Pohol Ane Djob nano!
Hégda le mbuk mbebi i nsômbôl hôñ nyoo libôga joñ. Ngomin i nti oda le: “KENA NGWÉÉ! NI SOLOP!” Bimbe bitelbene u nlama yoñ? Ibabé nkaa, u nlama yéñ homa lisolbene.
Yak bés di mbemb ngim “muk mbebi.” Yésu a bi sébél yo le “njiiha keñi.” (Matéô 24:21) Di nla ndik bé ke njiiha i ngwéé. Ndi di nla boñ ngim jam inyu pei. Limbe li jam?
Mu nkwel wé ngii hikôa, Yésu a bi ti oda ini: “Jon kena ni bisu i yéñ ndugi Ane lôñni telepsép i Nyambe.” (Matéô 6:33) Lelaa di nla noñ i oda ini?
Yéñ ndugi Ane Djob. Hala a nkobla le Ane Djob i nlama ba jam li bisu ikété niñ yés. (Matéô 6:25, 32, 33) Inyuki di nlama boñ hala? Inyule bôt ba binam ba nla bé mélés mandutu di mboma. Ndik Ane Djob yotama yon i nla mélés mandutu més.
Yéñ telepsép yé. Di nlama boñ kii yosôna di nla inyu nôgôl mambén ni matiñ ma Djob. Inyuki? Ibale bésbomede di nkit kii i yé loñge ni kii i yé béba, di ga boma bikuu. (Bingéngén 16:25) Ndi ibale di niñ inoñnaga ni matiñ ma Djob, di ga lémél ndik bé nye, ndi di ga kôhna yak bisai.—Yésaya 48:17, 18.
Kena ni bisu i yéñ ndugi Ane lôñni telepsép i Nyambe. Yésu a bi béhe bés le bahogi ba ga yéñ moni ba hoñlak le i moni mi, mi nla péyés bo. Bape ba nla nwas le mandutu ma niñ ma yuu bo kayéle ba bana ha bé ngéda inyu yéñ Ane Djob.—Matéô 6:19-21, 25-32.
Ndi Yésu a bi bôn le i bet ba nit Ane Djob ba ga kôhna i mam ma mbéda bo nano ni bisai bi boga i dilo di nlo.—Matéô 6:33.
Tolakii i hiai hi bisu, banigil ba Yésu ba bé ke ni bisu i yéñ Ane Djob ni telepsép yé, hala a nsômbôl bé kal le ba bé boma ha bé mandutu mu niñ yap. Ndi ba bé keñgle bikuu. Lelaa?
Kiki ba bé niñ inoñnaga ni matiñ ma Djob, ba bi keñgle bikuu bi bi bé pémél bet ba bé nôgôl bé Djob. Ba bé hémle toi le Ane Djob i yé le i hôla bo i hônba mandutu makeñi ma niñ. Yak Nyambe a bi ti bo “lipémba li li nloo li mut binam” inyu boñ le ba hônba.—2 Korintô 4:7-9.
BAA U GA YÉÑ NDUGI ANE DJOB?
Bikristen bi hiai bisu bi bi nôgôl oda i Yésu i yéñ ndugi Ane i Djob. Ba bi añal ñañ nlam u Ane ikété nkoñ ’isi wonsôna. (Kôlôsé 1:23) Baa ngim bôt i nsal i bôlô i len?
Ñ! Mbôgi Yéhôva i yé nkwoog nkaa le i yii ndék ngéda inyu boñ le Ane Djob i tjé bini biane bi nkoñ ’isi. Ba mboñ kii yosôna ba nla inyu nôgôl jam Yésu a kal: “Yak unu ñañ nlam u Ane w’a añlana ni nkoñ ’isi wonsôna, i ba biloñ gwobisôna mbôgi, ndi to le lisuk li nlo.”—Matéô 24:14.
Lelaa w’a leege ñañ nlam? Di nti we makénd i kôna ndémbél i bôt ba Béréa ba ba bé yén i tison i Makédonia. Ngéda ba bi nok ñañ nlam u Ane ñôma Paul a bi añle bo, ba bi neebe wo ni “ñem wap wonsôna.” Mbus ba bi ‘yoñ ngéda i tibil wan Bitilna’ inyu tehe ibale i mam ba bi nigil ma bé maliga, ba bii ki i mam ma i bisélél.—Minson mi baôma 17:11, 12.
Yak we u nla boñ nlélém. Ibale u nyéñ Ane Djob ni telepsép yé, u nla keñgle bikuu ibôdôl nano, u ga niñ ki ikété nsañ ni nwee i dilo di nlo.