“Jon kena, ni yilha bôt . . . , banigil”

1-2. (a) Kii añgel i nkal bôda i soñ i Yésu? (b) Imbe oda Yésu a nti bo?

DI YÉ hilo 16 hi sôñ Nisan i nwii 33 N.Y, kegla tutu. Bôda ba ba ngwélél Nyambe ba yé ke i soñ i Yésu Kristô, ba konok woñi. Nano a yé bebee le dilo diba le Yésu Kristô a bi juba. Kiki ba mbol i soñ, ba nsômbôl hoo mim binunumba ni labinda, ndi ba yé nhelek i koba le soñ i yé hôlô! Ha nyen añgel i nkal bo le ngo Yésu a ntuge, i nkônde le: “A mbôk bé i bisu i Galiléa, nyoo nyen n’a tehe nye.”​—Matéô 28:1-7; Lukas 23:56; 24:10.

² Ngéda bôda ba nyodi i soñ, Yésu nyemede a nkôôge bo bebee, a kal bo le: “Kena, leglana lôktata nwin le ba ke i Galiléa, nyoo nyen d’a tehna.” (Matéô 28:10) Ibabé pééna, Yésu a nsômbôl ti bo biniigana bi yé nseñ ngandak, inyule i boma ini i yé jam li bisu a mboñ i mbus bitugne gwé!

BONJEE ODA I YÉSU I MBÉÑGE?

3-4. Kii i nyis bés le i oda Yésu a bi ti i kaat Matéô 28:19, 20 i bé béñge ndik bé baôma botama? (Béñge titii i lipep li bisu.)

³ Añ Matéô 28:16-20. Mu boma Yésu a bi naña, a bi lôôha pôdôl nson banigil bé ba bé lama sal i hiai bisu, u yak bés di nsal i len ini. Yésu a kal le: “Jon kena, ni yilha bôt ba biloñ gwobisôna banigil, . . . ni niigaga bo i nôgôl mam momasôna me bi ti bé oda le ni boñ.”

⁴ Yésu a ngwés le banigil bé bobasôna ba añal miñañ minlam. A bi kal bé le, ndik baoma botama bon ba bé lama noñ i oda i. Kii i nyis bés hala? Ngéda Yésu a bi ti i oda i, baôma botama bé bon ba bé ha hikôa hi Galiléa yokel. Bigda le añgel i bi kal bôda le: “N’a tehe nye [i Galiléa].” Jon i nene le yak bôda ba bé mu boma i. Ni ki le, ñôma Paul a bi kal le Yésu “a pémél iloo mbôgôl lôk kéé itan i nlélém ngéda.” (1 Korintô 15:6) Hee homa?

5. Kii kaat 1 Korintô 15:6 i niiga bés?

⁵ Ngandak mam i ntinde bés i hoñol le Paul a bé pôdôl i boma Yésu a bi naña i Galiléa. Mambe? Jam li bisu li yé le, libim li banigil ba Yésu li bé bon ba Galiléa. Jon hala a bé jam li ntomb i kot ngandak bôt i Galiléa, ilole ba bomna i ndap mankéé wap wada i Yérusalem. Mam ma nyônôs ima ma yé le, i mbus bitugne gwé, Yésu a bi bôk a bomna ni baôma bé 11 yak mankéé wada i Yérusalem. Ibale Yésu a gwés le ndik baôma botama bon ba téé likalô, ba yilha ki bôt banigil, ki a kal bo hala ngélé yada ngeñ a boma bo i Yérusalem. Ki a bi bat bé baôma, to bôda, to bôt bape le ba boma nye i Galiléa.​—Lukas 24:33, 36.

6. Lelaa kaat Matéô 28:20 i ñunda le i oda Yésu a bi ti le ba yilha bôt banigil i mbéñge yak bés i len ini, ipam limbe likala bôt ba noñ i oda i?

⁶ Mam ma nyônôs maa ma yé le, oda Yésu a bi ti le ba yilha bôt banigil i bé béñge ndik bé bikristen bi hiai hi bisu. Kii i nyis bés hala? Yésu a bi mélés nkwel wé ni bini bibañga le: “Me yé ni bé dilo tjodisôna letee ni mamélél ma nkoñ ’isi.” (Matéô 28:20) Kiki Yésu a bi kal, nson i yilha bôt banigil u yé i séla ni nkoñ ’isi wonsôna. Hoñol ki! Bebee le 300 000 bôt i nsôblana hiki nwii!

