PES 42
Kii Bibel i nkal inyu libak li ngi biiba ni libii?
I ngandak biloñ, bôt ba nhoñol le ba nla ndik ba maséé ibale ba yé mbiibaga. Ndi, i bôt bobasôna ba ba yé mbiibaga bé bon ba yé maséé. Ki le bape ba ba ta bé mbiibaga ba yé maséé. Bibel i nkal le, libii ni libak li ngi biiba bi yé makébla ma Djob.
1. Bimbe bisai bi yé i ba ngi biiba?
Bibel i nkal le: “I mut a mbiiba a mboñ loñge, ndi i mut a mbiiba bé a mboñ loñge ngandak.” (Añ 1 Korintô 7:32, 33, 38.) Inyuki Bibel i nkal le i mut a mbiiba bé “a mboñ loñge ngandak”? Kristen i i ta bé mbiibaga i gwé ngandak ngéda. Kiki ’héga, i nla kéñbaha nson wé, tole i nla ke téé likalô i het ngôñ batéé likalô i yé. Jam li nlôôha ba nseñ li yé le i ngwélél ngéda yé inyu lédés liwanda jé ni Yéhôva.
2. Bimbe bisai bi yé i ba mbiibaga?
I biiba, ni libak li ngi biiba, hiki jam mu li gwé bisai. Bibel i nkal le: “Bôt iba ba nloo mut wada.” (Ñañal 4:9) Hala a yé maliga, téntén i ngéda babiina bo iba ba noñ matiñ ma Bibel. I ngéda bôt iba ba mbiiba, ba mboñ mbônga le, b’a gwéhna ba tina ki lipém wada ni nuu. I ngéda ba nyônôs mbônga wap, bo iba ba niñ ikété maséé ni nsañ iloo bôt iba ba ba niñ ndigi ntôñ, yak i bon ba ngwéé mukété lihaa jap, ba nañ loñge.
3. Lelaa Yéhôva a ntehe libii?
I ngéda Yéhôva a bi at libii li bisu, a bi kal le: “Munlôm a’ yék isañ bo nyañ, a adbe nwaa wé, ba yila nsôn wada” (Bibôdle 2:24) Yéhôva a gwé ngôñ le babiina ba gwéhna, ba yén ki ntôñ niñ yap yosôna. Yéhôva a neebe maboha ndigi i ngéda wada a nke i ndéñg. Ha ngéda i, Yéhôva a nti sobiina nu a nke bé i ndéñg kunde i bos tole i nwéhél.a (Matéô 19:9) Yéhôva a ngwés bé libii li ñamb, hala wee munlôm nu a mbii ngandak baa.—1 Timôtéô 3:2.
KÔNDE TEM
Béñge lelaa u nla ba maséé, u boñ ki le Yéhôva a kônôl we maséé to u yé mbiibaga to u ta bé mbiibaga.
4. Tibil gwélél libak joñ li ngi biiba
Yésu a bi kal le libak li ngi biiba li yé likébla li Djob. (Matéô 19:11, 12) Añ Matéô 4:23, i mbus ni kwélél mbadga ini:
Lelaa Yésu a bi gwélél libak jé li ngi biiba inyu gwélél Isañ ni inyu bôñôl bôt bape loñge?
Kiki Yésu, kristen i i ta bé mbiibaga i nla ba maséé. Tuk VIDÉÔ, i mbus ni kwélél mbadga ini:
Mimbe minson bikristen bi bi ta bé mbiibaga bi nla gwel i ntôñ u Yéhôva?
Baa u yik laa?
Bibel i nti bé ngim nwii inyu biiba. Ndi, i nti makénd i “tagbe ngéda i minheña mi mañge wanda,” hala wee i ngéda ngôñ i malal i yé ngui, tiga le ba yoñ makidik mabe.—1 Korintô 7:36.
5. Tibil pohol sobiina woñ
I pohol sobiina i yé makidik ma nlôôha ba mahee i niñ i mut binam. Añ Matéô 19:4-6, 9, i mbus ni kwélél mbadga ini:
Inyuki kristen i nlama yoñ ngéda, i tibil ki ôt pék iloole i mbiiba?
