Bôt ba likap ba yé kimasoda

1. Lelaa gwom Yéhôva a bi hek, bi ñunda le a gwé lem i kap?

YÉHÔVA a bé niñ ndugi nyetama behee. Mbus, a bi kit le, a nlama ti bihégél bi mbuu bipe ni bi minsôn likébla li niñ, a bi unda le a nhoñol ndik bé nyetama. ‘Djob li maséé’ le Yéhôva, li ngwés ti bôt gwom bilam. (1 Timôtéô 1:11; Yakôbô 1:17) Jon, kiki a ngwés le di ba maséé, a niiga bés i ba bôt ba nkap.​—Rôma 1:20.

2, 3. (a) Inyuki likap li nlona bés maséé? (b) Kii di ga wan munu yigil ini?

² Nyambe a hek mut i pôna yé. (Bibôdle 1:27) Di bi héga ni ngap i kôna bilem bi Djob. Inyu pam i bana bañga niñ ni i maséé, di nlama kôna lem i Yéhôva i tôñ ni bôt bape, ni i ba bôt ba nkap. (Filipi 2:3, 4; Yakôbô 1:5) Inyuki? Inyule gwéha i Yéhôva yon i bi tinde nye i hek bôt ba binam ni i lem i. Tolakii di yé bikwéha bi bôt, di nla pam i kôna likap li Yéhôva.

³ Bibel i niiga bés lelaa di nla ba bôt ba likap. Di wan le ndék biniigana bi Bitilna mu jam li. Mbus, di ga tehe lelaa i ba mut likap i nla hôla bés i lémél Djob, ni lelaa di nla hôlôs lem i, i i nhôla bés i yônôs nson Djob a bi ti bés. Di ga tehe ki maada ma yé ipôla lem i likap ni maséé més, ni inyuki di nlama ke ni bisu i hôlôs lem i.

LELAA DI NLA LÉMÉL DJOB?

4, 5. Imbe ndémbél Yéhôva bo Yésu ba bi yigle bés inyu likap?

⁴ Yéhôva a gwé ngôñ le bôt ba binam ba kôna nye, jon a yé maséé ngéda di nkap. (Efésô 5:1) Ngéda di ntehe lelaa di bi héga i nya i nhélhana, tole ngéda di ntehe bilama ni lingwañ bi hisi a bi ti bés ni gwom gwobisôna bi yé mu, di nôgda toi le Djob a bé gwés le bôt ba binam ba ba maséé. (Tjémbi 104:24; 139:13-16) Jon, di nti nye lipém ngéda di mboñ biliya i kônha bôt bape maséé.

⁵ Bañga bikristen i nkôna Kristô, nu a bi ti bés ndémbél i peles inyu unda bés lelaa mut a nla kap. Yésu nyemede a kal le: “Kiki Man mut a bi lo bé le ba gwélél nye, ndik le a gwélél bape, ni ti ki nom yé binoñ inyu ngandak bôt.” (Matéô 20:28) Jon, ñôma Paul a kal bikristen le: “Mahoñol Kristô Yésu a bana mo ki mon ma ba ikété nan . . . A sôdôs nyemede, a yoñ libak li nkol.” (Filipi 2:5, 7) Hiki wada wés a nla badba le: “Baa me nla kônde odop mu mabal ma Yésu iloo kii me yé me boñ yôha?”​—Añ 1 Pétrô 2:21.

6. Kii Yésu a bé sômbôl niiga bés ngéda a kééne ngén i loñge mut Samaria? (Béñge titii i bibôdle.)

⁶ Di nla lémél Yéhôva ngéda di nkôna ndémbél yé i peles, yak ni i Kristô, mu kii di yéñ loñge i bôt bape, di yéñék ki manjel i lôl bo mahôla. Ñ, ngéda a ti ngén i loñge mut Samaria, Yésu a unda le a bé gwés le banigil bé ba boñ kii yosôna ba nla inyu hôla bôt bape, yak i bet ba bé lôl bé homa wada ni bo. (Añ Lukas 10:29-37.) Baa u ngi bigdaga mbadga man Lôk Yuda a bat Yésu, i i bi tinde nye i kééne bo ngén i loñge mut Samaria? Man Lôk Yuda wada a bat nye le: “Njee a yé mut wem libôk?” Ndimbhe i Yésu i ñunda le di nlama ba bebee i ti ni ñem wés wonsôna kiki mut Samaria, ibale di ngwés lémél Djob.