7. Kii d’a pôdôl nano, inyuki?

⁷ Ngandak bôt i i nigil Bibel i nhol ikepam i sôble. Ndi i nene le, bape ba ba nigil Bibel ni bés ba nkon woñi i yila banigil ba Kristô. Ba ngwés yaga yigil, ndi inyu boñ le ba hol ipam i sôble, nje bo nje. Ibale u gwé yigil i Bibel, ngôñ yoñ i yé le u hôla i mut nu i bii mam a nigil bisélél, u hôla ki nye i yila nnigil Kristô. I yigil ini i ga niiga bés lelaa di nla tis miñem mi bôt di niiga Bibel, ni lelaa di nla hôla bo i hol i pes mbuu. Inyuki di nlama pôdôl i jam li? Inyule ngim mangéda y’a sômbla le di yoñ makidik i téé yigil tole i kena yo ni bisu.

HÔLA NNIGIL BIBEL I GWÉS YÉHÔVA

8. Inyuki i nla ba ndutu ngim mangéda i hôla nnigil Bibel i gwés Yéhôva?

⁸ Yéhôva a nsômbôl le bôt ba gwélél nye inyule ba ngwés nye. Jon di nlama hôla i bôt di niiga Bibel i yi le Yéhôva a nlôôha tôñ hiki wada wap, a ngwés ki bo ngandak. Di nlama hôla bo i tehe Yéhôva kiki “isañ bon ba nyuu, ni nu a nkam biyik bi bôda.” (Tjémbi 68:6) Kiki banigil Bibel ba nke ni bisu i tehe gwéha i Yéhôva, hala nyen ba ga kônde gwés nye. Hala a nla ba ndutu inyu banigil Bibel bahogi i tehe Yéhôva kiki Isañ wap nu gwéha inyule basañ bap ba bi unda bé bo gwéha. (2 Timôtéô 3:1, 3) Ngéda u niiga bo Bibel, yigye bilem bi Yéhôva. Hôla bo i nok le Nyambe wés nugwéha a nsômbôl le ba kôs niñ boga, a yé ki bebee i hôla bo i kôs yo. Kii ipe di nla boñ?

9-10. Bimbe bikaat di nlama gwélél inyu niiga bôt Bibel, inyuki?

⁹ Gwélél bini bikaat le “Kii Bibel i niiga bés?” ni “Lelaa di nla tééda bésbomede ikété gwéha Nyambe.” Bikaat bini bi bi tilba tôbôtôbô inyu hôla i bet ba nigil Bibel i gwés Yéhôva. Kiki hihéga, pes bisu i kaat yés le Niiga bés i ntimbhe mambadga mana: Baa Djob a ntôñ toi ni bés tole a gwé nledek ñem? Kii Djob a nôgda ngéda bôt ba nok ndutu? Baa u nla ba liwanda li Yéhôva? Nano kii di nla kal inyu ini kaat le Gwéha Nyambe? I kaat i i nhôla nnigil Bibel i tehe le ibale a noñ matiñ ma Yéhôva, niñ yé y’a kônde lama, a ga kôôge ki nye bebee. To ibale u bi nigil bikaat bi ni bôt bape, tibil kôôba hiki yigil, u hoñlak nduña i hiki nnigil.

¹⁰ Ndi hégda le nnigil a mbat we mbadga i i yé ikété kaat yés yada i i ta bé mu nkuu wés bisélél inyu niiga. Kii u nlama boñ? U nla ti nye makénd i añ yo nyemede inyu boñ le u kena yigil yé i Bibel ni bisu mu bikaat di mbôk sima.

11. Imbe ngéda di nlama bôdôl soohe bibôdle ni mamélél ma yigil, lelaa u nla jubus nkwel u?

¹¹ Bôdôl yigil ni masoohe. Libim li ngéda, ngéda di ntip bôdôl nigil ni mut, i yé loñge i bôdôl yigil i Bibel ni i kwés yo ni masoohe. Di nlama hôla nnigil Bibel i yi le di nla bé nok Bañga i Djob ngi mahôla ma mbuu mpubi. Inyu pôdôl jam li masoohe ni nnigil Bibel, ngim lôk kéé i ngwélél kaat Yakôbô 1:5, i i nkal le: “Ibale mut ikété nan a nhañ pék, a ke ni bisu i bat yo Nyambe.” I mbus, mankéé a mbat nnigil le, “lelaa di nla bat Nyambe pék?” Nnigil Bibel a yé le a timbhe le, di nlama soohe nye.

