillez-vous !, septembre 2006)

Béñge lelaa isañ man a ntoñle man wé ñañ u bihégél u u yé ikété Bibel.

“Yéhôva . . . a hek gwom gwobisôna” (2:37)

Béñge too i biniigana bini le niñ i bi lo yotama bi nkiha ni Bibel.

“Dieu s’est-il servi de l’évolution pour créer les différentes formes de vie?” (kee i jw.org)

Wan too bihés bi binuga bi bi bi niñ behee ni i yom njôôñ yi i nkal bi ñunda le niñ i bi lo yotama tole Nyambe nyen a bi hek yo.

Cinq questions à se poser sur l’origine de la vie (man kaat)