“Eea lôñni bôt ba ñee”

1, 2. Inyuki di nlama nigil lelaa di nla ti bôt ba nkôs maéa hogbe?

MANKÉÉ Susi a kal le: “Jam kiki bo nwii wada mbus nyemb lok yés, di bé nôgda njôghe i i nlôôha keñi.” Mankéé numpe le Christian, a kal mbus mpuhge nyemb i nwaa le, a bi nôgda “njôghe i i mbuña ñañ.” Ngoo le, ngandak bôt ipe i bi nôgda nlélém njôghe. I nla pam le ngandak i likoda i bé bé nkôôbaga i nimis mut nu ba ngwés ilole Armagédôn a nlo. Ibale u nimis mut nu u gwéhék ngandak, tole u nyi mut a gwé maéa, u nla badba le, ‘lelaa di nla hôgbaha i bet ba yé ikété ndutu?’

² Bebek u ma nok bôt ba nkal le ngéda yon i ntibil mam. Ndi, baa hala a yé maliga le ngéda yotama i nla mbuubaha ñem u u nyodop? Yik muda yada i kal le: “Me bi nôgda le i yé ntiik i kal le, i yom mut a mboñ ni ngéda a gwé, yon i nhôla nye i mbôôp.” Ñ, kiki mbabaa i minsôn, njôghe i kon mahoñol i nla hôgbaha mut ndék ni ndék, ibale di ntôñ ni yo. Limbe jam li tôbôtôbô li nla hôla bôt ba nimis bet ba gwéhék i mbuubaha njôghe ñem ba nôgda?

YÉHÔVA​—“NYAMBE NU LÉDÉSÑEM YOSÔNA”

3, 4. Inyuki di nla ba nkwoog nkaa le Yéhôva a nok mut nu a gwé ngôñ ni hogbe?

³ Ibabé pééna, lingen li bisu li hogbe li yé Isañ nu konangoo nu a yé ngii, le Yéhôva. (Añ 2 Korintô 1:3, 4.) Yéhôva, ndémbél i mbôk ni nsôk i mut nu a nôgda ndutu di nkôhna, a nkal litén jé ni maliga le: “Memede yaga nyen me yé nu a nhughe bé nyuu.”​—Yésaya 51:12; Tjémbi 119:50, 52, 76.

⁴ Isañ wés nu konangoo, yak nye a ma nimis bôt a bé gwés ngandak, kiki bo Abraham, Isak, Yakôb, Môsé, ni Kiñe David. (Ñañga Bôt 12:6-8; Matéô 22:31, 32; Minson mi baôma 13:22) Bañga i Djob i nyis bés le Yéhôva a nyamnda ni ngôñ i lona bawoga i niñ. (Hiôb 14:14, 15) B’a ba maséé, ba bak mbôô. Di béñge yak le, Man Djob a bé lôôha gwés​—‘nu a ba nye lingoñoo’​—a wo béba nyemb. (Bingéngén 8:22, 30) Bibuk bi nhañ inyu toñol njôghe Yéhôva a bi kôs.​—Yôhanes 5:20; 10:17.

5, 6. Lelaa Yéhôva a nla hôgbaha bés?

⁵ Di nla bana bôdôl i i nset bé le Yéhôva a ga nit bés. Jon, di nlama bé kon woñi i yiblene nye miñem nwés ikété masoohe, ni añle nye njôghe yés. Kinje hogbe i yi le Yéhôva a nok njôghe yés, ni le a nti ki bés hogbe di nlôôha bana ngôñ! Ndi lelaa a mboñ hala?

⁶ Njel yada Djob a ngwélél inyu hôla bés, i yé “hogbe i mbuu mpubi.” (Minson mi baôma 9:31) Ngui i Djob a ngwélél inyu boñ mam, i yé lingen li hogbe li li nlôôha lipémba. Yésu a bi bôn le Isañ nu a yé ngii a yé a nyamnda ni ngôñ i “ti bôt ba nyagal nye mbuu mpubi.” (Lukas 11:13) Susi nu di mbôk di sima, a nkal le: “Hala a bi pémél bés ngandak ngélé le di ôm maboñ isi, ni le di bat Yéhôva le a hôgbaha bés. Hiki ngéda di bi boñ hala, nsañ Nyambe u u nloo mahoñol momasôna u bi tat miñem nwés ni mahoñol més.”​—Añ Filipi 4:6, 7.

