U hôiga bañ jam li nlôôha ba nseñ

1, 2. (a) Limbe jam li nlôôha ba nseñ li mbéñge hiki mut? (b) Inyuki i yé nseñ le diihe jam li?

INYU ngandak bôt i len ini, moni nwon mi yé jam li bisu i niñ yap. Niñ yap yosôna i yé ndigi inyu bok lingwañ tole sôñ nkus ba gwé. Bape ba nhoñol le jam li bisu i niñ li yé lihaa, mbôô tole mam makeñi ba nyônôs.

² Ndi i pot maliga, jam li li nlôôha ba nseñ li yé i nit kahap i Yéhôva i ngii bihégél gwé. Di nlama yoñ matat le di waa bañ tehe le kunde i Yéhôva i énél i yé nseñ ngandak. Lelaa hala a nla bôña? I yéñ likala jés li kel li nla bôdôl yuu bés, kayéle di hôya le kahap i Yéhôva i ngii bihégél gwé yon i yé jam li nlôôha ba nseñ. Tole di nla nwas le mandutu més ma yuu bés, i likala le, di hôya kii i nlama yoñ tel i bisu. Jam lipe li yé le, kiki d’a kônde diihe libak le Yéhôva nyen a gwé toi kunde i énél, hala a ga hôla bés i ba nkôôbaga inyu boma mandutu ma hiki kel. Ni i diihe di ndiihe kahap yé i ngii bihégél gwé i ga hôla bés i kôôge bebee ni nye.

INYUKI HALA A NLÔÔHA BA NSEÑ?

3. Mambe mahoñol Satan a gwé inyu énél i Djob?

³ Maboñok ma Satan Nsohop ma bi unda le a nkolba kahap i Yéhôva i ngii bihégél gwé. Satan a nlona pééna ikolba libak li Yéhôva li Bayemlikok. A nkal ki le énél i Djob i téé bé sép ni le Yéhôva a nim bihégél gwé mam malam. Inyu Nsohop, bôt ba binam ba bak le ba lôôha ba maséé ibale ba ban-ga kunde i énél bomede. (Bibôdle 3:1-5) Satan a nyéñ ki unda le mut to wada a ntéñbe bé ni Djob ni ñem wé wonsôna, ni le ngéda mut a yé ikété bañga bañga manoodana a nwaa nit énél i Yéhôva. (Hiôb 2:4, 5) Inyu unda le Satan a yé mut bitembee, Yéhôva a yé nwas ngéda le bôt ba binam ba tehe lelaa niñ i nlol ngéda ba nkôm énél yé mbus.

4. Inyuki Yéhôva a nlama unda le nyen a gwé kunde i énél?

⁴ I pot maliga, Yéhôva a nyi le bitembee gwon Satan a mpot. Ndi, inyuki a bi pohol i nwas le pééna ini i nom, letee a ti yak Satan ngéda inyu unda le bipôdôl gwé bi yé ntiik? Ndimbhe i mbadga i, i mbéñge biañgel ni bôt ba binam bobasôna. (Añ Tjémbi 83:19.) Adam bo Éva ba bi kôm énél i Djob mbus, ibôdôl ha, ngandak bôt ipe i noñ nlélém njel. Hala a nla tinde bahôgi i kalba le bebeg i jam Satan a nkal li yé maliga. Ntel wonsôna pééna ini i yii i mahoñol ma bôt ba binam ni ma biañgel, lisanda li yé mbén i mal ipôla biloñ, matén, mahaa, ni bôt bape. Ndi ngéda Yéhôva a ga unda le nyen a kôli énél, bihégél gwé gwobisôna bi ga suhus gwomede i mba ni mba i si énél yé i téé sép. Nsañ u ga ba homa nyensôna.​—Efésô 1:9, 10.

5. Kii di nla boñ inyu ba i pes i Yéhôva, ni i nit kahap yé?

⁵ Sôk i nsôk, Djob a’ unda le a kôli toi énél bihégél gwé. Énél i Satan ni i bôt ba binam i ga tjiba. I mbus hala, Djob a’ énél ni njel Ane i Mésia inyu lona bôt ba binam bisai. Bôt ba maliga ba ga unda le mut binam a nla yaga nit kahap i Djob i ngii bihégél gwé. (Yésaya 45:23, 24) Baa u nyéñ ba wada mu nsoñgi wap? Di yé nkwoog nkaa le ngôñ yoñ i. Jon, inyu ba mu nsoñgi u, di nlama bok mis mu jam li li nlôôha ba nseñ, ni tibil ki nok inyuki li gwé mahee.