7. Lelaa i tôñ ni bôt bape, i gwé maada ni mbadga keñi Satan a bi suu i wom Éden?

⁷ Bikristen bi gwé manjom malam i unda lem i likap. Kiki hihéga, lem i i gwé maada ni mbadga keñi Satan a suu i wom Éden. Lelaa hala? Satan a bé sômbôl kal le Adam bo Éva​—yak ni bôt ba binam bobasôna​—b’a lôôha ba loñge ibale ba nyéñ ndik i tôñ ni bomede, ni i bii gwéñe gwap bisu iloole ba nôgôl Djob. Ngôñ i yila kiki Djob yon i bi tinde Éva i ndogop. Yak Adam a bi bana ngôñ i lémél Éva. (Bibôdle 3:4-6) Makidik ma ma bi lona ndik mandutu di ntehe ibôdôl behee. Ibale mut a ntôñ ndik ni nyemede, hala a nlona bé nye maséé; ndik mandutu. Ndi ngéda di ñunda lem i likap, di ñéba le liboñok li mam li Djob jon li yé lilam.

YÔNÔS NSON DJOB A BI TI BAGWÉLÉL BÉ

8. Inyuki babiina ba bisu ba bé lama tôñ ni loñge i bôt bape?

⁸ Djob a ti babiina ba bisu biniigana bi bi bé lama hôla bo i hoñol loñge i bôt bape, tolakii ba bé botama i wom Éden. Yéhôva a bi sayap Adam bo Éva, a ti ki bo oda le ba gwal bon, ba yônôs hisi ni mbôda yap, ba tééda ki hio. (Bibôdle 1:28) Nlélém kiki Nhek a bé lôôha tôñ inyu loñge i bihégél gwé, hala nyen bagwal ba bisu ba bé lama yéñ loñge i bon bap, ba ba bé lama bana mbus ngéda. Hisi hiosôna hi bé lama yila Paradis, inyu loñge i mbôda i Adam. Nson nkeñi u, u bé bat le lihaa jé jolisôna li sal ntôñ ikété adna, tolakii li bé lama ke ni bisu i keñep.

9. Inyuki i kéñbaha Paradis i bé lama ti bôt maséé?

⁹ Inyu bôlôm ni bôda ba ba bé peles, i sal inyu kéñbaha Paradis i bé kobla le, ba bé sal ntôñ ni Yéhôva inyu hôla nye i yônôs bitééne gwé inyu hisi, mbus ba bé lama jôp mu bañga yé noi. (Lôk Héber 4:11) Hégda maséé ni lingoñoo ba bé le ba bana mu nson u! I ti bomede inyu loñge i bôt bape i bé lama lona bo ngandak bisai, ni mahak.

10, 11. Lelaa di nla yônôs nson u likalô ni u yilha bôt banigil?

¹⁰ I len ini, Yéhôva a nti litén jé nson u likalô ni u yilha bôt banigil. Inyu yônôs nson u, di nlama toi tôñ inyu loñge i bôt bape. Di nla ndik ke ni bisu i yônôs nson u, ibale bañga njom yon i ntinde bés​—hala wee gwéha i Djob ni i mut wés libôk.

¹¹ I hiai bisu N.Y., Paul a kal le, nye ni lôk kéé ipe ba bé “bagwelnson lôñ yada ni Nyambe,” inyule ba bé bel mbôô i Ane, ba kôbôk yo malép. (1 Korintô 3:6, 9) I len ini, yak bés di nla ba “bagwelnson lôñ yada ni Nyambe,” ngeñ di nti ngéda yés, bigwel gwés bi moo, ni ngui yés inyu yônôs nson ñañ nlam di bi kôs. Kinje nsima nkeñi di gwé!

12, 13. Bimbe bisai di yé le di kôs mu nson u yilha bôt banigil?