YÉSU​—PRISI IKEÑI I I NKÔNÔL BÉS NGOO

7, 8. Inyuki di nla bana bôdôl le Yésu a ga ti bés hogbe?

⁷ Ngap i Yéhôva i nôgda yom i ntééñga mut, i bi nene loñge loñge ikété bibuk ni maboñok ma Man wé Yésu, nu a bé kônôl bôt ngoo, ngéda a bé hana isi. (Yôhanes 5:19) Yésu a bi ôma hana isi, inyu ti “bôt ba miñem mi nyodop” ni “ba bobasôna ba nimis bôt”, hogbe. (Yésaya 61:1, 2, MN; Lukas 4:17-21) Jon, a bééna lem i kônôl bôt ngoo​—a bé tibil nôgda mandutu ma bôt, a bééna ki ngôñ ikeñi i mélés ndutu yap.​—Lôk Héber 2:17.

⁸ Ngéda a bé mañge wanda, Yésu a bi lama yi njôghe i nimis bôt ba lihaa, ni mawanda. I mpôôna le, Yôsep, isañ nu a bi néñés nye, a bi wo ngéda Yésu a bé a ngi yii mañge.a Hégda le Yésu ni ñem ngôô, bebek a ngi yii njohok mañge ni jam kiki bo jôm li nwii ni jam, tole 20 nwii ni jam, a nhônba njôghe yé nyemede, i nyañ lôñni i lôknyañ i bôda ni i bôlôm.

9. Lelaa Yésu a unda le a bé nôgda ndutu i bôt, ngéda Lazarô a bi wo?

⁹ Ngéda Yésu a bi bôdôl likalô jé, a bééna yi ikeñi ngandak, ni ngôô. Kiki hihéga, di hoñol ngéda liwanda jé li ñem nyuu Lazarô li bi wo. Tolakii Yésu a bé yi le a bé lama lona Lazarô bitugne, a bi nôgda njôghe ikeñi Maria bo Marta ba bé ba gwé. Hala a bi lôôha tihba nye, a nok ndutu ñem ngandak, kayéle a ee.​—Yôhanes 11:33-36.

10. Inyuki di nla bana bôdôl le Yésu a nkônôl bés ngoo i len ini?

¹⁰ Lelaa bibuk bi Yésu bi konangoo ni bi hogbe bi nla nhôla bés i len ini? Bitilna bi nkônde yis bés le: “Yésu Kristô a yé nlélém yani, ni len, ni kepam boga.” (Lôk Héber 13:8) Nye kiki “Nwet niñ,” a nyi toi i yom ba nsébél nok njôghe mut, “inyule lakii a son njonok ngéda nyemede a kôs manoodana, wee a nla hôla bôt ba nkôs manoodana” (Minson mi baôma 3:15; Lôk Héber 2:10, 18) Jon di nla ba nkwoog nkaa le Yésu a nke bisu i nôgda ndutu i bôt bape, i nok njôghe yap, ni i ti bo hogbe “ngéda mahôla ma nsômbla.”​—Añ Lôk Héber 4:15, 16.

“HOGBE I NLÔL BITILNA”

11. Bimbe bitilna u ntehe tôbôtôbô le bi nhôgbaha?

¹¹ Ñañ u njôghe ikeñi Yésu a bi nôgda ngéda Lazarô a bi wo, u yé ndik wada mu ikété ngandak miñañ mi hogbe mi mi nlébna ikété lipôdôl li Djob. Ni le, ni hel bañ, “inyule mam ma bôk tilba ngéda bisu, momasôna ma tilba ndik le di kôs maéba mu, le ndi ikété hônba ni hogbe i nlôl Bitilna di bana botñem.” (Rôma 15:4) Ibale u ntip nimis mut, u ga léba hogbe munu minlôñ mi Bibel mi noñ:

• “Yéhôva a yé bebee ni ba ba gwé miñem mi nyodop; a ntohol ki ba ba gwé miñem minsôhga.”​—Tjémbi 34:19, 20.

• “Ngéda nduña i mahoñol mem i mbôl, hogbe yoñ i nkônha ñem wem maséé.”​—Tjémbi 94:19.