KUNDE I YÉHÔVA I ÉNÉL I YÉ NSEÑ ILOO TOHI YÉS

6. Inyuki kunde i Yéhôva i énél i yé nseñ iloo tohi yés?

⁶ Kii di mbôk di kal, jam li nlôôha ba mahee inyu bôt ba binam li yé kunde i Yéhôva i énél. I jam li, li yé nseñ iloo loñge i mut binam. Ndi, baa hala a nsômbôl kal le tohi yés i gwé bé mahee? Baa hala a nkobla le Yéhôva a ntôñ toi bé bés? To jam. Inyuki di ntimbhe hala?

7, 8. Inyuki Yéhôva a nlama yônôs mimbônga nwé inyu unda le nyen a kôli toi énél bihégél gwé?

⁷ Yéhôva a nlôôha diihe bôt ba binam, ni gwés bo. A bi neebe i ti niñ i man wé inyu yible bés njel i tohi i boga. (Yôhanes 3:16; 1 Yôhanes 4:9) Ibale Djob a mpam bé i yônôs mimbônga nwé, Nsohop a ga bana njel i kal le Djob a yé mut bitembee nu a gwé énél i mbanda, inyule a nsôô bôt mam malam. Hala a ga ti yak bakolba ngui i nol bôt ba Djob hiol le: “Likak li malo mé li mboñ laa? Inyule ibôdôl ki botata ba ke ’ilo, ngo mam momasôna ma nke ndigi bisu, kikii ma ba iloo yaga bibôdôl bi bihégél.” (2 Pétrô 3:3, 4) Inyu hala nyen Yéhôva a ga yoñ bitelbene i unda le nyen a gwé kunde i énél bihégél gwé ni lona bôt ba binam tohi! (Añ Yésaya 55:10, 11.) Jam lipe li yé le, kiki énél i Yéhôva i yé énél i gwéha, jon di nla ba nkwoog nkaa le a ga gwés, a diihe ki bagwélél bé ngéda yosôna.​—Manyodi 34:6.

⁸ Ngéda di nkal le énél i Yéhôva i yé nseñ iloo tohi yés, hala a nkobla bé le di nyan tohi yés tole di nkal le i ta bé nseñ i mis mé. Di yé ndigi i bii hiki jam i tel yé. Hala a yé mahee ibale di nsômbôl yi limbe jam li nlôôha ba nseñ kayéle di yoñ makidik i nit énél i telepsép i Yéhôva.

BISAI I BANA LITEHGE LILAM

9. Kii Satan a bi kal inyu Hiôb? (Béñge titii i bibôdle.)

⁹ D’a tehe toi le di nlama kodol litehge jés ibale di nwan kaat i Hiôb, i i yé ikété bikaat bi bisu bi Bibel, ba bi tila. Mukété kaat i, di ntehe lelaa Satan a bi kal le ibale Hiôb a nkôhna bañga bañga manoodana, a yé le a kôm Djob mbus. Satan a bé gwés le Djob nyemede nyen a nôgha Hiôb njôghe. Yéhôva a bi boñ bé hala, ndi a nwas Satan le a noode Hiôb, a kal nye le: “Gwom gwobisôna a gwé bi yé i moo moñ.” (Añ Hiôb 1:7-12.) Hala a bi yoñ bé Satan ntandaa ngéda inyu boñ le Hiôb a nimis bagwélél bé, ligwañ jé, ni bon bé jôm a bé gwés. Satan a boñ le mandutu ma ma nene i mis ma Hiôb wengoñle Djob nyemede nyen a bé kogse nye. (Hiôb 1:13-19) Mbus Satan a ôm Hiôb kon u u nôgha njôghe, i boñok ki bôt nyega. (Hiôb 2:7) Hiôb a kônde ki nok njôghe ngéda nwaa ni mawanda mé maa ma bitembee ba bi leñ nye bibuk inyu tômbôs nye.​—Hiôb 2:9; 3:11; 16:2.

10. (a) Lelaa Hiôb a bi unda ndéñbe yé i pañ Djob? (b) Ndi hee a bi hôs?

¹⁰ I bi sôk yiba le bitembee yaga gwon Satan a bi pot. Hiôb a bi tjél kôm Djob mbus. (Hiôb 27:5) Ndi inyu ngim ngéda, Hiôb a bé tehe bé mam i nya i kôli. A bé lôôha yéñ unda le a yé mut telepsép, a nyéksaga yak Djob le a toñle nye inyuki a nok njôghe. (Hiôb 7:20; 13:24) Di nla nok nye mu kii di yi mandutu momasôna ma bi kwél nye. Ndi to hala, Djob a bi tehe le a nlama kodol mahoñol ma Hiôb. Kii Yéhôva a bi kal ni nye?