¹² I ti ngéda yés ni ngui yés inyu nson u likalô ni u yilha bôt banigil, bi nlona bés maséé makeñi. Ngandak batéé likalô i i ma bana nsima i tégbaha gwigil bi Bibel bi bi nhol i ga kal bé le, i ntehge bé mam mape ma nti mut maséé kiki li. Di nlôôha ba maséé ngeñ di ntehe mis ma mbuu ma banigil Bibel ma nyibla mu kii ba nok maliga, ba nañak ikété hémle, ba boñok mahéñha ikété niñ yap, ni ngéda ba nkwélés bôt bape yom ba nigil. Yésu a bi kôhna bañga maséé ngéda 70 banigil a bi om, “ba témb ni maséé” inyule likalô jap li bi tagbe loñge ngandak.​—Lukas 10:17-21.

¹³ Batéé likalô ikété nkoñ isi ba nkon maséé i tehe lelaa nwin u ñañ nlam u nhôla bôt i lona mahéñha malam i niñ yap. Di yoñ hihéga hi njohok sita yada le Anna, nu a yé ngi biiba, a bi yoñ makidik i ke i pes Likôl i Érôpa, het ba bééna ngôñ ni batéé likalô inyu kéñbaha nson wé likalô.a A nkal le: “I bana ngandak gwigil bi Bibel i yé jam li ntomb nyono, me ngwés ki nson u ngandak. Nson wem u nlôôha ti me maséé. Ngéda me nhuu mbai, me gwé bé me nduña yo ki yo. Me yé me hoñol ndik bôt me ni bo di ntip nigil​—hala wee mandutu map ni nduña yap. Me nyéñ manjel i ti bo makénd ni i lôl bo mahôla het ba gwé toi ngôñ. Ni njel i nyen me bi nôgda toi le ‘ti i yé masoda iloo yoñ.’”​—Minson mi baôma 20:35.

14. Lelaa di nla nok maséé mu nson wés likalô, to ibale ndék bôt ndigi yon i ñemble bés?

¹⁴ Di nla kôhna maséé ngéda di nti bôt pôla i leege miñañ minlam to ibale ba mpohol i tjél emble. Ngii mam momasôna, nson wés u mpôôna u mpôdôl Ezékiel, nu Yéhôva a kal le: “W’a pôdôs bo ni bipôdôl gwem, to ba ñemble to ba ntjél emble.” (Ezékiel 2:7; Yésaya 43:10) To ibale bôt bahogi ba neebe bé nwin di nlegel, Yéhôva a ndiihe biliya gwés. (Añ Lôk Héber 6:10.) Ntéé likalô wada, nu a bééna litehge lilam inyu nson likalô, a kal le: “Di mbel, di kôp malép, ndi di soohege le Yéhôva a hôlôs ngôñ i mut nu di ntééne likalô.”​—1 Korintô 3:6.

LELAA DI NLA BA MASÉÉ?

15. Lelaa ngandak bôt i mbéna yoñ i bet ba gwé lem i ti, baa liboñok jap li nlama héñha jés?

¹⁵ Yésu a ngwés le di kôhna maséé mu kii di nkap. I bak ki le ngandak bôt i mbéna nok maséé ni bôt ba gwé lem i likap. Yésu a ti maéba le: ‘Ni bana lem i ti, ndi y’a tina bé, hihéga hilam, nyohok, nsôghak, nyonok tes, hi sôbak, hion b’a hugbaha bé tôl. Inyule hihéga ni nhégél hion hi’a hégna ki bé.’ (Lukas 6:38) Ngéda di nti bôt bape, bobasôna bé bon ba ga ti bés mayéga. Ndi ngeñ di mboma bahogi ba ba nyi ti mayéga, libak jés li bôt ba yé bebee i ti, li nla tinde yak bo i boñ nlélém. Jon di nlama bana lem i ti, to ibale bôt ba nti bés mayéga tole heni. U nla bé yi kii liboñok joñ lilam jada li nla lona inyule u ñunda lem i likap.

