Di Hôlôs Likeñge Jés Inyu Nson U Ñañ Nlam​—Di tek hikuu inyu mapeple

INYUKI HALA A YÉ NSEÑ:

Di ngwés kôp malép mu mbôô maliga di mbôk nwes. (1 Korintô 3:6) Jon ngéda di mboma mut a ndiihe ñañ nlam, i yé loñge le ndi yék mbadga yada di ga kwélél ngéda di ga témb inyu mapeple. Hala a ga kôôba nye inyu bem bés, ni tômbôs ngôôba yés bésbomede inyu mayuuga ma noñ. Ngéda di nlo inyu manyuuga, di nla kal nye le di nlo inyu timbhe mbadga di bi yék lisañ li bisu.

LELAA DI NLA MBOÑ:

• Ngéda u nkôôba likalô joñ li mandap ni mandap, kôôba mbadga yada i tihba ñem, i ga kôs ndimbhe i mapeple ma nlo. I nla ba ngim jam le i gwé ndimbhe mu kaat u yé ti i kel i. Tole ngim mbadga i gwé ndimbhe ikété kaat yigil yada u ntjek le w’a gwélél inyu bôdôl yigil ni bôt, ngéda w’a tiimba yuuga bo.

• Ngéda u mélés nkwel woñ ni mut a ndiihe maliga, yis nye le u gwé ngôñ le ni kena nkwel nan ni bisu, ha ni nyen bat mbadga u nkôôba. Yoñ nomba yé nsinga ibale a yé le a ti we yo.

• Ibale u nti nye ngeñ i tôbôtôbô inyu lipeple, yônôs mbônga woñ.—Matéô 5:37.