11, 12. (a) Yéhôva a bi hôla Hiôb i diihe kii? (b) Lelaa Hiôb a bi leege maéba ma?

¹¹ I mam Djob a bi kal Hiôb ma nyoñ bipes bina bi kaat Hiôb, ibôdôl i pes 38 i pam i pes 41. Ndi homa to wada, Djob a kal bé Hiôb inyuki mandutu ma yé kwél nye. Nlôm jam mu bibuk bi Yéhôva a bé bé i toñle Hiôb inyuki a bé nok ndutu wengoñle Djob a ntelep i bikééhene bisu bi Hiôb. Ndi Yéhôva a bé sômbôl hôla Hiôb i tehe le, ngéda a nhégha nyemede ni lipémba li Djob, a yé yañga. Djob a bi hôla ki Hiôb i yi le mam mape ma nlôôha ba nseñ iloo niñ yé. (Añ Hiôb 38:18-21.) Hala a bi hôla Hiôb i bana litehge lilam.

¹² Hiôb a bi nok njôghe iloo héga, yak Yéhôva a ti nye maéba ma ngui. Baa hala a nkobla le a bé nyéyéi nye? Heni! To Hiôb a bi hoñol bé hala. To hala kiki a bé ikété mandutu, Hiôb a bi sôk a diihe maéba ma. A nkal yak le: “Me ntam, me bôyi yaga i lipum li biték ni libu.” Ñ, Yéhôva a bi ti Hiôb maéba ma ngui, ndi ma bi ti nye hogbe. (Hiôb 42:1-6) Hiôb a bi bôk a kôs maéba mañge wanda le Elihu a ti inyu kodol nye. (Hiôb 32:5-10) I mbus ngéda, Hiôb a bi neebe maéba ma Djob, a kodol ki litehge jé, Yéhôva a bi kal i mbamba le a bé diihe ndéñbe Hiôb a bi unda ikété mandutu.​—Hiôb 42:7, 8.

13. Lelaa maéba ma Yéhôva ma bi bane Hiôb nseñ, yak ntandaa ngéda mbus le mandutu mé ma mal?

¹³ Maéba ma Yéhôva ma bi kônde lona Hiôb bisai yak ngéda mandutu mé ma bi mal. Lelaa hala a bi bôña? Bibel i nkal le: “Yéhôva a sayap lisuk li nom Hiôb iloo bibôdlene gwé.” Hala a bé lama yoñ ntandaa ngéda ilole a ntiimba kôhna mam a bi nimis. Bibel i nkal ki le:“A bana ki bon bôlôm basaambok, yak ni ba bôda baa.” (Hiôb 42:12-14) Ibabé pééna, Hiôb a bi ee bon bé ba bisu ba Satan a bi nol. Inyu ngim ngéda, a bé lama yaga nok njôghe ngéda a bé hoñol mandutu mé. Mbus ngéda, a bi tibil nok hee mandutu mé ma bé lôl. Ndi to hala, a bi lama badba too i bé toi nseñ le a nok ndutu ikepam letee ni nya likala i. To i ba yaga lelaa, i hoñol maéba ma Djob li bé ti nye hogbe. Hala a bé le a hôla nye i tehe mam i nya kôli, ni témbna maséé mé.​—Tjémbi 94:19.

14. Kii ñañ u Hiôb u niiga bés?

¹⁴ Ñañ u Hiôb u nla hôla yak bés i bana litehge lilam ni i kôs hogbe. Inyu hala nyen Yéhôva a bi gwés le u ba ikété Bibel, “le di kôs maéba mu, le ndi ikété hônba ni hogbe i nlôl bitilna di bana botñem.” (Rôma 15:4) Ñañ u u niiga kii bés? Pok: Di nwahak bañ le mam ma niñ yés ma yoña bés kayéle di hôya jam lini li nlôôha ba nseñ, li li yé i nit kunde i Yéhôva i énél. Di kon ki maséé le di nla nit kunde i Yéhôva i énél ibale di ntéñbe ni Yéhôva yak ikété mandutu, kii Hiôb a boñ.

