Baa u yik hala?
Inyuki hala a bé loñge jam le bon ba Israel ba ti Yéhôva bakuku ni dibeñ kiki makébla?
MBÉN Môsi i bé kal le ba nla ti Yéhôva bakuku ni dibeñ kiki makébla. Ba nsima dinuni di tjo diba i ngéda ba mpôdôl makébla, ni le ba bé gwélél hinuni hiada i ngéda hii hipe hi ta bé. (Lôk Lévi 1:14; 12:8; 14:30) Inyuki hala a bé loñge jam? Njom yada i bé le ba bé hoo bé léba bakuku. Inyuki?
Kuku
Bakuku ba niñ ndik bé homa wada, ba bé béna niñ i loñ Israel i ngéda lék. Hiki sôñ Biôôm, ba nyodi i bahoma lék i yé inyu témb i loñ Israel i het bisem bi bé kahal nene. (Hiémbi hi Salômô 2:11, 12; Yérémia 8:7) I ngéda kôba i loñ Israel, hala a bé kobla le i bé ndutu i ti bakuku kiki makébla i ngéda mbéñ.
Hibeñ hi maa
Ndi, dibeñ tjo di bééna bé lem i ke bahoma bape, jon ba bé léba tjo to hee homa i loñ Israel. U héya hala, ba bé néñés dibeñ. (Hégha ni Yôhanes 2:14, 16.) Kaat yada i nyiña ni hop Ngisi le Bible Plants and Animals i nkal le “ba bé néñés dibeñ i mambai ni mambok momasôna i Palestine. Hiki ndap i bééna bon ba mandap i het ba bé néñés dibeñ.”—Hégha ni Yésaya 60:8.
Hibeñ i man ndap
Ni njel i, Yéhôva a bé unda le a yé Djob li gwéha nu a bé neebe le bon ba Israel ba ti nye dinuni di ba bé le ba hoo léba to imbe ngéda kiki makébla.