Inyu timbhe mambadga mem momasôna ba bi gwélél Bibel!

ILOLE ME NYILA MBÔGI YÉHÔVA:

I ngéda me bi gwéé, bagwal bem ba bé néñés bilém i Galice i Panya. Di bé bon juem, me bé nu yônôs ina. Di bé niñ ikété maséé. I Panya ha i ngéda i, ba bé béna om bon ba mbus i yigil i pada tole i siksak. I lihaa jés ba bi om bon baa.

I ngéda me bééna 13 nwii, ba bi om me i siksak i Madrid i het mankéé nu muda a bé. Niñ i bé gwela bé ngôñ nyoo. Mut a bééna bé liwanda, ndik mambén, masoohe ni énél i mbanda. Kel yo ngi nye, di nkodba i ndap base inyu ôt pék, ndi mahoñol mem ma bé bé mu. I mbus, di tôp tjémbi di base, ba boñ mésa, i mam ma momasôna ni hop u Latin. Maliga ma yé le, me bé nok bé yom yo ki yo, me nôgdaga wengoñle Djob a ta bé me bebee. Me bé nwee, to pot me bé pot bé. To i ngéda me ni mankéé nu muda di bé bomna, di bé kalna ndik le: “Mayéga a Maria nu mpubi.” Baéga bés ba bé ti ndik bés 30 ma manut i mbus je inyu kwel bés ni bés. Maséé ma ma bé i mbai yés ma bé bé nyoo to ndék isii. Me bé nôgda le me yé metama, me eek hiki ngéda.

Me bi nuhlak bé kekikel me nôgda le me yé bebee ni Djob, ndi to hala, ngéda me bi pamna 17 nwii, me yila soeur. Maliga ma yé le, me bi boñ ndik i yom ba bé gwés le me boñ, ndi me bé badba too me mboñ toi sômbôl i Djop. Bôt ba base ba bé béna kal le i bôt ba bé béna bat i nya mambadga i ba nsôk ba kee i bee hié. Ndi to hala, me bééna pééna i ñem. Me bé yi le Yésu Kristô a bi yén bé homa wada, a bé ke bahoma bahoma a niigaga bôt, a hôlga bo. (Matéô 4:​23-​25) I ngéda me bi pamna 20 ma nwii, me bé tehe bé i yom i bé le i boñ le me yén i siksak (couvent). Hala a bi hélés me i ngéda nyañ ntôñ wés a bi kal me le ibale me gwé pééna, me nla nyodi mu i siksak (couvent) to imbe ngéda me ngwés. Me nhoñol le a bé kon woñi le me yé le me tinde bana bape i bana pééna kiki me. Jon me bi nyodi nyoo.

I ngéda me bi témb i mbai, bagwal bem ba bi nok me. Ndi kiki bibôlô bi bé bé i homa wés mbai, me bi ke i koba mankéé nu munlôm i Jaman. A bé i ntôñ u bôt ba communistes ba loñ i Panya ba ba bé yééne i Jaman. Ba bé kaa kunde inyu bôt ba bé sal ni inyu bôda. Me bé maséé i ba ni bo. Me sôk yila communiste, me biiba yak ni wada wap. Me bé kap bon ba bikaat, me kenek yak i mbégdé inyu kaa kunde. Me bé hoñol le me bé boñ loñge jam ngandak.

Ndi kiki ngéda i bé tagbe, me waa. Me bi tehe le communistes i bé boñ bé i yom ba bé kal. Me bi lôôha ki tomb i ngéda i nwii 1971, ngim boñge ba wanda mu i bi ha hié i consulat i Panya i Francfort inyule ba bé bé maséé ni i mam loñ i Panya i bé boñ. Me bi tehe le hala bé nyen mut a nlama boñ i ngéda a nsômbôl unda le a ta bé maséé.

I ngéda di bi gwal man wés nu bisu, me kal nlô wem le me nke ha bé mu biboma gwap. Me bi nôgda le me yé metama inyule liwanda jem to jada mu minlômbi nwem mi mawanda li bi lo bé i tehe me, to man wem mut a bi lo bé i béñge. Ha nyen me bi bôdôl badba inyuki mut a niñ? Baa i yé toi nseñ le bôt ba yéñ héñha nkoñ ’isi?

LELAA BIBEL I BI HÉÑHA NIÑ YEM:

I nwii 1976, Mbôgi Yéhôva iba i i yé bon Panya i bi koode likoga jés, i ti bés mimbamble, me yoñ. I ngéda ba bi témb ba lo kel ipe, me bi bat bo ngandak mambadga inyu jam li mandutu ni ngitelepsép. Hélha jam i yé le inyu timbhe mambadga mem momasôna ba bi gwélél Bibel! Hala a bi boñ le kunda yada, me bôdôl yigil i Bibel ni bo.

I bibôdle, me bé nigil ndik inyu bana yi. Ndi mam ma bi héñha i ngéda me bi bôdôl ke makoda ma Mbôgi Yéhôva me ni nlô wem. Ha i ngéda i, di bééna bon iba. Mbôgi Yéhôva i bé i lo, i yoñ bés inyu ke makoda, i bé hôla yak bés i tééda bon bés i ngéda di yé makoda. Hala a bi boñ le me gwés bo ngandak.

Ndi to hala, me bé me ngi gwé pééna inyu mam ma base. Me bi ke i pôdôs lihaa jem i Panya. Manyañ pua yem nu a bé pada a bi noode tômbôs me le me nigil bañ Bibel. Ndi, i Mbôgi Yéhôva i bé ha, i bi hôla me ngandak: i bi gwélél Bibel inyu timbhe mambadga mem, nlélém kiki i bet ba bé i Jaman. Ngéda me bi témb i Jaman me kit le me ntémb me bôdôl yigil yem i Bibel. Nlô wem a bi kena bé yigil ni bisu, ndi me me bi téñbe ni makidik me bi yoñ. I nwii 1980, me bi sôblana, me yila Mbôgi Yéhôva.

BISAI ME BI KÔS:

Nano nu me nyi maliga ma ma nlôl Bitilna, me nyi i yom me nlama boñ i niñ yem. Kiki hihéga, kaat 1 Pétrô 3:​1-4 i nkal le bôda ba ‘suhus’ bomede isi balôm bap, “lôñni njôôñ lipém” ba bana ki ‘mbuu u lima, u u gwé mahee ngandak i mis ma Nyambe.’ I nya mambén i, i bi hôla me i ba loñge nwaa ni loñge nyañ mbai.

Hala a yé 35 ma nwii len le me yé Mbôgi Yéhôva. Me yé maséé i gwélél Djob lôñni lôk kéé i bôda ni i bôlôm i i ngwés Yéhôva, téntén inyule ikété bon bem batan, ba-na ba ngwélél Yéhôva.