16. Kii i nlama tinde bés i kap?

¹⁶ Bôt ba gwé toi lem i kap, ba nti bé bape ni mapida le yak bo b’a kôs. Yésu a bi hoñol jam li, ngéda a niiga le: “Ndi ngéda u naña ngand, sébél diyeyeba, ni bôt ba bilem, ni bibôk, ni ndim; “ndi w’a ba nsaibak; inyule ba gwé bé yom i timbhe we.” (Lukas 14:13, 14) Ntila Bibel wada a kal le: ‘Mut likap a’ saibana.’ Numpe a kal ki le: “Nu a nhoñol diyeyeba a yé kimasoda.” (Bingéngén 22:9; Tjémbi 41:2) Ñ, di nlama ti, inyule di nok maséé i lôl bôt bape mahôla.

17. Mambe manjel ma likap ma ga lona we maséé?

¹⁷ Ngéda Paul a bé bigda bini bibuk bi Yésu le, “ti i yé masoda iloo yoñ,” Paul a bé pôdôl ndik bé i kap gwom di gwé, ndi yak i ti bape makénd, tole maéba, ni i lôl i mahôla bet ba gwé ngôñ ni mo. (Minson mi baôma 20:31-35) Kiki hihéga, bipôdôl bi Paul ni maboñok mé, bi niiga bés bôô ni ngélé yañen i yé nseñ i ti​—ngéda yés, ngui yés, i bana nduña inyu bôt ni gwés bo.

18. Kii ngandak bôt ba njooñ yi ba bi kal inyu lem i likap?

¹⁸ Bôt ba njooñ yi ba ba nigil bilem bi bôt ba binam, ba bi yimbe le, lem i ti i nlona maséé. Inoñnaga ni yigil yap yada, “maséé ma bôt ma yé ma hol ngéda ba mbôñôl bôt bape loñge.” Bôt ba njooñ yi ba, ba nkal le, lem i hôla bôt bape i yé nseñ inyu bana “niñ i mahee, ni i i gwé ngim njômbi.” Jon ba bi ti bôt maéba le, inyu kéñbaha mbôô wap ni maséé map, i nla ba nseñ le bôt ba, ba boñ bôlô i i mbat bé le ba saa bo. Minyiña nwap mi nhélés bé bés, bés ba di neebe Bibel kiki Bañga i nlôl ni Nhek nu gwéha, le Yéhôva.​—2 Timôtéô 3:16, 17.

KE NI BISU I HÔLÔS LEM I LIKAP

19, 20. Mambe manjom ma ntinde bés i ba bôt ba nkap?

¹⁹ I nla ba nledek jam i tééda libak li mut a nkap, ngéda di yé nkéñék ni bôt ba ba nlôôha tôñ ni bomede iloo kiki ba ntôñ ni bape. Ndi, Yésu a bi kal le mambén ima ma ma nlôôha makeñi ma yé, le di ngwés Yéhôva ni ñem wés wonsôna, ni nom yés yosôna, ni mahoñol més momasôna, lôñni ngui yés yosôna, ni le di gwés mut wés libôk kiki bésbomede. (Markô 12:28-31) Kiki di ntehe munu yigil ini, i bet ba ngwés Yéhôva, ba nkôna nye. Yéhôva a gwé lem i ti bôt bape, yak Yésu a mboñ nlélém. Ba nti yak bés makénd i boñ nlélém, inyule ni njel i nyen di nla toi ba maséé. Ibale di mboñ biliya i unda libak li mut likap mu maada més ni Djob, yak ni mut wés libôk, di ga ti Yéhôva lipém, bés ni bôt bape, di kôs ki bisai.

²⁰ I yé ntiik le u bi bôdôl boñ biliya inyu bana lem i likap ni i hôla bôt bape ibôdôl behee, téntén lôk kéé yoñ i mbuu. (Galatia 6:10) Ibale u nke ni bisu i boñ hala, bôt b’a gwés we, ba ti ki we mayéga, sôk i nsôk u ga ba maséé. Kaat Bingéngén 11:25 i nkal le: “Mut likap a’ nuuha, yak nu a nkôp malép nye ki nyen b’a kôp malép.” I yé ntiik le, di nla gwélél ngandak manjel inyu unda le di nti ibabé nsoñgi wo ki wo mbus, le di gwé loñgeñem ni lem i likap, di nla yak unda hala ikété makas ma niñ yés ni i nson wés likalô, kayéle di pam i kôs ngandak bisai. Yigil i noñ ha, i ga toñol lelaa di nla boñ hala.