15. Umbe nseñ ndéñbe yés i gwé i bisu bi manoodana?

¹⁵ Inyuki hala a yé nseñ le di diihe ndéñbe yés? Inyule hala a ñunda bés le di nok bé ndutu yañga. Kekikel, di hoñlak bañ le mandutu més ma nkobla le Yéhôva a ñunbene bés, ndi ma nti bés pôla i unda le di nit kunde i Djob i énél. (Bingéngén 27:11) Hônba yés i nti “mbôgi lam” i bisu bi Djob, i nlédés ki botñem yés. (Añ Rôma 5:3-5.) Ñañ u Hiôb u ñunda le Yéhôva “a yôni ni ñem ngoo ni konangoo.” (Yakôbô 5:11) Jon di nla ba nkwoog nkaa le Yéhôva a ga sayap bés loñni bôt bobasôna ba ba nit kunde yé i énél. Liyi hala li nhôla i “hônba ni wongut yosôna lôñni maséé.”​—Kôlôsé 1:11.

DI BÉÑGEGE NDIK BISU

16. Inyuki di nlama bigda mahee ma yé i nit kunde i Djob i énél?

¹⁶ I yé mbale le, i nla ba bés ndutu i tééda kunde i Yéhôva i énél kiki jam li bisu, téntén ngéda mandutu ma mpam bés i héya bitam. Yak mandutu ma yé kiki diléléba, ma nla nene makeñi kiki balom ibale u nha ñem mu. Jon hiki ngéda, i yé loñge le, di bigda mahee ma yé i nit kahap i Djob i ngii bihégél gwé, ngéda di yé ikété mandutu.

17. Inyuki i bana lem i yoñ ngaba i nson u Yéhôva, i nhôla le di hôya bañ le kunde i Yéhôva i énél yon i yé jam li bisu?

¹⁷ Bana lem i yoñ ngaba i nson Djob, i ga hôla we le u hôya bañ le kunde i Yéhôva i énél yon i yé jam li bisu. Kii hihéga, teñsion i bi bép kristen muda yada le Réné, a kon pos a nogok ki njôghe ngandak. Ngéda a bé i dokta inyu matibla, a bi tééne bi dokta, bakokon ni bayuuga bakokon likalô. I dokta jada, inyu sonde iba ni pes, a bi tégbaha 80 ngeñ i likalô. Yak i ngéda a bé bebee ni nyemb, Réné a bi hôya bé jam li nlama ba li bisu. Hala a bi hôgbaha yak ndutu yé.

18. Lelaa jam mankéé nu muda wada a bi kôs li ñunda inyuki i yé nseñ le di nit kunde i Djob i énél?

¹⁸ Ibabé pééna di yéñ ba bôt ba pégi i nit kunde i Yéhôva i énél yak i ngéda di mboma manoodana ni mandutu hiki kel. Mankéé wada le Jénnifer a bi tégbaha dilo diaa i bem avioñ nu a ntémbna nye i loñ yé. Ndi avioñ wé a bé lo bé. Kiki a bé nyetama a bak nwaak, a bé le a modop ha. Ndi kiki a bi bigda jam li nlôôha ba nseñ, a bi soohe Yéhôva le a hôla nye i tehe lelaa a nla gwélél ipôla i, inyu hôla bôt bape i pes mbuu mu kiki yak bo ba bé bem kiki nye. Mam ma bi sôk lelaa? A bi tééne ngandak bôt likalô, a kap ki ngandak bikaat. A nkal le: “Me bi nôgda le Yéhôva a bi sayap me mu ndutu yem, a ti ki me ngui i ti jôl jé lipém.” Ibabé pééna, a bi bok mis mé i ngii bitééne bi Yéhôva.

19. Kii litén li Yéhôva li mboñ inyu kahap yé?

¹⁹ I diihe kahap i Yéhôva i ngii bihégél gwé, i yé jam li mboñ maselna ipôla bañga base ni kwéha base. Litén li Djob li nit kahap i Djob ibôdôl behee. Kiki banit bañga base, matehge ma hiki wada wés ma nlama kiha ni Bitilna.

20. Lelaa Yéhôva a ntehe biliya gwoñ i nit kunde yé i énél?

²⁰ Ba nkwoog nkaa le Yéhôva a ndiihe biliya gwoñ i nit kunde yé i énél ni njel nson woñ nlam ni ndéñbe yoñ ikété mandutu. (Tjémbi 18:26) Yigil i noñ y’a kônde toñol inyuki di kôli nit kunde i énél i Yéhôva ni ñem wés wonsôna, i unda ki lelaa di nla boñ hala.