• “Ndi Nwet wés Yésu Kristô nyemede, ni Nyambe Tata wés, nu a gwés bés, a ti ki bés hogbe i mal bé, ni loñge botñem inyu konangoo yé i mbuma ñañ, a hôgbaha miñem minan ni lédés ki bé.”​—2 Tésalônika 2:16, 17, MN.b

LIKODA ​—LINGEN LI HOGBE IKEÑI

12. Imbe njel di nla gwélél inyu ba lingen li hogbe inyu bôt bape?

¹² Lingen li hogbe lipe inyu bôt ba nkôs maéa li yé likoda. (Añ 1 Tésalônika 5:11.) Lelaa u nla lédés, ni ti i bet “ñem u siida” hogbe? (Bingéngén 17:22) Tééda mu mahoñol moñ le ngim “ngéda i mom nwee [i yé], ni ngéda i pot.” (Ñañal 3:7) Yik muda yada, nu ba nsébél le Dalène, a ntoñol le: “Bôt ba ntip nimis bôt, ba gwé ngôñ i pahal mahoñol map ni ndutu yap. Jon jam li nlôôha nseñ li u nla bôñôl mut a ntip kôhna maéa i yé le u emble nye​— ibabé i kit nye hop.” Junia, nu manyañ nu munlôm a bi nitba, a nkônde le: “To ibale u nla bé tibil nok ndutu yap, jam li yé nseñ li yé le, u unda bo le, u gwé ngôñ yi yom ba nôgda.”

13. Kii di gwé ngôñ bigda inyu njôghe maéa?

¹³ Hoñol ki le, hiki mut a nôgda bé njôghe i maéa nya yada, a mpahal bé to yo nya yada. Ngim mangéda, ndik ñem mut won u nôgda lôlha ndutu yé, i nla ki ba nye nledek i toñol yom a nôgda ikété kété. Bañga i Djob i nkal le: “Ñem u nyi yé yé lôlha ndutu, Ndi nkén mut a nha bé moo mu maséé mé.” (Bingéngén 14:10) Yak ngéda mut a ntoñol yom a nôgda, hala a mbéna bé ba ntombok jam inyu bape i nok yom a nsômbôl kal.

14. Lelaa di nla léba bibuk inyu hôgbaha bôt ba nkôs maéa?

¹⁴ Jon, i nla ba ndutu i yi kii di kal mut nu, njôghe maéa i yé nye nyonok ñem. Ndi to hala, Bibel i nkal le “hilémp hi mut pék hi yé mbôô nyuu.” (Bingéngén 12:18) Ngandak i bi léba biniigana bi bi nla hôgbaha bôt i man kaat ni hop pulasi le Quand la mort frappe un être aimé.c Ngim mangéda, mahôla makeñi momasôna di nla ti, ma yé le di ‘ee lôñni bôt ba ñee.’ (Rôma 12:15) Gabi, sita yada i i bi nimis nlôm a kal le: “Gwiiha bi bi yila hop u ñem wem. Jon me nkôs ngui ngéda mawanda mem ma ñee ni me. Ha ngéda i, me nôgda le me ta bé metama mu ndutu i.”

15. Lelaa di nla ti mut hogbe ngéda i nlédél bés i boma nye? (Béñge minkéñég mi matila ni ño nkwel le “Bibuk bi bi nhôgbaha.”)

¹⁵ Ibale hala a nlédél we i boma mut wemede inyu lédés nye, i nla ba jam li ntomb i ômle nye man lipep inyu ti nye hogbe, tilna nye ni njel internet, téléfôn, tole léta. U nla sima nlôñ kaat Bibel mu, hôñlaha nye bilem bilam tole libak li mut a nimis, tole bigdaha nye loñge ngéda ni bi tégbaha ntôñ. Mankéé Julia a nkal le: “I kôs man léta, tole neebe nsébla i tégbaha ngéda ni lôk kéé i mbuu, i nhôla me iloo buk i. Maboñok ma, ma mboñ le me nôgda le ba ngwés me, ni le ba ntôñ me.”