Bibel i nla hôla we i yi bilem bilam u nsômbôl le sobiina woñ a bana. Jam li nlôôha ba nseñ li yé le a nlama gwés Yéhôva.b Añ 1 Korintô 7:39 ni 2 Korintô 6:14. I mbus ni kwélél mambadga mana:
Inyuki di nlama ndigi biiba ni ngwélél Yéhôva?
Kii Yéhôva a ga nôgda ibale kristen i nyoñ makidik i biiba ni mut nu a ngwélél bé nye?
Ibale ba mboñ le binuga bi bi gwé bé ntel wada to ngui yada bi sal ntôñ, gwo biba bi ga nok ndutu. Nlélém jam, ibale kristen i mbiiba ni mut nu a ta bé kristen, bo iba ba ga nok ndutu
6. Bana litehge li Yéhôva inyu libii
I loñ Israel i ngéda kôba, bôt ba bé bos inyu to mambe manjom. Añ Malaki 2:13, 14, 16, i mbus ni kwélél i mbadga ini:
Inyuki Yéhôva a ñoo le mut a bos sobiina wé inyu to imbe njom?
Ndéñg ni maboha bi nlona ngandak njôghe, téntén inyu sobiina nu a yé ngi nsohi ni boñge
Tuk VIDÉÔ, i mbus ni kwélél mbadga ini:
Ibale u yé mbiibaga ni mut nu a ngwélél bé Yéhôva, lelaa u yé le u nlémés libii joñ?
7. Nôgôl matiñ ma Yéhôva inyu libii
Ngim mangéda, i mbéda biliya bi ngui inyu nôgôl matiñ ma Yéhôva inyu libii.c Ndi, ibale u nôgôl mo, Yéhôva a ga sayap we. Tuk VIDÉÔ.
Añ Lôk Héber 13:4, i mbus ni kwélél mambadga mana:
Baa u nhoñol le matiñ ma Yéhôva inyu libii ma yé loñge? Inyuki u nkal hala?
I ngim biloñ, mbén i ngomin i mbat le babiina ba sane état civil (kaat libii) i bisu bi bangomin, ibale ba mbos, ba nlama ki sane maboha map i bisu bi bangomin. Añ Titô 3:1, i mbus ni kwélél mbadga ini:
Ibale u yé mbiibaga, baa u bi sane état civil yak ngomin?
BÔT BAPE BA NLA BAT LE: “Baa i yé nseñ i adba yak ngomin? Bôt iba ba nla bé gwéhna, ba kahal niñ ntôñ?”
We, u hoñol lelaa?
I SEM KWEP
I ba mbiibaga ni libak li ngi biiba bi yé makébla ma Yéhôva. I mam ma mo ima, ma nla lona bés maséé ibale di nôgôl matiñ ma Yéhôva.
Mambadga ma mbigda
Lelaa mut a nla tibil gwélél libak jé li ngi biiba?
Inyuki Bibel i nkal le di biiba ndigi ni ngwélél Yéhôva?
Bibel i nti kunde i bos inyu imbe njom?
KÔNDE YÉÑ
I biiba “i Nwet i nkobla le kii”?
Béñge bividéô baa bi bi noñ ha, bi ga ti we biloñge bi maéba bi bi ga hôla we inyu libii.
Di béñge lelaa mankéé nu munlôm wada a bi yoñ makidik ma ngui, Yéhôva a sayap nye.
Kii mut a nlama tibil wan iloole a mbos sobiina wé?
a Béñge Ndoñi i mamélél ma kaat 4 I bagal libii.
b I ngim biloñ, bagwal bon ba mpohol sobiina inyu man wap. I bagwal ba ngwés man wap, ba ga yoñ ngéda i hôla man wap le a biiba ni mut nu a ngwélél Yéhôva. Moni to nkôm niñ u sobiina bé won u nlama ba jam li mahee inyu yap, ndi ba nlama yéñ kristen i i ngwés toi Yéhôva.
c Ibale u niñ ni mut, wemede nyen u nlama yoñ makidik, too w’a biiba ni nye tole w’a bagla ni nye.