“Tiblana hek pék, yéna ki péé!”

1. I ngéda Yésu a bé pôdôl lisuk li nkoñ ’isi, kii a bi kal banigil bé?

NDÉK ngéda ilole Yésu a nwo, banigil bé ba-na ba bi bat nye le: “Kii y’a ba yimbne . . . le i nkoñ ’isi unu u yé i mamélél?” (Matéô 24:3) I nene le ba bé sômbôl yi i ngéda tison Yérusalem ni témpel bi bé lama tjiba. I ngéda Yésu a bé timbhe bo, a bi pôdôl ndik bé tjiba i Yérusalem ni témpel ha ngéda i, a bi pôdôl yak ‘mamélél ma nkoñ ’isi.’ Hala wee munu ngéda yés. A bi kal bo le: “Inyu kel i ni ngeñ i, mut to wada a nyi bé yo, to biañgel i ngii, to Man, ndik Isañ.” Ha nyen a bi kal banigil bé bobasôna le ‘ba yén péé ibabé waa.’​—Markô 13:32-37.

2. Inyuki i bé sômbla le bikristen bi hiai hi bisu bi yén péé?

² I bé sômbla le bikristen bi hiai hi bisu bi yén péé inyu pei. Yésu a bi kal bo kii i bé lama yis bo le tjiba i Yérusalem ni témpel i yé bebee. A bi kal le: “I ngéda n’a tehe mintôñ mi gwét mi nkéña Yérusalem, wee yina le tjiba yé i nkôôge bebee.” Ha nyen i bé sômbla le ba nôgôl bibañga bi Yésu, “ba bôdôl ke ngwéé i dikôa.” (Lukas 21:20, 21) I bôt ba bi nôgôl Yésu, ba bi pei i ngéda Lôk Rôma i bi tjé Yérusalem.

3. Kii di ga pôdôl munu yigil ini?

³ Di yé i mamélél ma i béba nkoñ ’isi ini. Jon, yak bés di nlama tibil hek pék, di yén ki péé. Munu yigil ini, di ga tehe lelaa di nla yén péé, di salak inyu bana maada malam ni Yéhôva. Di ga tehe ki lelaa di nla yoñ yihe ni bésbomede, ni lelaa di nla gwélél i ngéda i yii bés.

DI YOBA BAÑ NGÉDA DI NTEHE I MAM MA MBÔÑA MUNU NKOÑ ’ISI

4. Inyuki di nlama yoñ ngéda i béñge lelaa mbañ i Bibel i nyon?

⁴ Di kôli yoñ ngéda i béñge lelaa mbañ i Bibel i nyon. Yésu a bi pôdôl ngim mam i y’a éba le lisuk li nkoñ ’isi u Satan li nkôôge bebee. (Matéô 24:3-14) Yak ñôma Pétrô a bi kal bés le di yoñ ngéda i béñge lelaa mbañ i Bibel i nyon, inyu boñ le di bana hémle i ngui. (2 Pétrô 1:19-21) Bibuk bi bisu bi kaat Masoola bi yé le: “Masoola ma Yésu Kristô, ma Nyambe a bi ti nye le a unda minkol nwé i mam ma nlama bôña ndék ngéda.” (Masoola 1:1) Jon, di kôli yoñ ngéda i béñge i mam ma ntagbe i nkoñ ’isi, ni i tehe lelaa mbañ i Bibel i nyon. Di gwé ki ngôñ i pot i mam ma ni bôt bape.

5. Kii di nlama bé boñ, ndi kii di nlama boñ? (Béñge yak bititii.)

⁵ Ndi, di nlama bé hoo pot i ngéda di ntehe i mam ma ntagbe i nkoñ ’isi. Inyuki? Inyule di yé le di pot jam, li lona mbagla i likoda. Kiki hihéga, baane ba nkoñ ’isi ba yé le ba kal le ba ga boñ le nsañ u ba, woñi u ba ha bañ. Di hoo bañ pot le mbañ i i yé i kaat 1 Tésalônika 5:3 yon i yé yon. Di yéñ i yom i ntôñ u bi sôk kal mu jam li. I ngéda minkwel nwés mi umne i biniigana bi ntôñ, hala a mboñ le di niñ ikété adna, di ban-ga “nlélém hoñol.”​—1 Korintô 1:10; 4:6.

