DI NIÑIK KIKI BIKRISTEN
Yoñ makidik ma ma nlémél Yéhôva
Di ngwés lémél Yéhôva hiki ngéda. (Bingéngén 27:11) Inyu pam i boñ hala, di nlama yoñ makidik ma ma nlémél Yéhôva to i ngéda ngim “Mbén” i tôbôtôbô i mpôdôl bé i jam li nsômbôl boñ. Ndi kii i nla hôla bés?
Bana lem i añ Bibel hiki kel. Hiki ngéda di ñañ Bibel, i yé wengoñle di ntégbaha loñge ngéda ni Yéhôva. Di ga tibil yi mahoñol ma Yéhôva i ngéda di mbéñge lelaa a bi tééda litén jé i ngéda kôba, ni i ngéda di wan dihéga di bôt ba ba bi boñ mam malam ni dihéga di bôt ba ba bi boñ mam mabe. I ngéda di nsômbôl yoñ makidik, mbuu u Yéhôva u nhôñlaha bés biniigana ni ngim matiñ di bi bôk di nigil mu Lipôdôl li Djob.—Yôhanes 14:26.
Boñ nyiña. I ngéda u nlama yoñ ngim makidik, badba le: Mimbe minlôñ mi Bibel mi nla hôla me i yi mahoñol ma Yéhôva munu jam lini? Soohe Yéhôva, boñ ki nyiña i bikaat bi ntôñ. Bii matiñ w’a léba i bisélél.—Tjémbi 25:4.
BÉÑGE VIDÉÔ I GWÉ ÑO LE DI NLAMA ‘LIGIP NGWÉÉ NI HÔNBA’—DI JE BAÑGA BIJEK, I MBUS TIMBHE MAMBADGA MANA:
Mambe mandutu i sita ini i bé boma?
Lelaa u nla gwélél bisélél gwés bi nyiña inyu hôla mut nu a mboma minlélém mi mandutu?
Umbe nseñ di ñôt i ngéda di mboñ nyiña nwaa le u nyoñ makidik?—Lôk Héber 5:13, 14