12. Lelaa u yé le u gwélél kaat Tjémbi 139:2-4 inyu hôla nnigil Bibel i yible Yéhôva ñem wé?

¹² Niiga nnigil Bibel i soohe. Yis nye le Yéhôva a yé maséé i emble masoohe mé. Kal nye le ngéda a nsoohe nyetama, a nla yible Yéhôva ñem wé ibabé i kon woñi, a pahle nye i mam ma ntééñga nye, ma a nla bé añle mut nye ki nye. A hôya bañ le Yéhôva a nyi mahoñol més ma kétékété. (Añ Tjémbi 139:2-4.) Di nla ki ti nnigil Bibel makénd i yemhe Djob le a hôla nye i tjél mahoñol mabe ni bilem bibe. Kiki hihéga, i nla pam le nnigil Bibel a ngi gwéhék mangand ma kwéha base. A nyi le ma yé mabe, ndi ngim mam mu i ngi lémlak nye. Ti nye makénd i pahlene Yéhôva i jam li, ni i bat Nye le a hôla nye i gwés ndigi mam a ngwés.​—Tjémbi 97:10.

13. (a) Inyuki di nlama pala naña banigil Bibel makoda? (b) Kii di nla boñ inyu boñ le nnigil Bibel a modop bañ i Ndap Ane?

¹³ Pala naña nnigil Bibel makoda. I mam nnigil Bibel a nok makoda, ni ma a ntehe ma nla tinde nye i gwés Djob ni i hol i pes mbuu. Unda nye i vidéô ini le Kii i ntagbe i Ndap Ane? i mbus naña nye. Ibale u nla, saane nye ndiyô. Hiki ngéda u nke nigil ni nye, kena bilôk bikéé bipe. Ni i njel i, a’ meya bilôk bikéé, hala ki nyen hiki ngéda a ga lo makoda, a ga nôgda wee a yé mbai yé.

HÔLA NNIGIL BIBEL I HOL I PES MBUU

14. Kii i nla hôla nnigil Bibel i hol?

¹⁴ Ngôñ yés i yé le di hôla nnigil Bibel i hol i pes mbuu. (Éfésô 4:13) Ngéda mut a neebe yigil Bibel, jam li bisu a yéñ yi li yé nseñ a ga kôs mu yigil i Bibel. Kiki a nke ni bisu i gwés Yéhôva, bebek a nla kahal yéñ i hôla bôt bape, yak ni bilôk bikéé bihogi. (Matéô 22:37-39) I ngéda pôla i nene, kal nye le yak nye a gwé nsima i nit nson u Ane ni njel makébla mé.

15. Lelaa di nla hôla nnigil Bibel i yoñ makidik malam ngeñ a mboma ndutu?

¹⁵ Niiga nnigil Bibel kii a boñ ibale ngimanôgla i mpam. Hégda le nnigil Bibel nu a yé ntéé likalô ngi sôblana, a nkal we le mankéé wada a ñunbaha nye. Iloole u témb nye pes, u nla toñle nye bitelbene a nla yoñ inoñnaga ni Bitilna. A nla nwéhél i mankéé nu, tole ibale hala nlôôha tééñga nye, a nla ke i tehe nye ni mahoñol le a ‘témbna nye i loñge njel.’ (Hégha ni Matéô 18:15.) Hôla nye i kôôba i yom a’ kal. Unda nye lelaa ba mboñ nyiña i JW Library^®, i jw.org ni i kaat ini le Ñéga inyu nyiña u bikaat bi Mbôgi Yéhôva. Ibale a nigil i sañgal mindañ ilole a nkôs sôble, hala nyen a’ pam i nôgla ni lôk kéé i likoda.

