Me bi tehe kiki Yéhôva a nsayap bagwélél bé

Hala a bi nôlha me, inyule a bé pôna bé me mut a nyi mam ma base. Me bi bat nye le: “Kii we u nyi mu Bibel?” A bi mom ndugi nwee, i mbus ngéda a yis me le nyañ a yé Mbôgi Yéhôva, nyen a bi niiga nye mam ma. Me bééna ngôñ i nok Bibel, jon me bi kal nye le a kônde añle me.

Di bi kwel bebee le u wonsôna. Liwanda jem li bi kal me le Satan nyen a ñane nkoñ ’isi. (Yôhanes 14:30) Bebek bé ni nyi hala behee, ndi me, yokel nyen me bi yi hala, me kon yak maséé. Me bé yi le Nyambe nyen a ñane nkoñ ’isi, ndi i mam me bé tehe ma bé boñ le me hoñol le maliga bé ma. Me bééna ndik 26 nwii ndi me bé me ma tehe mam mabe ngandak.

Pua yem a bé luk avioñ nu bisônda bi Amérika. Jon i ngéda me bé mañge, me bé yi le to imbe ngéda gwét bi nla bôô, bisônda bi bé bebee i leñ bombe. Gwét bi bé i Vietnam i ngéda me bé i université i Californie. Me bi jôp i nlôñ u baudu ba ba bé kaa kunde. Bisônda bi bi noñ bés, bi kôp bés gaz, di ke ngwéé di hébék makeñi, di bé tehna ha bé to loñge. Yubda i bé ha ngéda i, ni nkaa kunde. Bôt ba bé ba nkolba baane, ba nolok bo. Ha ngéda i, bôt ba bé nôgla bé. Ba bé yi bé kii ba nla boñ.

I nwii 1970, me bi bôdôl sal i ñombok u Alaska me kôhna ngandak moni. Ha nyen me bi ke i Londres, me somb tutus, me bôdôl ke minhiômôk. I mbus ngéda, me bi bol i Afrika. Me bi léba le yak nyoo i pes mbok i, bôt ba gwé mandutu, ba nyi bé kii ba nla boñ.

I mam me bi tehe ni ma me bi nok ma bi boñ le me hémle i jam Bibel i nkal, le Satan nyen a ñane nkoñ ’isi. Ndi me bé badba le kii Nyambe a mboñ?

I mbus ngéda, ba bi timbhe mbadga yem. Ngéda i bé tagbe bañ, me boma ngandak lôk kéé i bôda ni i bôlôm i i bi gwélél Yéhôva i ngéda ilam ni i ngéda ibe.

I IRLAND DU NORD​—“BÔT BA BÉ LEÑ BOMBE BA LEÑEK NGAA”

I ngéda me bi témb i Londres, me boma nyañ liwanda jem, a ti me Bibel. I mbus ngéda, me bé i Amsterdam i Pays-Bas, mankéé wada a tehe me me ñañ Bibel a bôdôl niiga me. A bé a yii, me ke i Dublin i Irland me tehe hikuu hi loñ hi Mbôgi Yéhôva. Me koode. Ha nyen me bi boma Arthur Matthews nhôôlak mankéé, me kal nye le me nsômbôl nigil Bibel, a neebe nigil ni me.

Me bi bôdôl añ ngandak bikaat bi Mbôgi Yéhôva, me añak yak Bibel. Me bé gwés me ñañ. I ngéda me bé ke makoda, me bi yimbe le yak boñge ba nyi mam bôt ba nyi kaat ba nyi bé. Mambadga kiki bo: ‘Inyuki béba nai i nkoñ ’isi? Njee a yé Djob? Kii i ntagbe i mbus nyemb?’ Me bé kiha ndik ni Mbôgi Yéhôva, inyule ndik bon me bé yi mu loñ i yosôna. Ba bi hôla me i gwés Yéhôva ni i boñ sômbôl yé.

Me bi kôs sôble i nwii 1972. I nwii u bé noñ ha, me bi yila nsañal. Me ke i man likoda nu a bé i Newry i ñombok u Irland. Me bé yééne i ngim ndap i ngii hikôa, me saak yo. Nyaga i bé ha ipañ, me bé kôôba minkwel nwem i bisu gwap. Ba bé ba jek ba nunuk me. Ba bé nok bé to yom mu, ndi me bé tiimba minkwel nwem, me nunuk bo wengoñle me yé i ndap Ane. I nwii 1974 me bi yila nsañal nu tôbôtôbô, me bé lôñni Nigel Pitt nu a bi yila liwanda jem.

Gwét bi bé nnayak ha ngéda i i Irland du Nord. Jon bôt ba bi sébél i loñ i le: “Loñ i bombe ni dikoñgo di ngaa.” Bôt ba bé ba njo bisañ i ñem nloñ, ba leñek ngaa, ba lighak matôa. Mindañ mi bé nnayak ikété bibase ni bôt ba pôlitik. Ndi Lôk Sañgô ni Lôk Pada ba bé yi le Mbôgi Yéhôva i ta bé mu mam ma pôlitik, jon ba bé nwas bés le di añal ñañ nlam. I bôt di bé ke i yuuga i mandap map ba bé yi i het gwét bi yé, jon ba bé ba yis bés inyu boñ le di solop.

