PES 32

I mam Ane Djob i mboñ nano!

Kiki kaat i mapep

Ane Djob i bi bôdôl énél i ngii i nwii 1914. I nwii u won dilo di nsôk di énél i bôt ba binam di bi bôdôl. Kii nyis bés hala? Di béñge mbañ i Bibel i i yé yon, ni maboñok ma bôt ba binam ibôdôl i nwii 1914.

1. Kii Bibel i bi bôk i legel?

Kaat i Daniel i nkal le Ane i Djob i ga bôdôl énél i lisuk li “mangéda masaambok.” (Daniel 4:16, 17) Ngandak nwii i mbus, Yésu a bi pôdôl i ngéda i, a bi sébél yo le “ntéak ngéda u biloñ,” a kal ki le i ngéda i, i yé ngi tagbe. (Lukas 21:24) Munu yigil ini, di ga tehe le mangéda masaambok ma bi kola i nwii 1914.

2. Mambe mam mabe ma yé nnayak ibôdôl i nwii 1914?

Banigil ba Yésu ba bi bat nye le: “Kii y’a ba ki yimbne le u yé ha ni le i nkoñ ’isi unu u yé i mamélél?” (Matéô 24:3) Inyu timbhe, Yésu a bi pôdôl ngim mam i i bé lama bôña hana isi i ngéda nyemede a bé lama bôdôl ane nyoo i ngii. A bi pôdôl gwét, njal, nyeñg disi. (Añ Matéô 24:7.) Bibel i bi kal ki le i “dilo di nsôk” bôt b’a bana ngim maboñok i i ga boñ le ‘niñ i ba nledek kiyaga.’ (2 Timôtéô 3:1-5) I mam ma, ma yé nayak ibôdôl i nwii 1914.

3. Inyuki nkoñ ’isi u mbep ndigi bep ni bep ibôdôl nu Ane Djob i bi tééba?

Ndék ngéda i mbus le Yésu a bi yila Kiñe i Ane Djob, a bi jôs Satan ni mimbuu nwé mimbe nyoo i ngii, a yémbél ki bo. Bibel i nkal le “a bi léña i nkoñ ’isi, yak biañgel gwé bi léña lôñni nye.” (Masoola 12:9, 10, 12) Ibôdôl ha, Satan a yé ñunbak ngandak inyule a nyi le ndék ngéda wee a ntjiba. Jon a mboñ le bôt ba binam ba nok ndutu i nkoñ ’isi wonsôna! Ndi Ane Djob i ga mélés mandutu ma momasôna.

KÔNDE TÉM

Béñge mam ma nhôla bés i yi le Ane Djob i bi bôdôl énél i nwii 1914, ni inyuki hala a yéne bés nseñ.

4. Kii i nyis bés le Ane Djob i bi bôdôl énél i nwii 1914?

Tuk VIDÉÔ.

VIDÉÔ: Ane Djob i bi bôdôl énél i nwii 1914 (5:02)

Djob a bi boñ le Nébukadnézar, kiñe Babilôn a emel. I eem i, i bé éba i jam li bé lama pémél Kiñe Nébukadnézar, ndi i bé pôdôl ki Ane Djob.—Añ Daniel 4:17.a

Añ Daniel 4:20-26, i mbus gwélél bititii inyu timbhe mambadga mana:

(A) Kii Nébukadnézar a bi tehe mu eem yé?—Béñge minlôñ 20 ni 21.
(B) Kii bé lama pémél e?—Béñge nlôñ 23.
(C) Kii bé lama tagbe i mamélél ma “mangéda masaambok”?—Béñge nlôñ 26.

Maada ipôla e Nébukadnézar a bi tehe mu eem ni Ane Djob

MBAÑ (Daniel 4:20-36)

Ane

(A) Soso e

Énél i mal inyu ndék ngéda

(B) “Ni kit e,” “mangéda masaambok ma ntagbe”

Ane i ntiimba bôdôl

(C) “U ga tiimba yila kiñe”

I biyônôl bi bisu bi mbañ . . .

(D) E i yé yimbne i njee?—Béñge nlôñ 22.
(E) Lelaa énél yé i bi mal inyu ndék ngéda?—Añ Daniel 4:29-33.
(F) Kii i bi pémél Nébukadnézar i lisuk li “mangéda masaambok”?—Añ Daniel 4:34-36.

BIYÔNÔL BI BISU BI MBAÑ

Ane

(D) Nébukadnézar, kiñe i Babilôn

Énél i mal inyu ndék ngéda

(E) I mbus nwii 606 B.N.Y., Nébukadnézar a bi kônd njék, a la ha bé énél letee nwii minsaambok mi tagbe

Nébukadnézar a niñi hisi, a yé je bikai kiki nuga.

Ane i ntiimba bôdôl

(F) Nébukadnézar a mbôôp, a tiimba bôdôl énél

Kiñe Nébukadnézar a yé béñge ngii a tinak Djob mayéga.