6. Kaat 2 Pétrô 3:11-13 i niiga kii bés?

⁶ Añ 2 Pétrô 3:11-13. Ñôma Pétrô a ñunda bés kii di nlama boñ i ngéda di mbéñge lelaa mbañ i Bibel i nyon. Nye di ‘tééda hilo hi Yéhôva ikété mahoñol.’ Inyuki di mboñ hala? Di mboñ bé hala inyule di nsômbôl yi ‘kel ni ngeñ’ gwét bi Armagédôn bi ga bôdôl, ndi inyule di nsômbôl gwélél i ngéda i yii bés inyu bana “bihiumul bipubhaga, ni maboñok ma ndéñbe i gwés Nyambe.” (Matéô 24:36; Lukas 12:40) Hala a nkobla le di nlama bana bihiumul bilam, di undga ki ni maboñok més le di ngwés Yéhôva ngandak. Inyu pam i boñ i jam li, i nsômbla le di yoñ yihe ni bésbomede.

I YOÑ YIHE NI BÉSBOMEDE WEE KII?

7. Lelaa di nla yoñ yihe ni bésbomede? (Lukas 21:34)

⁷ Yésu a bi kal banigil bé le ba yoñ ngéda i béñge i mam ma ntagbe i nkoñ ’isi, a kal yak bo le ba yoñ yihe ni bomede. Bibañga a bi pot i kaat Lukas 21:34. (Añ.) bi nhôla bés i nok i jam li. Yésu a bi kal le: ‘Yoña yihe ni bébomede.’ Mut a nyoñ yihe ni nyemede a yé mut a nkeñgle mam momasôna ma nla boñ le a ba ha bañ liwanda li Yéhôva. Hala nyen ba nkal le mut a ntééda nyemede ikété gwéha Nyambe.​—Bingéngén 22:3; Yuda 20, 21.

8. Kii ñôma Paul a bi kal lôk kéé?

⁸ Ñôma Paul a bi kal lôk kéé le ba yoñ yihe ni bomede. Kiki hihéga, a bi kal lôk kéé i likoda li Éfésô le: “Yoña yaga yihe bañga liyoñok le ni boñ bañ mam kiki bijôñ bi bôt, ndi kiki bôt ba pék.” (Éfésô 5:15, 16) Satan a nwaa bé noode bés, inyu hala nyen Bibel i nkal le di ‘kee ni bisu i nok kii i yé sômbôl i Yéhôva’ inyu boñ le di kwo bañ mu manoodana ma Satan.​—Éfésô 5:17.

9. Lelaa di nla yi sômbôl i Yéhôva?

⁹ Bibel i mpôdôl bé mam momasôna ma ma nla boñ le di ba ha bañ mawanda ma Yéhôva. Di mbéna yoñ makidik inyu ngim mam Bibel i mpôdôl bé. Inyu boñ le di yoñ makidik malam, di nlama yi “sômbôl i Yéhôva.” Ibale di ñañ Bibel hiki ngéda, di yoñok ngéda i ôt pék mu, ha nyen di ga pam i yoñ makidik malam. I ngéda di nok kii i yé sômbôl i Yéhôva, di bana ki “mahoñol ma Kristô,” ha nyen di nhiôm “kiki bôt ba pék,” to ibale Yéhôva a nti bé bés mambén inyu hiki jam. (1 Korintô 2:14-16) Tjandi di Nsohop dihogi di nhoo nene, dipe di sôli.

10. Kii di nlama keñgle?

¹⁰ Di nlama keñgle mintuk ni mut nu a ta bé sobiina wés, di keñgle ki ngandak nyôba, mbina je, bibuk bibe, biliñgeliñge bi bisañ ni bi malal ma nyega, ni mam mape ki. (Tjémbi 101:3) Nsohop a nyéñ manjel i ôbôs maada més ni Yéhôva. (1 Pétrô 5:8) Ibale di nyoñ bé yihe, Satan a nla boñ le di bana bilem bibe kiki bo tama, malôga, huluk ñem, ôa, ngôk, ni hiun. (Galatia 5:19-21) Bilem bini bi yé bi bôdôl mbeñee mbeñee. Ibale di nhoo bé jôs gwo sañ, bi ño minkañ, bi yila kiki mbôñ.​—Yakôbô 1:14, 15.

