3 Mahôla inyu hônba mandutu

I len ini, di gwé mandutu di nla bé keñgle, to yémbél. Kii hihéga, ibale u nimis mut u gwéhék, tole ibale u gwé kon u u mal bé, u gwé bé njel ipe, ndik le u hônba. Baa Bibel i nla lona mahôla inyu mini mintén mi njiiha?

NGWA KON

Rôsa nye: “Me gwé kon ikété matjél, u nôgha me njôghe ikeñi hiki ngéda. Niñ yem i bi ôbi.” Nduña yé keñi yada i bé le, ngim mangéda a bé bé le a bok mahoñol mé i yigil Bibel ni i mam ma mbuu mape. Ndi a bi kôs mahôla ni bini bibañga bi Yésu, bi mpémél i Matéô 19:26, nu a nkal le: “Ndi Nyambe a nla boñ mam momasôna.” Rôsa a bi nok le, a gwé ngandak manjel inyu nigil Bibel. Ngim mangéda, njôghe i bé boñ le, to añ, a bé la bé, jon a bi bôdôl emble lisoñgol li bikaat, ni lisoñgol li Bibel.a A nkal le: “Ibale i manjel ma, ma bak bé, ki me nyi bé kiki me bé le me boñ inyu tééda mbôô i pes mbuu.”

Mangéda mape, Rôsa a yé a modop, inyule a nla ha bé boñ kiki a bé boñ yôha; a nlébna hogbe mukété bini bibañga bi 2 Korintô 8:12: “Inyule ibale mut a nyégi yaga, wee ngôñ yé y’a lémél Nyambe, ibale a nti kingéda mam a gwé, handugi ma a gwé bé.” Bi nhôñlaha Rôsa le, i mam a mboñ hanano ma nlémél Nyambe, inyule a mboñ kii yosôna a nla, inoñnaga ni ngui yé.

NJÔGHE

Delfin, di mbôk sima, a mbigda le: “I mbus nyemb ngond yem i 18 li nwii, njôghe i bé ikeñi kayéle, me bé badba too m’a ke ni bisu i niñ. Mam ma bé ha bé nlélém.” Bini bibañga bi Tjémbi 94:19, bi bi lédés nye ñem, i het ntôptjémbi a nkal Nyambe le: “I ngéda nduña i mahoñol mem i mbôl, hogbe yoñ i nkônha ñem wem maséé.” A nkal le: “Me bé soohe Yéhôva le, a hôla me i léba mam ma ga hôyôs me njôghe.”

A bi neebe i sal ngim bôlô i het a mbem bé nsaa. I mbus ngéda, a bi kal le a yé kiki liwindi boñge ba ngwélél inyu pén bititii—to ibale li mbugi, li ngi yii nseñ inyu pén bititii. Nlélém kiki liwindi, to hala kiki njôghe i bi tômbôs nye, a bi sôk nok le yak nye a nla ti bôt bape mahôla. A nkal le: “Me bi pala nok le, ibale me mbôñôl matiñ tole biniigana bi Bibel inyu hôla i bet ba nigil Bibel ni me, hala a yé ngim njel Yéhôva a ngwélél inyu hôgbaha me ñem ni hôyôs me njôghe.” A bi tila môl ma bagwélél ba Nyambe, ba ba yé ikété Bibel, ba ba bi bana njôghe ikeñi i niñ yap. A bi léba le: “Bobasôna ba bé toi bôt ba bé béna soohe.” A bi nigil ki le: “Ibale u ñañ bé Bibel, u ta bé le u kôhna mandimbhe.”

Yigil Bibel i bi niiga ki Delfin jam lipe—le a béñge bisu, ndi he mbus bé. Botñem i nlébna i Minson mi baôma 24:15, i nhôgbaha nye, i nkal le: “Bitugne gw’a ba inyu ba ba téé sép ni ba ba téé bé sép.” I botñem i a gwé, le Yéhôva a ga tugul ngond yé, i gwé imbe ngui? Delfin a ntimbhe le: “Me yé tehe ngond yem. Di bi tina likak le di mbomna; hilo hi, hi yé ntilga ikété kalenda i Tata wem. Me ntehe bés boba ntôñ ikété wom mbônji, gwéha yem inyu yé, i bak nlélém kiki i ngéda bisu, i ngeñ a bi gwéé.”

a Ba nlébna masoñgol ma, i jw.org.

To ikété mangéda ma nlôôha mabe, Bibel i nla hôla bés i kôhna hogbe

LELAA NYAMBE A NLA HÔLA BÉS?

Ndimbhe Bibel i ntomb. I nkal le: “Yéhôva a yé bebee ni bôt bobasôna ba nsébél nye, ba bobasôna ba nsébél nye ni maliga. A’ yônôs ngôñ i ba ba nkon nye woñi, a emble nlondok wap, a tohol ki bo.” (Tjémbi 145:18, 19) Baa hala a nlédés bé ñem? Ndi lelaa Nyambe a ntimbhe masoohe ma bôt ba ba yéñ toi le a éga bo?

Libim li ngéda, mandutu ma nla mélés makénd més ni ngui yés—i pes minsôn, i mahoñol ni i mbuu. (Bingéngén 24:10) Ndi Yéhôva “a yé a nti mut nwaaga ngui, yak mut a nyi bé pémbép.” (Yésaya 40:29) Ñôma Paul, nu a bi hônba manoodana ma ngui, a bi kal le: “Me gwé ngui i boñ mam momasôna inyu nu a nlédés me.” (Filipi 4:13) Paul a bi kôs ngui ni njel mbuu mpubi u Nyambe. Yak we, u nla bat mbuu mpubi u Nyambe.—Lukas 11:13.

Kii i yé le i hôla we i nok ni i bii maéba ma Bibel bisélél? Nnigil Yakôbô a nkal le: “Ibale wada ikété nan a nhañ ni pék, wee a yagal yo Nyambe nu a nkébél bôt bobasôna ibabé yahal bo, ndi a’ kôs.” (Yakôbô 1:5) Ibale u ñañ Bibel, u biyak ki biniigana gwé bisélél, bibôñôl gwoñ bi nla kiha ni masoohe moñ. (Yakôbô 1:23-25) Ibale di mboñ hala, di ga pam i nok le maéba mé ma yé lingen li pék.

To ibale njôghe i nsiidaha we ñem ngandak, Yéhôva a nla hôla we i bana nsañ. Bañga yé i nkal le: “Ni tôñ bañ inyu jam jo ki jo, ndi yiha Nyambe mam ni nsômbôl, ni ti ki nye mayéga manjel momasôna i ngéda ni nsoohe nye ni yemhe nye. Ndi nsañ Nyambe u u nloo mahoñol momasôna w’a tat miñem minan ni mahoñol manan i Kristô Yésu.” (Filipi 4:6, 7) Inyuki u ta bé le u bat Yéhôva le a ti we nsañ?

Ndi w’a boñ lelaa, ibale mandutu moñ ma mpala bé tagbe? U hoñol bañ le Nyambe a ntjôô we. To ibale mandutu ma nom, Nyambe a nla ti we makénd ni ngui bi kôli inyu hônba ma mandutu. (1 Korintô 10:13) Bibel i mbôn ki le, ngim ngéda i ga pam le mandutu ma ga ba ha bé, i mba ni mba!