16. Inyuki i yé nseñ i kena lôk kéé ipe i tégbaha yigil Bibel?

¹⁶ Ngéda u nke tégbaha yigil yé, kena lôk kéé ipe tole ngwélél makiiña ngéda a yé ha. Inyuki? U héya manjom di mbôk sima, lôk kéé ipe i nla lona nye mahôla ma we u nla bé ti nye. Hégda le nnigil Bibel a mboñ biliya i nwas siga, ndi a mpam bé i nwas yo. Ngéda u nke i lôôs yigil yé, kena mankéé nu a bi jo sañ inyu nwas siga. Mankéé nu, a yé le a ti nnigil Bibel maéba ma ma nla hôla nye i nwas siga. Ibale u nkon woñi i tégbaha yigil bisu bi nhôôlak mankéé, kal nye le a lôôs yo yokela. Nnigil Bibel a nla ôt nseñ mu mam lôk kéé ipe i bi boma. Di hôya bañ le, ngôñ yés i yé le nnigil Bibel a hol i pes mbuu.

BAA ME NLAMA TÉÉ YIGIL?

17-18. Kii u nlama wan ilole u ntéé yigil?

¹⁷ Ibale u ntehe le nnigil Bibel a nhol bé, badba le: ‘Baa me nlama téé yigil?’ Mu kii u mba u nwan i jam li, u hôya bañ le bôt bobasôna ba gwé bé nlélém ngap. Ngim bôt i mpala hol, ndi bape ba nlôôha tiñha. Jon badba le: ‘Baa nnigil Bibel a nhol loñge inoñnaga ni ngap yé?’ ‘Baa a ma bôdôl bii i mam a nigil bisélél, tole “nôgôl,” mo?’ (Matéô 28:20) To ibale nnigil a nhol mbeñee mbeñee, mahéñha ma nlama nene mu niñ yé.

¹⁸ Kii di nla boñ ni mut nu a nigil Bibel hala a yé ntandaa ngéda, ndi di nôgda le a ndiihe bé yigil? Di yoñ hihéga hini: Nnigil Bibel a mal i kaat ini le Niiga bés?, bebek a mbôdôl yak ini kaat le Gwéha Nyambe, ndi a nkenek bé likoda to jada, to Bilôp bi Nwet! A yé ki bebee i bot manjom inyu so yigil. Ha ngéda i, i mbéda le u kal nye maliga.b

19. Imbe mbadga u nla bat nnigil Bibel nu a ngeñee yigil, kii u nlama tibil wan?

¹⁹ Inyu bôdôl nkwel, u nla bat nye le: ‘Kii i nkéñ we i yila Mbôgi Yéhôva?’ Nnigil a yé le a timbhe we le: ‘Me ntjél bé yigil, ndi me yé mbén i yila Mbôgi Yéhôva!’ Ibale a nigil hala a yé ntandaa ngéda, ndi a ban-ga i nya mahoñol i, nseñ i yé le u téé i yigil i. Ndi i nla pam le, nnigil Bibel a nkal we i jam li mboñ le a nhol bé. Kiki hihéga, a nla kal le a nkon woñi i téé likalô li mandap ni mandap. Ha ngéda i, kiki u nyi i jam li ntééñga nye, w’a yi lelaa u hôla nye.

20. Lelaa kaat Minson mi baôma 13:48 i nla hôla bés i yi too di nlama kena yigil ni bisu too di téé yo?

²⁰ Ngoo le, banigil Bibel bape ba mpôna bon ba Israel ba ngéda Ézékiel. Inyu yap nyen Yéhôva a kal le: “Ndi nun-ki! Wemede u yéne bo wengoñle mut a nyi tôp tjémbi, u gwé kiñ ilam, u yé ki mut bikôkôda. Inyule ba nok yaga bipôdôl gwoñ, ndi ba mboñ bé gwo.” (Ézékiel 33:32) Hala a nla lédél bés i kal mut le di nlama téé yigil yé. Ndi di hôya bañ le, “i ngéda i ngi yii i yé nhubuk.” (1 Korintô 7:29) Ilole di tégbaha ngandak ngéda i niiga bôt ba ba nhol bé, di nlama gwélél ngéda i inyu yéñ ‘ba ba gwé libak lilam inyu kôhna niñ boga.’​—Añ Minson mi baôma 13:48.

21. Pes kaat i nwii 2020 i mpémél hee, inyuki i kôli?

²¹ Pes kaat i nwii 2020 i ga hôla bés i hôlôs likeñge jés mu nson i yilha bôt banigil. I mpôdôl bini bibañga Yésu a bi pot mu nkwel wé i ngii hikôa hi Galiléa le: “Jon kena, ni yilha bôt . . . , banigil, ni sôblege bo.”​—Matéô 28:19.