11. Himbe hiandi hi Satan di nlama keñgle, inyuki?

¹¹ Hiandi hiada hi hi sôli hi yé bilôñ bibe. Di hégda le i jam lini. U nsal ni mut nu a ta bé Mbôgi Yéhôva. Kiki u nsômbôl le a gwés Mbôgi Yéhôva, u nhôla nye, u undga nye loñgeñem. Ngim mangéda, u njéla yak ni nye. A mba a yii, ni kahal jéla hiki ngéda. A nleñ we minkwel mi malal ma nyega ngim mangéda, u boñok wee u nok bé. I mbus ngéda, minkwel mi mi ntééñga ha bé we. Kel yada, a naña we i nyo pôs biye, u neebe. We ni nye ni kahal bana minlélém mi mahoñol. Ha nyen yak we u nla kahal boñ i mam a mboñ. Di nlama unda bôt bobasôna loñgeñem di tinak bo lipém, ndi di hôiga bañ le i bôt bés ni bo di nkiha, ba nla tinde bés i boñ i mam ba mboñ. (1 Korintô 15:33) Ibale di nôgôl maéba ma Yésu mana le di yoñ yihe ni bésbomede, d’a kiha bé ni bôt ba nôgôl bé mambén ma Yéhôva. (2 Korintô 6:15) D’a keñgle tjandi di Nsohop.

DI TIBIL GWÉLÉL NGÉDA YÉS

12. Kii banigil ba Yésu ba bi boñ i ngéda ba bé bem tjiba i Yérusalem ni témpel?

¹² Banigil ba Yésu ba bi kééha bé moo i ngéda ba bé bem tjiba i Yérusalem ni témpel yé. Yésu a bi ti bo bôlô. A bi kal bo le ba añal ñañ nlam “i Yérusalem, i Yudéa yosôna ni i Samaria, letee ni masuk ma hisi.” (Minson mi baôma 1:6-8) Kinje njok bôlô! Ba bi ti ngéda yap yosôna inyu sal i nson u.

13. Inyuki di nlama tibil gwélél ngéda yés? (Kôlôsé 4:5)

¹³ Añ Kôlôsé 4:5. Inyu éba le di nyoñ yihe ni bésbomede, di nlama yoñ ngéda i badba le: “Lelaa di ngwélél ngéda yés?” “Mimpuhge mi mam” mi nla kwél bésbobasôna. (Ñañal 9:11) Di nla wo to imbe ngéda.

14-15. Lelaa di nla tibil gwélél ngéda yés? (Lôk Héber 6:11, 12) (Béñge yak titii.)

¹⁴ I ngéda di mboñ sômbôl i Yéhôva, di salak inyu boñ le di kônde yila mawanda mé, wee di ntibil gwélél ngéda yés. (Yôhanes 14:21) Di nlama ‘telep siñ siñ, ibabé piñgla, di ban-ga ngandak mam i boñ ikété nson Nwet ngéda yosôna.” (1 Korintô 15:58) Ibale di mboñ hala, ndi lisuk li lo tole nyemb, di ga tam bé.​—Matéô 24:13; Rôma 14:8.

¹⁵ Yak munu ngéda yés, Yésu a nkena nson u ñañ nlam banigil bé ba nsal i nkoñ ’isi wonsôna. A bi yônôs mbônga wé. A ngwélél nkol maliga ni u pék inyu niiga bés i nson u, ni inyu ti bés bisélél. (Matéô 28:18-20) Yak bés di nlama boñ i jam a bi kal bés, hala wee di ti ngéda yés yosôna i añal ñañ nlam. Di yénék ki péé letee ni lisuk. Ibale di nôgôl maéba ma yé i kaat Lôk Héber 6:11, 12, di ga bana botñem “letee ni lisuk.”​—Añ.

16. Kii di nlama boñ?

¹⁶ Yéhôva a nyi kel ni ngeñ lisuk li nkoñ ’isi u Satan li ga kola. Ha ngéda i, a ga boñ le mbañ yosôna i yé mu Bañga yé i yon. Ngim mangéda di yé le di hoñol le lisuk li nhoo bé lo. Ndi hilo hi Yéhôva ‘hi ga tagbe bé ngéda yé.’ (Habakuk 2:3) Jon, ‘di kee ni bisu i béñge Yéhôva, di bemek Nyambe nu tohi yés ibabé waa.”​—Mika 7:7.