Hôla nigil Bibel i keñgle bilôñ bibe

Inyu yila mawanda ma Yéhôva, i bet ba nigil Bibel ba nlama tjôô bilôñ bibe. (Tjémbi 15:1, 4) I bana bilôñ bilam i ga hôla bo i boñ mam ma nlémél Yéhôva.—Bingéngén 13:20; lff pes 48.

Ngéda u nhôla banigil Bibel i nwas bilôñ bibe, u nlama bana hônba. Hala a ta bé jam li ntomb inyu yap i nwas bilôñ gwap bi behee. U héya hilo we ni bo ni nigil Bibel, u nlama tégbaha mangéda mape ni bo. U nla tilna bo man kaat, u nla sébél bo i téléfôn, tole u nla yuuga bo. Mu kii banigil ba nke ni bisu i hol, u nla hôla bo i bot liwanda ni lôk kéé i likoda. Hala a nhôla bo i nok le to ibale ba nyék mawanda map ma behee, b’a kôs iloo i yom ba nimis. (Markô 10:29, 30) Yak we u nkon maséé i tehe litén li Yéhôva li nkeñep hiki kel.

BÉÑGE VIDÉÔ I GWÉ ÑO LE HÔLA I BÔT WE NI BO NI NIGIL BIBEL I KEÑGLE BILÔÑ BIBE, I MBUS TIMBHE MAMBADGA MANA:

• Kii i yé bilôñ bibe?— 1 Korintô 15:33

• Ngéda Neeta a bi naña Jade i tégbaha loñge ngéda ni bilôk bikéé, mambe mahoñol Jade a bi bana?

• Lelaa Neeta a bi hôla Jade i bana bilôñ bilam?