Ndi ngim mangéda, di bé kon woñi. Kel yada, me ni nsañal wada le Denis Carrigan di bé i likalô homa wada i het Mbôgi Yéhôva i bé bé. Di bé di ma téé likalô nyoo ngélé yada ndigi. Muda wada a bi kal le di yé bisônda bi loñ Ngisi, bebek inyule to wada wés a bé pot bé kiki bôt ba Irland. Di bi kon woñi. Inyule ibale mut a bé to liwanda li sônda, ba bé le ba nol nye, tole ba ôm nye ngaa i maboñ. Di bé di yii ha mbégdé bésbotama di konok woñi, ha nyen di bi tehe litôa li nlo ha homa muda nu a bi ôm bés nsohi. A bi pam a kwel ni bôt iba ba bé mu matôa, a nand bés hinoo ni makénd momasôna. I bôt ba ba bi kôôge bés bebee, ba bat bés ngim mambadga inyu jam li matôa. I ngéda litôa di bé bem li bi lo, ba ke ba pôdôs i nwet a bé luk jo. Di bi nok bé to kii ba bé pot. Kiki bôt bape ba bé bé mu matôa ma, di bé hoñol le ba bé nôgla inyu boñ bés béba. Ndi ba bi boñ bé bés to jam. I ngéda me bi pam mu matôa ma, me bi bat nluk matôa le: “Baa i bôt ba, ba bé bat mambadga inyu yés?” A timbhe me le: “Me nkal bo le me nyi bé loñge loñge. Jon ni ntôñ bañ. Ba mboñ bé bé to yom.”

I nwii 1976 i likoda li ndôn i Dublin, me bi boma nsañal nu tôbôtôbô le Pauline Lomax, nu a bi lôl i loñ Ngisi. A bé gwés Yéhôva, a bak suhulnyuu, a bak ki nlam? Bona manyañ nu munlôm le Ray ba yé i ntôñ u Yéhôva ibôdôl nu ba bi gwéé. I nwii u bé noñ ha, me ni Pauline di bi biiba, di kena nson wés u basañal ba tôbôtôbô i Ballymena, i Irland du Nord.

Di bé i nson u makiiña i Belfast Londonderry ni i bahoma bape gwét bi bé. I ngéda di bi tehe lôk kéé i bôda ni i bôlôm i i bi nyodi mu bibase gwap, i nwas mbagla ni ôa inyu yila bagwélél ba Yéhôva, hala a bi lôôha tihba bés. Yéhôva a bi tééda bo loñge, a sayap ki bo.

Me bi yén i Irland jôm i nwii. I nwii 1981 ba bi naña bés i suklu Giléad i yônôs 72. I ngéda di bi pam i suklu Giléad, ba ep bés i Sierra Leone, i pes hiôñg i Afrika.

I SIERRA LEONE, LÔK KÉÉ I BÉÉNA HÉMLE TOLAKII BA BÉ YEP

Di bé niñ i ndap bi missionnaire ni 11 lôk kéé ba ba bé gwés Yéhôva. Di bééna ndik kishin yada, biluk baa, mandap ma jogop ima, téléfôn yada, mashin wada, homa wada inyu jôwa mbot, ni homa wada inyu bamb mbot. Ba bé ba nkit mapubi nyoo hiki ngéda, batôlô ba bé ngandak i ngii ndap, nyoo i bak isi ndap.

Tolakii niñ i bé let, likalô li bé kônha bés maséé. Bôt ba bé gwés Bibel, ba emblege bés, ngandak i bi nigil, i yila Mbôgi Yéhôva. Ba bé sébél me nyoo le “Sañgô Robert,” ba séblak Pauline le “Nwaa Robert.” Ndi i mbus ngéda, bôlô Bétel i bé yoñ me ngéda, me bé ha bé i likalô ngandak, jon ba bi bôdôl sébél Pauline le “Nyañgô Pauline,” ba séblak me le “Nlôm Pauline.” Pauline a bé gwés hala le!

Ngandak lôk kéé i bé yep, ndi Yéhôva a bé tééda bo. Ngim mangéda, a bé boñ hélha jam. (Matéô 6:33) Me nhoñol lisañ jada, sita yada i bééna ndik moni mi bijek inyu yé ni bon bé, ndi a bi yoñ moni mi nwominsôna a ti nwo mankéé nu a bééna ngôñ ni bee bi lihep. I mbus ngéda, muda wada a bi lo yak sita i, a ti nye moni le a kañ nye ño. Me bi tehe i nya mam i ngandak ngélé.