I biyônôl bi mbañ bi nyônôs biba . . .

(G) E i yé yimbne i njee?—Añ 1 Miñañ 29:23.
(H) Imbe ngéda ane yap i bi mal ndugi inyu ndék ngéda? Kii i nyis bés le i ngéda Yésu a bé hana ’isi, bikiñe bi Israel bi bé ngi tiimba bôdôl énél?—Añ Lukas 21:24.
(I) Hee, ni imbe ngéda i Ane i, i bi témb i tééba?

BIYÔNÔL BI NYÔNÔS BIBA BI MBAÑ

Ane

(G) Bikiñe bi Israel bi bi yé yimbne i Ane Djob

Bikiñe bi bi bi énél i Israel. Mapubi ma yé béyés bo.

Énél i mal inyu ndék ngéda

(H) Ba ntjé Yérusalem, énél i bikiñe bi bon ba Israel i ntelep jam kiki bo 2 520 nwii

Yérusalem a bi tjiba i nwii 607 B.N.Y. i mbus 2 520 nwii.

Ane i ntiimba bôdôl

(I) I ngii, Yésu a nyila Kiñe i Ane Djob

Yésu a bi bôdôl énél i nwii 1914 N.Y. Mapubi ma yé béyés nye.

Ngéda isaambok i bé lama nom nwii nwañen?

Bipes bi Bibel bihogi bi nhôla bés i nok bipes bi Bibel bipe. Kiki ’héga, kaat Masoola i nkal le mangéda maa ni pes ma nti 1 260 dilo. (Masoola 12:6, 14) Mangéda masaambok ma yé mangéda maa ni pes ngélé iba, hala wee 2 520 dilo. Ngim mangéda, Bibel i ngwélél hilo inyu pôdôl nwii. (Ézékiel 4:6) I jam li jon li bi bôña ni mangéda masaambok Daniel a mpôdôl. Mangéda ima, ma nti 2 520 nwii.

5. Nkoñ ’isi u bi héñha ibôdôl i nwii 1914

Tuk VIDÉÔ.

VIDÉÔ: Nkoñ ’isi u bi héñha ibôdôl i nwii 1914 (1:10)

Yésu a bi kal i mam ma bé lama bôña i nkoñ ’isi i ngéda a bé lama yila Kiñe. Añ Lukas 21:9-11, i mbus ni kwélél mbadga ini:

Munu mam ba nsima, mambe wemede u ma tehe tole u ma nok le ma mbôña?

Ñôma Paul a bi kal lelaa bôt ba ga ba i dilo di nsôk. Añ 2 Timôtéô 3:1-5, i mbus ni kwélél mambadga mana:

Munu maboñok ba mpôdôl hana, mambe u mbéna tehe bôt ba gwé?

Collage: Bititii bi bi ñéba mam ma mbôña i dilo di nsôk. 1. Sônda yada i yé ti bioda. 2. Ndap i yé lék, hisi hi yé nyeñg. 3. Bisônda bi yé luk biavioñ. 4. Limut li yé ñunbak. 5. Térôriste i bi ligis minkum mi ndap ima mi mi bé Amérika. 6. Mut wada a yé yoñ bañga. 7. Munlôm a nsômbôl bép nwaa wé. 8. Ngandak mintén mi hibañga ni maok ma ma nhiôa. 9. Bôda iba ba héba mambot inyu nene. Ba yé ôtba bifôtô. 10. Bôt ba yé homa ba ntuk nsik. 11. Mut wada a nleñ pôs i i gwé hié.

6. Ane Djob i nti bés makénd

Añ Matéô 24:3, 14, i mbus ni kwélél mambadga mana:

I len ini, umbe nson u ñéba le Ane Djob i bi bôdôl énél?
Lelaa yak we u nla yoñ ngaba munu nson unu?

Ane Djob i mbôdôl ane, ndék ngéda i ga ane hisi hiosôna. Añ Lôk Héber 10:24, 25, i mbus ni kwélél mbadga ini:

Kii hiki wada wés a nlama boñ kiki di “ntehe i kel i i yé kôôge bebee”?

Collage: 1. Mut a nigil Bibel a nlo likoda li Mbôgi Yéhôva. 2. Nlélém mut u yé téé likalô. — Ibale u nok ngim jam i i nla hôla bôt bape, tole i nla sôñ biniñ gwap, kii w’a boñ?

BÔT BAPE BA NLA BAT LE: “Inyuki Mbôgi Yéhôva i nlôôha pôdôl nwii 1914?”

W’a timbhe lelaa?

I SEM KWEP

Mbañ i Bibel, minsoñgi mi nwii, ni mam ma ntagbe i nkoñ ’isi, ma ñéba le Ane Djob i mbôdôl énél. Di ñéba le di yé nkwoog nkaa ni jam li i ngéda di ñañal ñañ nlam u Ane ni i ngéda di nke makoda.