Mambadga Ma Basoñgol

Inyuki i ta bé kunde i tjam bikaat bi Mbôgi Yéhôva i site yés bésbomede, tole i kap gwo ni bôt bape i internet?

Kiki di nti bikaat gwés ibabé i saa, bahogi ba nhoñol le ba nla yoñ gwo inyu bii gwo bisite internet bipe, tole i kap gwo ni bôt bape ni njel internet. Ndi, ngéda di mboñ hala, di mbôk matéak ni kunde inyu ligwéélak li bisite gwésa, hala a ma lona yak ngandak ndutu. Kiki matéak ma ligwéélak li site yés ma ntoñol, mut nye ki nye a ta bé kunde i “yoñ bititii, bikaat, ngim biyimbne, minsik, bifôtô, bividéô, tole gwom bipe mu site internet ini, inyu tjam gwo i internet.” Inyuki ba nsôñga i boñ hala?

Watchtower nyetama nyen a gwé kunde i ngii gwom gwobisôna bi mpam bisite gwés. Bôt ba matjank, ni bakolba maliga bape ba ngwélél bikaat gwés i bisite gwap inyu lop Mbôgi Yéhôva ni bôt bape ki. Bôt ba, ba nha gwom mu bisite gwap inyu tinde basoñgol i pééna biniigana bi Bibel. (Tjémbi 26:4; Bingéngén 22:5) Bape ba ngwélél bikaat gwés tole yimbne i site yés le jw.org, inyu hôñôs manyuñga map, ni bisélél bi nhôla i gwélél téléfôn ni tafel. Ngéda Watchtower a ntéé bikila inyu ligwéélak li biyimbne gwé, hala a yé inyu boñ le bôt ba bep bañ gwélél gwo. (Bingéngén 27:12) Ndi ibale di nkôôba ti bôt kunde, tole bilôk bikéé, i bii bikaat gwés i bisite bipe, tole i gwélél yimbne ini le jw.org inyu nyuñga, ki bangomin ba ga hémle bé le di mboñ biliya inyu sôñga bakolba ni bôt ba nyuñga i gwélél gwo.

Yoñ bikaat gwés to hee homa numpe, handugi i site yés jw.org, i nla bane bés béba ngandak. “Nkol maliga ni u pék” wotama won Yéhôva a bi bééga nson u jés bôt i pes mbuu. (Matéô 24:45) “Nkol” u, u ngwélél ndik bisite gwé gwotama inyu tjam bijek bi mbuu​—kiki bo www.jw.org, tv.jw.org, ni wol.jw.org. Ni ki le di gwé ndigi bisélél biaa bi bi nyiba, inyu hôla bés i gwélél bitafel ni bi téléfôn​—hala wee JW Language^®, JW Library^®, and JW Library ni hilémb hi moo^®. Di nla ba nkwoog nkaa le bisélél bi, bi gwé bé mam ma nhôñôs nyuñga, to liton li mahindi li nkoñ isi u Satan. Ibale bijek bi mbuu bi nlôl manjel mape, di gwé bé yom yo ki yo ipe i i nkwés bés nkaa le ba nhéñha bé bibiniigana bi.​—Tjémbi 18:27; 19:9.

U kônde ki le, i bii bikaat gwés bisite bi minkwel i nti bôt ba matjañg, ni ba ba nyahal maliga pôla i tinde bôt i kon ntôñ u Yéhôva woñi. Ngim lôk kéé i bi kwo i hiandi hi minkwel ni njel internet, hala a bi pam i hindis jôl li Yéhôva. Ndi, minkwel ni njel internet mi ta bé njel lam inyu “niiga bakolba ni ñemlima.” (2 Timôtéô 2:23-25; 1 Timôtéô 6:3-5) Di nyimbe ki le, bôt ba bi bot bisite bi minkwel ni bipe ki i jôl li ntôñ, li Juu li bakena ntôñ, tole i jôl li ngim mut a nsal mu Juu li, ibabé le ntôñ u ti bo kunde. Ndi, ni nlama yi le, mut nye ki nye mu Juu li bakena ntôñ a gwé bé site yé yé nyemede, tole ngim site i minkwel.

I bat bôt le ba yuuga site yés le jw.org i nhôla i tjam “miñañ minlam.” (Matéô 24:14) Ntôñ u nke ni bisu i lémés bisélél bi di ngwélél inyu likalô. Di gwé ngôñ le hiki mut a ôt nseñ ni gwo. Jon kiki matéak ma ligwéélak i site yés ma nkal, u yé le u éble mut kaat i internet, tole u yé le u unda nye njel inyu léba jam mu jw.org. Ngéda di ntinde bôt ba ngwés maliga i yuuga bisite gwés, di ñunda bo mpom lingen li bijek bi mbuu, “nkol maliga ni u pék.”