Kii Djob a bi boñ?

Ibale u nyéñ yi mut loñge loñge, i yé nseñ le u nigil mam a bi boñ ni lelaa a bi yémbél mandutu. Nlélém, ibale u nyéñ yi Djob loñge loñge, u nlama nigil mam a bi boñ. Kiki w’a kena biliya gwoñ ni bisu, bebek w’a ba nhelek ngéda w’a yi le mam a bi boñ kôba ma yéne we nseñ i len ini, ni ki le ma gwé maada lôñni bilôl gwoñ.

DJOB A BI HEK GWOM GWOBISÔNA INYU LOÑGE YÉS

Yéhôva Nyambe a yé Nhek Nunkeñi, nu “bilem gwé, bi nene loñge loñge ibôdôl i ngéda a bi hek nkoñ isi, inyule bi nene ni njel mam a bi hek.”(Rôma 1:20, MN.) “A hek hisi ni lipémba jé, a téé nkoñ isi lôñni pék yé, a wandal ki ngii lôñni yi yé.” (Yérémia 10:12) Bihélha bi mam Nyambe a bi hek bi ñunda le a ntôñ bés.

Yimbe lelaa Yéhôva a bi lémés niñ yés ni ini njel le a bi hek bôt ba binam “i pôôna yé.” (Bibôdle 1:27) Hala a nkobla le a bi ti bés pôla i unda bilem gwé bi bi mbuma ñañ ikété niñ yés to ibale hala a nene ndigi ndék sisii. A bi hek bés ni ngôñ i mam ma mbuu, hala wee ni ngap i nok manjel mé ni matiñ mé. Ibale di nliya i niñ inoñnaga ni matiñ ma, di ga ba maséé ni ki le niñ i ga lémél bés. Iloo mam momasôna, Djob a bi ti bés pôla i bana maada ni nye.

Hisi hi nhôla bés i yi mambe mahoñol Nyambe a gwéne bés. Ñôma Paul a kal inyu Djob le: “A bi bok yaga mbôgi inyu yé nyemede ni njel mam malam a mboñ, a tinak bé banop ba nlôl i ngii lôñni mangéda ma libumbul, a nuuhak bé ni bijek, a yônhak miñem minan ni maséé.” (Minson mi baôma 14:17, MN.) Inyu niñ, Djob a bi ti bés gwom iloo bi bi mbéda bés. A bi ti bés ngandak gwom mintén ni mintén inyu boñ le di nok lingoñoo li niñ. I gwom bi gwobisôna, bi yé ndigi dinyo malép di mam a nkôôbana bés.

Yéhôva a bi hek hisi inyu boñ le bôt ba binam ba niñ mu mba ni mba. Bibel i nkal le: “Hisi a ti hio bon ba bôt.” I nkal ki le Djob a “hek bé hio le hi ba yubda-yubda, ndi a ungus hio liyééne li bôt.” (Tjémbi 115:16; Yésaya 45:18) Inyu nwii nwañen? “Bôt ba téé sép b’a kôdôl hisi, ba yén ki mu mba ni mba.”​—Tjémbi 37:29.

Jon ni jon, Yéhôva a hek Adam bo Eva, bôt ba binam ba bisu, a ha bo i paradis hana isi ‘le ba ba ba salak yo, ba téédaga ki yo.’ (Bibôdle 2:8,15) Nyambe a kal ki bo le ba boñ mam ima ma bé loñge: “Gwala, ni bôl, ni yônôs hisi, ni suhus ki hio.” (Bibôdle 1:28) Jon, Adam bo Eva ba bééna botñem i niñ i boga ni boga hana isi. Ngoo le ba bi pohol i dogbene Nyambe, inyu njom i nyen ba bi nimis nsima i ba ipôla “bôt ba téé sép” ba “b’a kôdôl hisi.” Ndi kiki di ga tehe mu i bisu, ndok yap i bi héñha bé bitééne bi Djob inyu yés. Di bôk ndugi di wan yom ipe i Nyambe a bi boñ.

DJOB A BI TI BÉS BAÑGA YÉ

Bibel i nyiba kiki Bañga i Djob. Inyuki Yéhôva a bi ti bés Bañga yé? Njom i bisu i yé le, inyu nigil i yi nye. (Bingéngén 2:1-5) I yé maliga le Bibel i ntimbhe bé mambadga momasôna di nla badba inyu Djob​—kaat to yada i nla bé to. (Ñañal 3:11) Ndi, i mam momasôna Bibel i mpôdôl ma nhôla bés i yi Nyambe. Di ntehe njee a yé ni njel mam a mbôñôl bôt ba binam. Di nyi ki mintén mi bôt a ngwés ni mi a ngwés bé. (Tjémbi 15:1-5) Di nigil i yi litehge jé li mam inyu bibégés, bihiumul ni lingwañ. Ni njel bipôdôl ni maboñok ma Man wé Yésu Kristô nyen Bibel i ntibil yeelene bés libak li kétékété li Yéhôva.​—Yôhanes 14:9.