I NIGÉRIA​—I BÉ SÔMBLA LE DI MEYA BILEM GWAP

Di bi boñ nwii bôô i Sierra Leone. I mbus ba ep bés i Bétel i Nigéria, yo i yé ikeñi ngandak. I bôlô me bé sal i Bétel i Sierra Leone yon ba bi ti me i Bétel i Nigéria, ndi bôlô i Pauline i bi héñha, hala a bé bé bun to ndék. A bé lôôs 130 ma ngeñ i likalô, a ban-ga ngandak gwigil bi Bibel. Ndi i Nigéria, ba bi ep nye i mbañgô, a bé kôñôl mbot ngim kel yosôna. I bi béda nye ngéda inyu meya, ndi a yik léba le lôk kéé i nkon maséé ni bôlô yé. A bé boñ kii yosôna a bé la inyu lédés lôk kéé ipe i Bétel.

I bé béda le di meya bilem bi Nigéria. Kel yada, mankéé wada a bi jôp i burô gwem, a unda me sita yada i i bi tip jôp i Bétel. I ngéda me bi lo i yéga nye, a ôôp i bisu gwem. Me bi hel! Me hoñol minlôñ mi Bibel mini: Minson mi baôma 10:25, 26 ni Masoola 19:10. Me badba le ‘Baa me nlama kal nye le a boñ bañ hala?’ Ndi me hoñol le, ngo ba neebe le a sal i Bétel, a nek bé i yom Bitilna bi nkal.

Ñem u bé ha bé me mu nkwel u, i mbus ngéda me jôp i nyiña. Me yik nok le i jam a bi boñ, ngandak bôt i bé boñ jo ngim bahoma mu loñ yap ha ngéda i. Yak bôlôm ba bé boñ hala. Ba bé boñ hala inyu ti bôt bape lipém, ha inyu bé le ba bé sômbôl bégés bo kiki Djob. Yak Bibel i ñunda le ngim bôt i bi boñ hala. (1 Samuel 24:8) Me bi kon maséé le me bi hoo bé pot, inyule me bé le me wéha i sita i nyuu.

Di bi boma lôk kéé nyoo i Nigéria i i bi gwélél Yéhôva nwii ndi nwii. Wada wap a yé Isaiah Adagbona.a A bi yila Mbôgi Yéhôva a bak mañge wanda, a bé a yii, lô i gwel nye. Ba bi om nye i homa ba ntibil bôt ba lô, nyetama nyen a bé Mbôgi Yéhôva nyoo. Tolakii ba bé kolba nye, a bi hôla iloo 30 ma bakon lô i yi Yéhôva, a bot yak likoda nyoo.

LÔK KÉÉ I KENYA​—I BI HÔNBA ME

I nwii 1996, ba bi ep bés i Bétel i Kenya, me bé ngi témb nyoo ibôdôl nu me bi ke nyoo ngélé i bisu kiki me nkal bé i bibôdle. Di bé yén i Bétel. Kôi i bé béna lo nyoo. Lisañ jada, sita yada i Bétel i bi yék winda yé i néhi, kiki a bi lo, a koba ngandak kôi i nje bijek gwé. A lond makeñi a pam. Kôi i pam i ngwéé ni ngwéé.

Me ni Pauline di bi ke i likoda ni hop Swahili. I mbus ngéda, ba bi kal me le me bôdôl kena Étude du livre (i ba nsébél nano le yigil i Bibel i likoda). Ndi me bé nok bé bañga jam mu hop u. Me bé me kôôba ndugi yigil inyu yi lelaa me nla añ mambadga. Ndi i ngéda mankéé a bé a ti ndimbhe i i ta bé mu kaat, me bé nok bé me to yom. Hala a bé tééñga me le! Me bé hoñol le hala a ntééñga lôk kéé. Ndi ba bi nwas me le me kena yigil ibabé i tjelel, hala a bi tihba me ngandak.

LÔK KÉÉ I AMÉRIKA I BÉ NGWAÑ​—NDI I BÉÉNA HÉMLE I NGUI

Di bi boñ bé to nwii wada i Kenya. I nwii 1997 ba bi ep bés i Bétel i Brooklyn, i New York. Nyoo, lôk kéé i bééna moni kiki lisege, ndi moni mi nlona maséé mi lon-ga ndutu. (Bingéngén 30:8, 9) To hala, ba bé gwés Yéhôva. Ba bé gwélél ngéda yap ni nkus wap inyu nson u Yéhôva, ha inyu yéñe yap bomede bé.

Munu nwii mini nwominsôna, di ntehe kiki lôk kéé i gwé hémle i ngui ikété maséé ni mandutu. I Irland, lôk kéé i bi unda hémle tolakii gwét bi bé. I Afrika lôk kéé i bi unda hémle ikété liyep ni mandutu mape. Lôk kéé i Amérika i bé ngwañ, ndi i bééna hémle i ngui. Yéhôva a yé maséé ngandak i ngéda a ntehe bôt ba mboñ sômbôl yé i ngéda ilam ni i ngéda ibe!

Ngéda i nhoo tagbe “iloo kék i moo ma mut a mbañ mabadô.” (Hiôb 7:6) Nano di nsal i Hikuu hikeñi hi Mbôgi Yéhôva, i Warwick i New York, di yé maséé i sal ntôñ ni lôk kéé i i ngwéhna. Di yé maséé i boñ kii yosôna di nla inyu Kiñe yés Yésu Kristô nu a ga bom banigil bé ndék ngéda.​—Matéô 25:34.