16. Imbe njel i nlôôha ba lam inyu ti hogbe?

¹⁶ Di yan bañ mahee ma masoohe més inyu bet ba nkôs maéa, ni ma di nsoohe ntôñ. Tolakii i nla ba ndutu i léba bibuk ha ngéda i, minyemhe nwés inyu yé, mi mi nla ke letee ni maéa, tole ni kiñ i nsehla, mi nla ba matibla makeñi inyu njôghe. Dalène a nkal le: “Ngim mangéda, ngéda bilôk bikéé bi bôda bi nlo i yuuga me, me yé me bat bo ibale ba nla soohe ni me. Bibôdle, bibuk gwap bi ta bi hoo bé lo, ndi mbus ba mpahal ndék bibuk, kiñ yap i mbôdôl nôga loñge, me nôgdaga le masoohe map ma nlôl toi ñem. Hémle yap i ngui, gwéha yap, ni tôñ ba ntôñ me, bi bi lédés me ngandak.”

KE NI BISU I TI BAPE HOGBE

17-19. Inyuki i mbéda le hogbe di nti i bet ba nkôs maéa, i ke ni bisu?

¹⁷ Bôt bobasôna ba nôgda bé njôghe i maéa nya yada. Jon, ba bebee i hôla, he ndik bé ngéda ngandak mawanda i yé ha, ni bôt ba lihaa. Ndi, yak i sôñ i noñ ha, ngéda bôt bobasôna ba nyodi, ba huu inyu boñ mam map. “Liwanda li ngwés ngéda yosôna; Manyañ a ngwééne ikété ndutu.” (Bingéngén 17:17) Bikristen bi nla ba lingen li hogbe inyu ngim mut, ntel ngéda yosôna njôghe i mpat nye ñem.​—Añ 1 Tésalônika 3:7.

¹⁸ Di bigda le ngim mam i mbéna tôdôl mahoñol yak bôt ba ba bi kôs maéa, kiki bo ngand mbigda hilo hi libii, ngim minsik, bifôtô, boñ ngim mam, ngim njiñ, tole ngim kék ikété nwii. Ngandak mam sobiina nu a nimis nlô wé, tole nwaa wé, a mboñ nyetama​—kiki bo i ke likoda likeñi, tole Bilôp bi Nwet​—i nla ti nye njôghe i tôbôtôbô. Mankéé wada a nkal le: “Me bé hoñol le ngand mbigda libii jem li bisu, i bé lama tééñga me ngandak mahoñol, i bé toi bé bun. Ndi ndék lôk kéé i bôlôm ni i bôda i bi boñ man ngand ni mawanda mem, inyu boñ le me nôgda bañ binyu.”

¹⁹ Tééda mahoñol le, to hala, bôt ba nkôs maéa, ba gwé ndik bé ngôñ ni makénd i mangéda ma tôbôtôbô. Junia a ntoñol le: “Ngim mangéda, mahôla ni tégbaha ngéda ntôñ, mangéda mape, i nla ba toi mahee. Ngéda u mpuhe mut hala, hala a nlôôha bane nye nseñ, a lona ki nye hogbe ikeñi.” I yé maliga le, di nla bé mélés njôghe yosôna mut a nkôs maéa a nôgda, to boñ le nyuu i sôgha ha bañ nye, ndi di nla lona nye ndék hogbe, ni lédés nye ngéda di nyoñ makidik i nit nye. (1 Yôhanes 3:18) Gaby a mbigda le: “Me nti Yéhôva mayéga ngandak inyu mimañ mi gwéha mi mi bi nit me mu i hiki pant i ndutu me bi kôs. Ba bi boñ me le, me nôgda woo u gwéha u Yéhôva i pañ yem.”

20. Inyuki mimbônga mi Yéhôva mi yé bañga lingen li hogbe ikeñi?

²⁰ Kinje hogbe di nkôs i yi le, Yéhôva, Djob li lédésñem yosôna, a ga héya njôghe yosôna, a ti ki hogbe i ga nom mba ni mba, ngéda “bôt bobasôna ba yé soñ b’a nok kiñ yé [Kristô], ndi b’a pam”! (Yôhanes 5:28, 29) Djob a mbôn le “a’ milba nyemb i mba ni mba, Nwet le Yéhôva a’ tos ki gwiiha masu map momasôna.” (Yésaya 25:8) Ha nyen, ilole di ‘ee lôñni bôt ba ñee,’ bayén hisi hiosôna ha ngéda i ba ga ‘kon maséé lôñni bôt ba nkon maséé.’​—Rôma 12:15.