Nwéhél i bibéba ilole binoñ bi ntiba

Di nla ndigi kôhna nwéhél i bibéba gwés ni njel sesema i matjél Yésu a bi ti. (Éfésô 1:7) Ndi Bibel i nkal le: “Ikété hônba yé, Nyambe a bé nwéhél bibéba bi bi bé bôña i ngéda kôba,” hala wee, ilole Yésu a nti binoñ. (Rôma 3:25) Lelaa Yéhôva a bé le a boñ i nya jam i, ibabé i bôk matiñ mé ma telepsép?

Inyu Yéhôva, a bé ndik wee ba mal saa binoñ ibôdôl i ngeñ a bi kit le a ga ti ngim “mbôda,” i i ga tohol bôt ba binam ba ba ga hémle nye. (Bibôdle 3:15; 22:18) Nyambe a bé nkwoog nkaa le i ngéda ngeñ i ga kola, mpom wé Man u ga ba bebee i ti binoñ. (Galatia 4:4; Lôk Héber 10:​7-10) I ngéda a bé hana ’isi kiki nu Nyambe a bi om, Yésu a bééna kunde i nwéhél bibéba iloo yaga le binoñ bi ntiba. Yésu a bé nwéhél bibéba bi bôt ba bé hémle inyule a bé yi le i sesema a’ ti, i ga hô bibéba gwap.​—Matéô 9:​2-6.