Njom ipe i i bi tinde Yéhôva i ti bés Bañga yé le Bibel i yé le, di nla yi lelaa di nla niñ kayéle niñ yés i ba ikété maséé, i ban-ga ki nseñ. Ni njel Bibel, Yéhôva a niiga bés lelaa lihaa jés li nla niñil ikété maséé, lelaa di nla kon maséé ni i yom di gwé, ni lelaa di nla kolba nduña. Kiki di bôk di kal munu mbamble unu, Bibel i ngwé madimbhe inyu mambadga makeñi ma niñ kiki bo: Inyuki mandutu ma nai ndigi, nai ni nai? Kii bilôl bi ntéédana bés? I ntoñle ki bés kii Nyambe a bi boñ inyu boñ le bitééne gwé bi yon.

Bibel i yé toi kaat i nhélhana​—kaat i i nlôl ni Djob​—yak ikété manjel mape. Môm ma-na ma bôt mon ma bi tila Bibel i héngéé ngéda i bo 1600 nwii, ndi to hala i gwé nlélém ño nkwel ndik inyule i nlôl ni Djob. (2 Timôtéô 3:16) Maselna ni minlômbi mi bikaat mimpe, Bibel i bi tibil téédana ikété tjai di tjai, yak minlômbi mi minhôôk mi bikaat mi mbok mbôgi hala. To hala kii ba bi noode kéñ yo, Bibel i bi pei i moo ma bôt ba ba bé sôña le i koblana, i tjama, i soñglana ki. I len ini, ikété bikaat gwobisôna, Bibel i yé kaat i nlôôha tjama ni koblana. Ibale Bibel i yii ikepam nano, hala a ñunda toi le “lipôdôl li Nyambe wés l’a siñip mba ni mba.”​—Yésaya 40:8.

DJOB A BI BÔN LE BITÉÉNE GWÉ BI GA YON

Jam lipe Djob a bi boñ li yé le a bi yoñ bitelbene bi tôbôtôbô inyu yis bés ntiik le bitééne gwé inyu bôt ba binam bi ga yon. Kiki di bôk di tehe, sômbôl i Djob i yé le bôt ba binam ba niñ hana isi i boga ni boga. Ndi ngéda Adam a bi pohol i ndogbene Djob, a boñ béba, a bi nimis pôla i bana niñ i boga he inyu yé nyetama bé ndi yak inyu bon a bé lama gwal. Jon Bibel i nkal i kaat Rôma 5:12 le: “Inyu hala ni nyen, kikii béba i jôp nkoñ ‘isi inyu mut wada, nyemb ki i lôl inyu béba, hala nyen nyemb i tôla bôt bobasôna, inyule bobasôna ba boñ béba.” Ndok i mut i bé kolba bitééne bi Djob. Kii Djob a bi boñ?

Maboñok ma Yéhôva ma bé kiha ni bilem gwé. A bi kit le Adam bo Eva bon ba bé ba bééga njom ni maboñok map, ndi ikété gwéha yé, a bi yoñ bitelbene inyu mbôda yap. Nlélém ngéda, Yéhôva a bi gwélél pék yé inyu léba njel inyu sañgal mam. (Bibôdle 3:15) Inyu kobol bôt i si béba ni nyemb, Djob a bi gwélél Man wé Yésu Kristô. Lelaa a bi pam i boñ hala?

Inyu hôla bôt ba binam i kobla i bikuu bi bi nlôl i ndok Adam, Yéhôva a bi om Yésu hana isi inyu niiga bôt njel i i nkena i niñ, ni i “ti ki nom yé binoñ inyu ngandak bôt.”a (Matéô 20:28; Yôhanes 14:6) Yésu a bé la ti binoñ inyule a bé peles kiki Adam. Ndi maselna ni Adam, Yésu a bi éba manôgla ma yôni ikepam i nyemb. Inyule Yésu a bé bé a kôli ni nyemb, jon Yéhôva a bi tugul nye inyu niñ i ngii. Nano, Yésu a bé la boñ i yom Adam a bi la bé boñ​—i ti bôt ba binam ba ba yé manôgla pôla i bana niñ boga. Jon Bibel i nkal le: “Inyule kikii ngandak bôt i yila baboñbéba inyu ndok mpom mut wada, hala yaga ki nyen ngandak bôt y’a yila bôt ba téé sép inyu manôgla ma mpom mut wada.” (Rôma 5:19) Ni njel sesema i binoñ Yésu a bi ti, Nyambe a ga yônôs mbônga wé le bôt ba binam ba niñ mba ni mba hana isi.

Di nigil ngandak inyu Yéhôva inoñnaga ni lelaa a bi boñ mbus le Adam a dogbene nye. Di ntehe le yom yo kiki yo i nla bé kéñ Yéhôva njel i mélés jam a mbôdôl boñ ikepam lisuk. Lipôdôl jé “l’a too.” (Yésaya 55:11) Di nkon ki maséé ni ngandak gwéha Yéhôva a ngwés bés. Bibel i nkal le: “Nyambe a solol gwéha yé inyu yés munu jam lini le a om pombe yé Man munu nkoñ ‘isi le di kuhul niñ inyu yé. Munu jam lini nyen gwéha i yéne, ha lana bé le bés bon di gwés Nyambe, ndi ndigi le nyen a gwés bés, a om ki Man wé le a ba bikwak inyu bibéba gwés”​—1 Yôhanes 4:9, 10.

Djob “a bañal bé hisingi singi hié Man, ndi a sem ndigi nye inyu bés bobasôna, lelaa ni a’ ti bé ki bés mam momasôna lôñni nye?” (Rôma 8:32) Kii Djob a bi bôn ki le a ga bôñôl bés? We kônde ki soñgol.