Lelaa u nla boñ inyu kôhna niñ i i nlel ini?

NIÑ di niñ len, i mpôôna bé i niñ Nyambe a bé sômbôl inyu yés i bibôdle. Ibale Adam bo Éva ba bi neebe i niñ kingéda sômbôl i Nyambe, ki hisi hi yôni ni bôt ba ba nit kahap yé, ba noñok maéba mé, ba niglege ki gwéha yé. Ba bé lama sal ntôñ ikété maséé inyu néñés bon, léba mam ma mondo ni yilha hisi hiosôna Paradis.

YÉHÔVA A MBÔN LE HISI HI GA BA KIKI A BÉ GWÉS LE HI BA I BIBÔDLE

• “A nsugus gwét letee ni lisuk li ’isi.”​—Tjémbi 46:10.

• “Ngéda i kola . . . i ôbôs ba ba ñôbôs ’isi.”​—Masoola 11:18.

• “Mut nye ki nye a nyééne mu nkoñ u a’ kal bé le: ‘Me nkon.’”​—Yésaya 33:24.

• “Mintebek nwem mi bôt ki nw’a togbene minson mi moo map ntandaa ngéda.”​—Yésaya 65:22.

Lelaa mbañ ini yosôna y’a yon? Nyambe a bi téé Man wé Yésu kiki Kiñe i ane ngii le a énél hisi hiosôna. Bibel i nsébél yo le Ane Nyambe. (Daniel 2:44) Ngéda i mpôdôl Yésu, Bibel i nkal le: “Nyambe a’ ti ki nye yééne ane . . . , a’ ba Kiñe.”​—Lukas 1:32, 33.

I ngéda Yésu a bé hana ’isi, a bi boñ ngandak bihélha bi mam ma ma bé unda le ngéda a’ ba Kiñe, a’ lémés biniñ bi bôt.

YÉSU A BI ÉBA I MAM MALAM A GA BÔÑÔL BÔT BA MANÔGLA

• A bi mélés mintén mi makon nwomisôna inyu unda lelaa a ga mélés makon ma bôt ba binam.​—Matéô 9:35.

• A bi mômôs tuye inyu unda le a ga tat bôt ba binam, inyule a gwé kunde i ngii ngiinda yosôna.​—Markô 4:36-39.

• A bi jés ngandak bôt inyu unda le a ga ti bôt ba binam i mam ba gwé ngôñ.​—Markô 6:41-44.

• I ngand libii, a bi héñha malép wai inyu unda le a ga boñ le bôt ba binam ba nok lingoñoo li niñ.​—Yôhanes 2:7-11.

Lelaa di nla kôs ntén niñ Nyambe a nkôôbana i bet ba ngwés nye? Njel yada i yé, i het u nlama kil. Bibel i mpôdôl i njel i, kiki “njel . . . i nke i niñ . . . ndék yon i nléba yo.”​—Matéô 7:14.

LELAA DI NLA LÉBA NJEL I BAÑGA NIÑ?

Kii i yé njel i nkena niñ? Nyambe a nkal le: “Men me yé Yéhôva Nyambe woñ, Nu a niiga we, le hala a bahle we, Nu ki a nhiômna we njel u kôli kil.” (Yésaya 48:17) Ibale u nôgôl maéba mana, wee u yé kil mu njel i, niñ yoñ ki y’a ba ilam kiyaga.

Yak Yésu a bi kal le: “Men me yé njel, me yé maliga, me yé ki niñ.” (Yôhanes 14:6) Ibale di mboñ mam Yésu a bi kal, di nigil ki ndémbél yé, d’a kôôge nye bebee, a’ lémés ki biniñ gwés.

Lelaa u nla léba njel i nkena niñ? Tolakii bibase bi yé ngandak, Yésu a bi béhe bés le: “Ha hi mut bé nu a nsébél me le ‘A Nwet, a Nwet,’ nyen a’ jôp ane ngii, ndik nu a mboñ sômbôl Tata nu a yé ngii.” (Matéô 7:21) A kal ki le: “N’a yil bo inyu matam map.” (Matéô 7:16) Bibel i nla hôla we i yimbe base i i niiga maliga ni i, i niiga bitembee.

Lelaa u nla kil njel i nkena niñ? Hala a nsômbôl kal le u nlama yi Nhek niñ: A yé njee? Jôl jé le njee? Umbe ntén mut a yé? Kii a yé bôñôl bés? Kii a mbat le di boñ?a

Ngôñ i Nyambe i ta ndik bé le bôt ba sal, ba je, ba tuk, ba gwal bon. Di nla yi njee mut Nhek wés a yé, ni yila liwanda jé. I ngéda di mboñ sômbôl yé, di ñunda le di ngwés nye. Yésu a kal le: “Niñ boga ini, le ba yi we bañga mpom Nyambe wada.”​—Yôhanes 17:3.

KII U NLA BÔDÔL BOÑ NANO INYU KIL MU NJEL NIÑ?

Ibale u nyéñ toi lémél bañga mpom Nyambe wada, u nlama héñha ngim mam i niñ yoñ. Hala a nla nene jam li nlet. Maliga ma yé le, i kil mu njel i i tomb bé, ndi niñ yoñ i ga kônde lama ibale u mbôdôl kil mu. Ibale u mbadba ngim mambadga inyu Nyambe, Mbôgi Yéhôva y’a ba maséé i hôla we i léba mandimbhe. Ni nla nigil Bibel ntôñ i ngéda ni homa ba nlémél we. U nla tilna bés ni njel sit yés internet www.pr2711.com.